NUK VDES FJALA E HAMIT ALISË- Nga HASAN SELIMI

March 7, 2023

N`flakë të mallit kënga tisk,

piskama e saj dridhi malet,

Ajkuna thonë se ka pre gërshetin,

Omeri ka dridh malin e bardhë,

ka hedh dheun përtej kufirit t`kohës,

dërrasat e varrit shalë t`gjogut bardhë,

koha ndalon,

dielli u nxi me lotin e dadave,

kulla heshtë, nxjerr emrin bosh,

kali hingëllin e këput frenin,

armët hedh sa andej këtej,

fjala s`ka më kurrë mejdan,

hana thonë se nuk lind kurrë,

unazë s`bëhet për çika as dhënderr,

bjeshkët janë bërë mbiemër,

krushqit tash mbetë n`gur,

rradhën e kanë qyqet,

shqipet marrin me vete emrin,

atje, kah Tropoja shenojnë kufijt e fjalës,

n`Kasaj thonë se s’ka më diell,

gjeli mëngjesin nuk e thotë.

Tupanat janë kthyer në dru,

S’ka kurrë më fjalë prej tyre,

zani i zanave është shtue,

dragojt po grithen në vaj burrash,

gjaku i tyre pluhur që ndan horizontet,

bjeshka ka ndal blerimin,

Drini hesht,

Valbona kjan,

ka shtue lotin,

unë gdhend lapsin për kohën pa ty.

Jo nuk vdes fjala e Hamit Alisë

Tiranë me 07 Mars 2023

• twitter

  Follow
• facebook
• linkedin

Fjalë kyçe: fjala e Hamit Alisë, HASAN SELIMI