Gjykata Kushtetuese ka vendosur t’i heqë mandatin deputetit socialist Koço Kokëdhima. Lajmi është bërë i ditur në media mesditën e së hënës.

Ky vendim i Kushtetues vjen vetëm 48 orë pasi Berisha njoftoi se disa anëtarë të kësaj gjykate ishin nën presionin e qeverisë për të votuar në favor të Kokëdhimës.

Beteja ligjore e Kokëdhimës është dy vjeçare. Loja nisi kur Partia Demokratike zbuloi disa prokurime publike  të fituara nga kompanitë e Kokëdhimës gjatë kohës që ai ishte mandatuar si deputet.

Duhet thënë se prokurimet nuk përfaqësonin ndonjë implikim të rëndësishëm financiar. Bëhej fjalë për shoqërinë e tij ‘Abissnet’ e cila ofron shërbime interneti dhe kishte lidhur kontrata me disa komuna në kohën që Kokëdhima porsa kishte marrë zyrtarisht mandatin.

Partia Demokratike kërkoi të hetonte këto tendera nëpërmjet një mekanizmi parlamentar por nisma e saj u rrëzua me votat e koalicionit në pushtet.

Më pas PD-ja e atakoi këtë vendim në Kushtetuese dhe në vitin 2015 Kushtetuesja i dha të drejtë PD-së e cila më pas e kishte rrugën e lirë të përgatiste dosjen për Kokëdhimën, të cilën e dërgoi sërish në Kushtetuese por kësaj here shoqëruar me kërkesën për t’i hequr atij mandatin.

Kushtetuesja i dha sërish të drejtë demokratëve dhe nga sot, Kokëdhima nuk do të jetë më deputet i Shqipërisë.

Por ndonëse Kokëdhimës i digjet një vit nga mandati i plotë deri në vitin 2017, pozitat e tij mbeten të forta.
Që prej ardhjes së qeverisë rilindëse në pushtet, ai ka fuqizuar dominancën në disa sektorë të rëndësishëm ekonomikë dhe administrativë.

Kokëdhima kontrollon nëpërmjet operatorit të tij Endri Puka, ndërrmarjen më të fuqishme shtetërore, Albpetrolin.

Endri Puka, drejtor i Albpetrolit

Nga ana tjetër ai  ka vendosur hegjemoninë në bashkitë e jugut. Bashkitë e Fierit, Vlorës, Himarës, Sarandës janë të   drejtuara nga persona të kontrolluar dhe të ndikuar nga Kokëdhima.

Deputeti socialist kontrollon politikat e punësimit në pjesën dërrmuese të institucioneve shtetërore në jugun e vendit dhe po njësoj ai kontrollon ndërhyrjet dhe projektet në vijën bregdetare.

Koço Kokëdhima ka aktualisht një bashkëpunim të ngushtë me Benet Becin, drejtorin e Fondit Shqiptar të Zhvillimit. Ky Fond nëpërmjet kredive të buta që siguron nga institucione ndërkombëtare ka parashikuar një fushatë intensive investimesh në disa bashki të jugut, projektet dhe vendet e piketuara për investim; si  dhe kompanitë nënkontraktore që do kryejnë punimet janë të ndikuara nga Kokëdhima.

Një tjetër pikë e fortë e Kokëdhimës mbetet investimi që ai bëri në zgjedhjet që paraprinë Kongresin e Partisë Socialiste të zhvilluar një muaj më parë.

Kokëdhima arriti të krijojë një lob të fuqishëm përfaqësuesish në jugun e vendit duke kaluar pjesën dërrmuese të këtyre strukturave nën ndikimin e vetë. Ai është ‘de facto’ kontrollor i shumicës së votave të delegatëve të jugut në Kongresin e PS-së.

Ky fuqizim i tij i ka krijuar dhe armiq të hidhur në Partinë Socialiste, ndonëse beteja është zhvilluar gjithnjë nën rrogoz.

Përtej retorikës se gjoja Gjykata Kushtetuese është nën ndikimin e Berishës, vendimi për heqjen e imunitetit të Kokëdhimës ka qenë i dëshiruar dhe për një pjesë të rëndësishme të grupit parlamentar socialist.

Kokëdhima kishte krijuar një dominancë të fortë financiare-administrative-partiake duke shkaktuar pakënaqësi të shumta brenda PS-së.

Pas zgjedhjeve lokale të vitit 2015, në PS atë e thërrisnin shpesh ‘Pashai i Jugut’.

Fuqizimi  Kokëdhimës dhe supremacia e vendosur prej tij në jugun e vendit ka kapërcyer prej kohësh vlerën e mandatit prej deputeti, Kokëdhima operon me besimin e plotë të kryeministrit dhe arriti të krijonte tentakula të rëndësishme, ndaj dhe humbja e mandatit të deputetit nuk mund të jetë diçka vendimtare.

Kokëdhima është deputeti i dytë rilindës që humbet mandatin për shkak të implikimeve në tendera publikë.

I pari ishte ilir Beqaj, i cili ‘u dogj’ vitin 2011, pasi u zbulua se kompania ku ai ishte aksionar kishte fituar disa tendera të majmë në Bashkinë e Durrësit.

Precedenti Beqaj tregoi se Rama e ricikloi atë sërish deputet në vitin 2013, madje e bëri dhe ministër Shëndetësie.

Ç’ka do të thotë se dhe për Kokëdhimën ka gjasa të ndodhë e njëjta gjë.

‘Pashai i Jugut’ do duhet të bëjë durim vetëm një vit, deri në zgjedhjet e vitit 2017, për të marrë sërish mandatin e deputetit. / HashtagAL