NOKTURNO PËR QERIM ARIFIN- Poezi nga Beqir Musliu

April 22, 2023

(Në vend të homazhit për mikun tim poet që për të gjallë të tij e kam quajtur Feniks)

Të thash Feniks dhe Ti prapë erdhe këtu

Të shpallësh ringjalljen tënde të purpurt

The Ai që e varrosët pak më parë nuk jam unë

Ku ke parë ti të varroset Feniksi A the vetë

Aty është varrosur vetëm ajo pjesë që

Nuk më takon Ja bie fjala Hija ime që e barta

Kaq shumë dhe krejt pjesën tjetër që ishte

Njësoj e tepërt Bie fjala Sëmundina ime e rëndë

Tash jam më i lehtë dhe nuk do të vdes kurrë

Çdo gjë tjetër ka të njëjtin dritësim

Hyjnore që aq shpesh ta kam profetizuar

Ku ke pare ti të vdesë Feniksi

Më tha Të pashë Tri Pika Loti i derdhe

Mbi të njëjtin varr që pandehe se është imi

Këtu e më tej do të jem jashtë tij

Mos i kërko trajtat e Feniksit në çdo ndeshje

Të ardhshme Më tej unë do ta ndjek purpurin

Që po e gjakon sot e dy mijë vjet rresht

Në pergamenën e parë t’i kam hetuar gishtat

Mos shko më tej Unë jam matanë Maestro

Do të më gjesh Mbyllur në urnë Lexoje

Edhe Udhëtimin në urnë Duhet të mbesë edhe

Diçka Aq e Madhe për Amshimin Të më Ri-Njohësh

Përveç Vdekjes Ka Edhe Vepra Të Tjera

Në Dorëshkrimin e Mbledhësve të Purpurit

Ka vend edhe për mua Meqë tash jam më i lirë

Sëmundinën time ma varrosët atë ditë me shi

Ti mendon se nuk e di Ata ishin lotët e tu

Dhe nuk i beson atij ceremoniali funebër As Unë

Ku ke parë ti të vdesë Feniksi

Erdha në Nokturno të Qerim Arifit

(1990)

• twitter

  Follow
• facebook
• linkedin

Fjalë kyçe: BEQIR MUSLIU, Qerim Arifi