Tre të akuzuarit për sulmin terrorist të 24 shtatorit në Banjskë të Zveçanit të enjten kanë dalë para Gjykatës.

Prokurori Special, Naim Abazi ka paraqitur në Gjykatë video që tregojnë planin për sulmin në Banjskë.

“Marrin pjesë struktura të larta të shtetit të Serbisë, si dhe pjesëtarë të strukturave ilegale të cilët kanë vepruar në pjesë veriore të Republikës së Kosovës, përfshirë edhe Millan Radoiçiq. Të akuzuarit tjerë, ndër ta edhe Vladimir Radivojeviq,, gjatë takimit kërkojnë armatosjen e fillimit të rezistencës kundër institucioneve të Republikës së Kosovës, përkatësisht në katër komunat të pjesës veriore të Mitrovicës”, deklaroi ai në Gjykatë.

“Video tjetër të nxjerrura nga dronët e konfiskuar nga grupi terrorist në të cilat do të vërtetohet se ky grup në një kohë të gjatë ka kryer ushtrime fizike, përgatitje fushore, ushtrime taktike me armë të ndryshme, shpërthime me eksploziv, makina ushtarake në lëvizje në hapësirat e poligonit serb”, deklaroi tutje ai.

“Kjo Prokurori do ta dëshmojë se grupi ishte mirë i organizuar, i ushtruar dhe se kishte për qëllim saktësisht sulmin më 24 shtator 2024”, tha Abazi. sn

Presidentja e Kosovës, Vjosa Osmani, ka thënë të mërkurën se seanca për konstituimin e Kuvendit të Kosovës, e ndërprerë të martën, duhet të vazhdojë brenda 48 orëve nga ndërprerja, ashtu siç e parashohin ligjet.

“Ju rikujtoj se fryma e Kushtetutës, praktika gjyqësore e Gjykatës Kushtetuese dhe Rregullorja e Kuvendit të Kosovës, ju obligon që seancën konstituiv ta vazhdoni jo më vonë se brenda 48 orëve nga ndërprerja e saj”, thuhet në përgjigjen e Osmanit për kryesuesin e seancës konstituive, Avni Dehari.

Dehari i ishte drejtuar Osmanit të mërkurën në mëngjes me një letër për të sqaruar se si të veprohej më tutje pas ndërprerjes së seancës konstituive të martën.

Osmani tha se është e gatshme të takohet me Deharin dhe me kryetarët e partive politike parlamentare, për të biseduar për rrugën përpara, nëse ato e shohin të nevojshme një gjë të tillë.

Kuvendi i Kosovës dështoi të martën ta konstituojë përbërjen e legjislaturës së re, e cila ka dalë nga zgjedhjet parlamentare që u mbajtën më 9 shkurt.

Deputetët e zgjedhur nuk arritën të kalonin pikën e parë të rendit të ditës, miratimin e raportit të Komisionit të përkohshëm për verifikimin e mandateve dhe kuorumit.

Osmani tha të mërkurën në Facebook se aktgjykimet e Gjykatës Kushtetuese tashmë kanë përcaktuar obligimin e të gjithë deputetëve “që të jetësojnë, e jo të bllokojnë formimin e institucioneve, si dhe të gjejnë rrugën përpara për konstituimin e Kuvendit”.

Kryetari i Lidhjes Demokratike të Kosovës (LDK), Lumir Abdixhiku, tha se e mirëpret përgjigjen e presidentes, por e përsëriti se partia e tij do të kërkojë përsëri nga Kurti me ministra të japin dorëheqje formale.

Disa orë më herët, kryeministri në detyrë i Kosovës, Albin Kurti, tha se thirrjet që anëtarët e ekzekutivit që janë zgjedhur deputetë të japin dorëheqje formale nga Qeveria, janë thirrje “të pamatura”, që do të rrezikonin një vakum institucional.

Deputetët e Partisë Demokratike të Kosovës (PDK), Lidhjes Demokratike të Kosovës (LDK) dhe Aleancës për Ardhmërinë e Kosovës (AAK) votuan kundër raportit, duke thënë se anëtarët e Qeverisë, që janë zgjedhur deputetë, është dashur që të jepnin dorëheqje zyrtarisht më herët, në mënyrë që të mund të betoheshin si deputetë të përbërjes së re parlamentare.

