Konferenca për shtyp pas rikthimit të suksesshëm të kapsulës Orion përmbylli një nga momentet më të rëndësishme për programin Artemis II, me drejtuesit e NASA-s që e cilësuan këtë mision si një pikë kthese për eksplorimin njerëzor të hapësirës.

Menaxheri i programit Orion, Howard Hu, deklaroi se dita e sotme shënon “fillimin e një epoke të re të eksplorimit të hapësirës nga njeriu”, duke nënvizuar rëndësinë historike të këtij misioni.

Ndërkohë, drejtori i fluturimit, Rick Henfling, bëri të ditur se misioni i radhës është “tamam në cep”, duke konfirmuar se fluturimi i ardhshëm pritet të zhvillohet vitin e ardhshëm.

Sipas të dhënave zyrtare, ekuipazhi i Artemis II përshkoi rreth 700,237 milje gjatë misionit, duke arritur një shpejtësi maksimale prej 24,664 milje në orë – një performancë që demonstron kapacitetet e avancuara të teknologjisë së re hapësinore.

Gjatë konferencës u rikujtuan edhe momentet më mbresëlënëse të udhëtimit. Administratorja e përkohshme, Lori Glaze, veçoi vëzhgimin e një eklipsi diellor nga hapësira, duke e përshkruar atë si një “përvojë krejtësisht unike”.

Ajo shtoi se, përveç imazheve mahnitëse të dërguara nga ekuipazhi, janë mbledhur edhe të dhëna të shumta shkencore që do të analizohen në javët në vijim, duke ndihmuar në përmirësimin e misioneve të ardhshme.

Në një moment më personal, Hu ndau emocionet e tij, duke thënë se përjetimi i sotëm ishte “mijëra herë më i mirë” se Star Wars, një film që ai kujtoi se e kishte parë dikur me babanë e tij të ndjerë.

Me këtë sukses, NASA po i afrohet gjithnjë e më shumë objektivit për të rikthyer njeriun në Hënë dhe për të ndërtuar një prani të qëndrueshme përtej orbitës së Tokës. bw