Në dokumentin zyrtar të Dhomës së Përfaqësuesve të Holandës (Tweede Kamer), deputetët Stultiens dhe Bushoff i kanë drejtuar Ministrit dhe Sekretarit të Shtetit për Financat shtatë pyetje, duke kërkuar sqarime mbi rolin e kompanive holandeze në strukturën e pronësisë së projektit.

HOLANDË- Parlamenti i Holandës ka ngritur një sërë pyetjesh zyrtare për qeverinë lidhur me dyshimet për korrupsion dhe përdorimin e kompanive guaskë holandeze në një projekt resorti në Shqipëri, i lidhur me dhëndrin e presidentit amerikan Donald Trump. Në dokumentin zyrtar të Dhomës së Përfaqësuesve të Holandës (Tweede Kamer), deputetët Stultiens dhe Bushoff i kanë drejtuar Ministrit dhe Sekretarit të Shtetit për Financat shtatë pyetje, duke kërkuar sqarime mbi rolin e kompanive holandeze në strukturën e pronësisë së projektit.

Deputetët pyesin nëse autoritetet holandeze janë në dijeni të hetimit për korrupsion që lidhet me resortin në Shqipëri dhe nëse vlerësojnë se kombinimi i investimeve të mëdha të huaja, kontrollit të dobët institucional dhe strukturave komplekse të pronësisë përbën një rrezik për kontrollin demokratik. Po ashtu, në pyetjet parlamentare ngrihet shqetësimi se Holanda mund të shërbejë si një qendër për krijimin e kompanive guaskë, të cilat mund të përdoren për të fshehur ose kanalizuar fonde nga jashtë vendit.

Një tjetër çështje e ngritur lidhet me transparencën e pronësisë. Deputetët kërkojnë të dinë nëse është e vërtetë që aksionarët nuk janë të detyruar të bëhen publikë kur zotërojnë më pak se 25% të një projekti dhe pyesin nëse qeveria holandeze është e gatshme të ashpërsojë legjislacionin në këtë drejtim.

Përfaqësuesit e Parlamentit kërkojnë gjithashtu që qeveria të bashkëpunojë me autoritetet shqiptare në hetimin antikorrupsion, me qëllim identifikimin e të gjithë aksionarëve të përfshirë në këto struktura. Në pyetjet parlamentare kërkohet edhe një pasqyrë e plotë e entiteteve me lidhje holandeze të përfshira në projekt, si dhe sqarime mbi legjislacionin që zbatohet ndaj tyre.

Pyetjet e plota:

1. A jeni në dijeni të hetimit për korrupsion lidhur me resortin në Shqipëri, i cili çon te kompanitë guaskë (shell companies) në Holandë?

2. A e ndani vlerësimin se kombinimi i investimeve të mëdha të huaja, kontrollit të dobët institucional dhe strukturave komplekse holandeze të pronësisë përbën një rrezik të madh për kontrollin demokratik?

3. A e ndani vlerësimin se Holanda, si ofruese e kompanive guaskë (shell companies), luan një rol të rëndësishëm në fshehjen ose largimin e parave që vijnë nga jashtë vendit?

4. A është e vërtetë që aksionarët nuk kanë nevojë të bëhen publikë nëse zotërojnë më pak se 25% të projektit? Sa hapësirë ka Holanda për ta ashpërsuar këtë rregull? A jeni i gatshëm ta bëni këtë?

5. A jeni i gatshëm të bashkëpunoni në mënyrë proaktive me hetimin shqiptar kundër korrupsionit (SPAK) dhe të siguroni që të bëhen të njohur të gjithë aksionarët e këtyre strukturave?

6. A mund të paraqisni një përmbledhje të entiteteve të përfshira që kanë lidhje me Holandën dhe të tregoni se nën cilin legjislacion bëjnë pjesë ato?

7. A jeni i mendimit se sektori dhe vetërregullimi i tij funksionojnë aktualisht në mënyrë të mjaftueshme në interes të publikut? Çfarë masash keni ndërmarrë vitet e fundit për të rregulluar më fort sektorin e entiteteve? A janë arritur objektivat e synuara?

Këto pyetje parlamentare u dorëzuan më 15 qershor 2026 dhe bazohen në një artikull të publikuar nga media investigative holandeze Follow The Money, e cila raportoi për një hetim mbi lidhjet e kompanive guaskë holandeze me resortin në Shqipëri./Dosja.al