Lëvizja Vetëvendosje (LVV) ka thënë vazhdimisht se ekzekutivi është në dorëheqje që nga përfundimi i mandatit katërvjeçar më 23 mars.

Nga LVV-ja i kanë akuzuar PDK-në, LDK-në, AAK-në dhe Listën Serbe – që abstenoi – se kanë shkaktuar një krizë, duke e futur shtetin në një terren të panjohur.

Miratimi i këtij raporti do t’i hapte rrugë kalimit në pikën e radhës, atë të betimit të deputetëve, më pas zgjedhjes së kryetarit dhe nënkryetarëve të Kuvendit – hapa të nevojshëm për konstituimin e legjislaturës së re parlamentare.

Vetëm pas konstituimit të Kuvendit, do të mund të bëheshin hapa drejt formimit të Qeverisë së re të Kosovës.

Vetëvendosje i fitoi zgjedhjet e 9 shkurtit, me rreth 42 për qind të votave, apo 48 ulëse nga 120 sa i ka Kuvendi i Kosovës.

Por, asaj i nevojitën të paktën 61 ulëse për ta formuar qeverinë e re.

Pas LVV-së më së shumti vota fitoi PDK, me 24 ulëse, e pastaj LDK-ja me 20 sosh.

Mandat kanë siguruar edhe deputetë nga koalicioni parazgjedhor midis Aleancës për Ardhmërinë e Kosovës (AAK) dhe NISMA.

Nga të gjitha këto parti opozitare, “vija të kuqe” për koalicion të mundshëm me LVV-në nuk ka vendosur vetëm Fatmir Limaj, kreu i Nismës.

Kryeminsitri i vendit, Albin Kurti ka thënë se edhe pse partitë tjera politike gjatë mandatit të tyre qeverisë nga e kaluara kanë pasur pothuajse të njëjtin fat, Lëvizja Vetëvendosje sipas tyre, “duhet të largohet nga zyrat e saj një orë e më parë”.

Deklarata u bë nga mbledhja e qeverisë, teksa Kurti tha se ata që nuk pranuan që formalisht ta marrin mandatit e deputetit, po kërkojnë që formalisht të mos jetë kryeministër dhe të lënë ‘pa zot’ shtëpinë.

‘Konstituimi i Kuvendi i cili dje u pamundësua nga PDK, LDK, AAK dhe Lista Serbe, pasi nuk votuan raportin për verifikimin e mandateve si deputetë. Në thelb ata që nuk pranuan që formalisht ta marrin mandatit e deputetit, por kërkojnë nga unë që formalisht të mos jetë kryeministër. Qeveria jonë dhe ky kabinet qeveritar është në detyrë, dhe efektivisht e dorëhequr që nga 23 marsi i këtij viti kur edhe e kemi përmbushur mandatin e rregullt dhe të plotë katër vjeçar. Nga ajo ditë dhe deri zgjedhjen e Qeverisë së re nga legjislatura e nëntë e Kuvendit të Kosovës, qeveria jonë ushtron të gjitha përgjegjësit që i takojnë pushtetit ekzekutiv në përputhje me legjislacionin në fuqi. Kemi vendos qeverinë në një rol kujdestar për të garantuar vazhdimësinë, sigurinë dhe funksionimin e pandërprerë të shtetit tonë në zbatim të Kushtetutës dhe ligjeve”, ka thënë Kurti.

Ndër të tjera, Kurti tha se ajo që ndodhi të martën në Kuvendin e Kosovës ishte e papranueshme, ndërsa theksoi vendosmërine LVV, si forcë fituese në zgjedhjet e 9 shkurtit, për të krijuar qeverinë e re.

“Në historikun tonë të formimit institucioneve, kemi shembuj nga e kaluara kur një qeveri e udhëhequr nga PDK – ndonëse me kuvend të shpërndarë – , një qeveri e udhëhequr nga AAK – ndonëse e dorëhequr -, dhe një qeveri e udhëhequr nga LDK – ndonëse e shpallur si e jashtëligjshme –  kanë qëndruar në detyrë deri në formimin e qeverisë së re. Por një qeveri e udhëhequr nga Lëvizja VETËVENDOSJE! – ndonëse ka përmbushur mandatin e saj të rregullt katërvjeçar – duhet të largohet nga zyrat e saj një orë e më parë”, u shpreh kryeministri në detyrë Albin Kurti. sn

Shpërthen dhuna e emigrantëve në Shqipëri: momente tensioni ekstrem në qendrën e ngritur nga qeveria italiane në Gjadër , ku janë pritur 40 shtetas të huaj të riatdhesuar nga Italia pas dekreteve të dëbimit.

