Nënkoloneli rus Konstantin Frolov, komandant i Brigadës së 83-të Ajrore të Gardës dhe i njohur me nofkën “Ekzekutuesi”, i paraqitur më herët në videot e Ministrisë së Mbrojtjes si simbol i trimërisë ruse në Ukrainë, është vënë në qendër të një skandali të madh korrupsioni.

Sipas Investigative Committee of Russia, Frolov dyshohet se ishte truri i një skeme mashtrimi që përfshinte dhjetëra ushtarë dhe mjekë të Brigadës së 83-të Ajrore të Gardës, një njësi elitare e ushtrisë ruse. Hetimet pretendojnë se mbi 30 persona organizuan një operacion “vetëdëmtimi”, duke qëlluar veten ose njëri-tjetrin për të përfituar kompensime shtetërore për plagë lufte.

Në nëntor 2024, presidenti rus Vladimir Putin nënshkroi një dekret që parashikon 3 milionë rubla për lëndime të rënda dhe 1 milion rubla për lëndime të lehta. Sipas padisë, skema dyshohet se ka përfituar rreth 200 milionë rubla (afërsisht 2.6 milionë dollarë), me komandantët që merrnin përqindje nga çdo pagesë. Gazeta The New York Times citon një ushtar të quajtur Danil, i cili ka deklaruar se ideja ishte e thjeshtë: “Nëse doni të largoheni, duhet të plagoseni. Ne ju plagosim, ju na jepni një milion dhe largoheni me dy të tjerët.”

Në një intervistë nga burgu, Frolov ka pranuar parregullsi financiare, por ka mohuar organizimin e vetëplagosjeve. Ai pretendon se bëhej fjalë për manipulim dokumentesh – duke ndarë plagë nga një sulm i vetëm në disa incidente për të rritur kompensimin – dhe se arrestimi i tij ka motive politike. Sipas tij, ai po ndëshkohet për kritikat ndaj udhëheqjes ushtarake për taktikat e ashpra në front dhe për të ushtruar presion ndaj babait të tij, Oleg Frolov, ish-zyrtar në Roscosmos, i cili gjithashtu përballet me akuza për korrupsion. Këto pretendime nuk janë verifikuar në mënyrë të pavarur.

Ndërkohë që propaganda e paraqiste si hero të frontit, postimet në rrjetet sociale të bashkëshortes së tij tregonin një stil jete luksoz, me udhëtime dhe evente VIP në Shën Petersburg dhe zona të tjera të Rusisë.

Rasti i Frolovit nuk duket i izoluar. Të paktën 12 zyrtarë të lartë ushtarakë janë arrestuar kohët e fundit për akuza korrupsioni. Analistët sugjerojnë se Kremlini po ndjek një politikë “karrote dhe shkopi”, duke toleruar përfitime deri në një pikë, por duke ndëshkuar ata që perceptohen si të papërshtatshëm ose politikisht të rrezikshëm.

Brigada e 83-të Ajrore e Gardës është e vendosur në Lindjen e Largët ruse, pranë Vladivostokut. Ish-komandanti i saj, koloneli Artyom Gorodilov, u arrestua në vitin 2024 për mashtrim në shkallë të gjerë dhe po përballet me procedura të ndara ligjore. Ai kishte komanduar më herët Regjimentin e 234-të Ajror, të akuzuar nga prokurorët ukrainas për krime lufte gjatë pushtimit të Bucha-s. Frolov pritet të dënohet muajin e ardhshëm, pasi ka arritur një marrëveshje pranimi të fajësisë me autoritetet. “Vendi që më quajti hero për një vit, tani po më mban në kafaz”, është shprehur ai në gjykatë, ndërsa për shumë rusë rasti i tij shihet si një tjetër dëshmi se lufta, për disa, është kthyer në një biznes fitimprurës. bw