Nesër LDK do të tregojë kush është.

Do të shkojë tatëpjetës apo përpjetës.

Nëse shkon tatëpjetës, degradimi është përfundimtar, i fundëm . Nëse shkon të përpjetës, do të thotë se do të bëjë  kthesën jo vetëm në të mirë të Kosovës, por sidomos për të shpëtuar fytyrën nga pështymja e madhe.

Të vihet në diskutim stabiliteti i Kosovës nga zgjedhja apo jo e Hashim Thaçit si president i Kosovës, një emër i përlyer nga një e shkuar e inkriminuar dhe nga një qeverisje e korruptuar, kompromenton tërësisht standartin e demokracisë në Kosovë.

Prandaj protestohet, si mjeti i fundit, sepse koalicioni qeverisës është i ngritur mbi themelin prej rëre të ilegjitimitetit.

Edhe deputetët e LDK-së në kuadrin e kësaj aleance nuk kanë legjitimitet, por gjithësesi nesër e kanë shansin e fundit.

Të ngrihen si formacion, apo të bien nën këmbët e Thaçit, duke dalë  përfundimisht nga skena politike.

Nëse deputetët e LDK-së do të jenë nesër për kuorum, ata do të fundosin përfundimisht jo vetëm partinë, por emri i tyre do të jetë i damkosur si shkelës dhe keqpërdorues i vullnetit të Sovranit.

Qofshin kushdo qofshin!

E gjithë Kosova i ka sytë tek ata.

Fakti që rrinë si mumje, që nuk guxojnë as të shprehin mendimin e tyre, që heshtin, kjo vë në pozita shumë të padëshëruara.

Por nëse nesër do të bëhen pjesë e zgjedhjes së Thaçit, do të marrin si shuplakë neverinë e elektoratit që ia nëpërkëmbën besimin që ju dha.

Deputetët e LDK-së  prej nëntorit 2014 njihen si vjedhës votash, mashtrues të elektoratit, gënjeshtarë,  rezilë e faqezinj sepse tjetër gjë i premtuan atyre që u morën votat  në qershorin e 2014.

Prej nëntorit 2014, ata janë pa identitet, si gurë shahu në duart e një kryeministri kukull.

E megjithatë  fati nesër ju ka dhënë në dorë shansin e jetës së tyre, të respektojnë votën që i bëri deputetë të LDK-së!

Është obliguese!