Njëzet emigrantë filluan protestën e dhunshme, duke dëmtuar mobiliet dhe infrastrukturën e qendrës dhe, me pak fjalë, duke shkaktuar kaos. Xhamat e thyera, dyshekët e shkatërruar dhe shtëpitë e plaçkitura janë vetëm disa nga shenjat e lëna nga dhuna e emigrantëve.

Por kjo nuk është e gjitha. Në përpjekje për të kryer një akt ekstrem, tre nga emigrantët e përfshirë thuhet se i kanë shkaktuar vetes plagë me thikë, duke kërkuar ndërhyrjen e personelit mjekësor. Fatmirësisht asnjë nga të lënduarit nuk ishte serioz. Ndërkohë, një nga emigrantët të cilit iu anulua urdhri i dëbimit është kthyer tashmë në Itali.

Epo, çështja është se këta emigrantë nuk ishin emigrantë “të zakonshëm”. Kështu shpjegoi ministri i brendshëm italia Matteo Piantedosi , i cili bëri të ditur faktin se bëhet fjalë për persona të akuzuar ose të dënuar për krime veçanërisht të rënda, përfshirë vrasje të mbetur në tentativë, dhunë seksuale, lëndime të rënda, pornografi me fëmijë, vjedhje, grabitje, nxitje të miturve dhe posedim të lëndëve narkotike. sn

Zëvendësministri në detyrë i Financave, Agon Dobruna, ka njoftuar se është larguar nga një konferencë rajonale e nivelit të lartë që u mbajt në Tiranë, me arsyetimin se Kosova aty u prezantua me fusnotë.

Ai ka shkruar në Facebook të hënën se për shkak të fusnotës me referencën “Rezoluta 1244 e OKB-së”, u largua nga konferenca dhe s’e nënshkroi Deklaratën e Angazhimit, për forcim të bashkëpunimit rajonal në fushën e të drejtave të fëmijëve.

Dobruna ka shkruar se ishte thellësisht zhgënjyese mënyra si u trajtua Kosova, duke thënë se është e papranueshme për një shtet sovran që kontribuon në mënyrë aktive dhe të barabartë në këto procese.

“Ngjarja kishte për qëllim nënshkrimin e Deklaratës së Angazhimit nga të gjitha vendet e Ballkanit Perëndimor dhe më gjërë, për të forcuar bashkëpunimin rajonal në fushën e të drejtave të fëmijëve dhe për të avancuar qasjen ndaj kujdesit dhe shërbimeve gjithëpërfshirëse për fëmijët. Megjithatë, mënyra si u trajtua përfaqësimi i Kosovës ishte thellësisht zhgënjyese dhe e papranueshme për një shtet sovran, që kontribuon në mënyrë aktive dhe të barabartë në këto procese. Pavarësisht kërkesës sonë të qartë dhe të drejtpërdrejtë për të korrigjuar këtë paraqitje, ajo u injorua, duke shkelur frymën e bashkëpunimit, respektit dhe barazisë që promovon vetë konferenca”, ka shkruar ai.

Zëvendësministri në detyrë shtoi se Kosova është realitet i pamohueshëm ndërkombëtar, e sipas tij, nuk mund të mohohet subjektiviteti shtetëror përmes një fusnote “që bie ndesh me të vërtetën dhe me miqësinë që presim nga shtetet që na qëndrojnë pranë”.

“Përdorimi i fusnotës në këtë kontekst nuk është një çështje procedurale – është një çështje e dinjitetit kombëtar, e respektit dhe e trajtimit të barabartë, veçanërisht kur organizatori është një vend mik i Republikës sonë”, ka shkruar tutje ai. sn

Partia Demokratike dhe Aleanca për Shqipërinë Madhështore, i kanë kërkuar sot kryekomisionerit Ilirjan Celibashi që të japë të dhëna zyrtare në lidhje me palët nënkontraktore që kanë të bëjnë me postën që do të shpërndajë fletët e votimit tek diaspora shqiptare.

Gjatë ditës së sotme u denoncuan se ishin 14 fletë votimi ku është printuar dy herë label-i i adresës për të njëjtin zgjedhës.

Por burimet bëjnë me dije se, janë më shumë se 100 raste të verifikuara deri më tani, shumica janë në Dibër dhe në Berat, dhe për këtë arsye janë kërkuar verifikime më të hollësishme.

Në emër të PD-ASHM ka qenë përfaqësuesi Franc Nuri që ka kërkuar informacion në lidhje me këto raste.

Kërkesa për informacion e bërë nga Franc Nuri:

Mirëdita z. Celibashi dhe znj. Josifi,

Në vijim të shqetësimeve të ngritura nga Partia Demokratike dhe Koalicioni PD-ASHM, pas identifikimit të 14 rasteve të para të dyshimta për problematika në procesin e pergatitjes se materialeve te votimit nga jashte, ju lutem të na vini në dispozicion informacionin e mëposhtëm:

Emrat dhe të dhënat identifikuese të nënkontraktorëve të përfshirë në procesin e përgatitjes dhe shpërndarjes së zarfeve të votimit për diasporën, si brenda ashtu edhe jashtë territorit të Shqipërisë.

Procedurat e ndjekura për përzgjedhjen e këtyre nënkontraktorëve dhe kriteret e përdorura për vlerësimin e tyre.

Marrëveshjet kontraktuale të lidhura me këta nënkontraktorë, duke përfshirë detyrimet dhe përgjegjësitë e tyre në kuadër të procesit zgjedhor.

Informacion mbi fondet e përdorura për ofrimin e këtij shërbimi, duke përfshirë burimin e financimit dhe mënyrën e shpërndarjes së fondeve përkatëse.

Shpjegime të detajuara nga kompania e kontraktuar për prodhimin dhe shpërndarjen e zarfeve të votimit, lidhur me arsyet e mundshme të shfaqjes së këtyre 14 rasteve të dyshimta për problematika në procesin e votimit nga jashtë.

Shpjegime te detajuara nga nenkonkraktori postar DHL mbi keto raste dhe problematika dhe si mendohet te adresohen problemet duke shmangur probleme te ngjashme ne te ardhmen.

Ky informacion është thelbësor për të garantuar transparencën dhe integritetin e procesit zgjedhor, veçanërisht për votuesit shqiptarë që ndodhen jashtë vendit. sn

Partia Demokratike hedh dyshime për manipulimin e procesit të votës së diasporës. Përfaqësuesi ligjor i PD  i ka drejtuar një kërkesë zyrtare kryetarit të Komisionit Qendror të Zgjedhjeve, Ilirjan Celibashi, për pezullimin e menjëhershëm të procesit të printimit të dokumentacionit për votuesit nga diaspora. Si dhe i kërkon KQZ mbledhje urgjente në orën  11:30.

Sipas PD-së, gjatë përgatitjes së dokumentacionit janë konstatuar parregullsi të rënda, të cilat mund të cënojnë integritetin e procesit. Vëzhguesit e PD kanë raportuar se në disa raste është printuar dy herë label-i i adresës për të njëjtin zgjedhës, çka nënkupton mundësinë që një person të marrë dy zarfe me fletë votimi. Deri më tani janë identifikuar 14 raste të tilla, por ekziston mundësia që numri i tyre të jetë më i madh.

Nga ana e vëzhguesve tanë jemi informuar se gjatë procesit të përgatitjes së dokumentacionit zgjedhor për votuesit nga jashtë ka pasur një problematikë që lidhet me printimin dy herë të label-it të adresës që në terma praktikë nënkupton që një zgjedhësi mund t’i shkojnë dy zarfe (dy fletë votimi), duke rrezikuar kështu që të kemi më shumë vota se numër zgjedhësish. Sipas vëzhguesve tanë janë identifikuar 14 raste, por mund të ketë edhe të tjerë.

Në këto kushte, me qëllim sqarimin e plotë të kësaj problematike dhe marrjen e masave, kërkojmë që të pezullohet procesi dhe të mblidhemi urgjentisht sot në ora 11:30 në pallatin e sportit “Feti Borova” për të diskutuar lidhur me këtë çështje. Kjo kërkesë ka për qëllim garantimin e rregullshmërisë, ligjshmërisë dhe integritetit të procesit dhe kurrësesi zvarritjen e tij’ thuhet në njoftimin e PD-së. sn