Më 6 korrik 2021 ka ndërruar jetë në moshën 67-vjeçare poeti dhe kineasti i njohur Petrit Ruka. Lajmin e kanë konfirmuar miq dhe të afërm të tij në rrjetet sociale.

Ruka u nda sot nga jeta pas një beteje njëvjeçare me një sëmundje të rëndë. Ai është ndër poetët më të shquar të brezit të tij, dhe një skenaristët dhe regjisorët më të mirë të vendit.

Petrit Ruka u bë i njohur qysh me vëllimin poetik “Atdheu fillon tek zemra”, i cili mori çmimin kombëtar në vitin 1983. Prej atëherë ai ka botuar mbi 10 vëllime të tjera me poezi dhe disa dhjetëra skenarë filmash, dokumentarë e monografi.

Petrit Ruka ka zënë vendin e vet në letërsinë shqiptare si një nga poetët më të mirë të saj. Me ikjen e tij letërsia shqiptare humbet një nga burimet e mëdha të saj, që vazhdonte të mbante gjallë poezinë shqiptare.

Trashëgimia e tij artistike është një antologji e pavdekshme që nderon historinë e letërsisë sonë dhe e bën atë të pavdekshëm.

“Ndahet nga jeta Petrit Ruka pas nje semundje te pasherueshme, Petriti ky tepelenas i shquar na la nje boshllek te madhe ne gjithe Laberin e me tej , poet, publiciste, skenograf i shquar nje nga shkrimtaret me te mire te letersise shqipe, nje patriote e devotshem sot fjalet per ty nuk mbarojne.
Lamtumire o njeri i mire, do kujtohesh perhere nga te gjithe, per vepren e madhe qe le. Varrimi eshte sot ne Tirane date 06/07/2021 ne oren 13.00 ne Tufine, nisja behet nga Agjensia funerale Alba 2000 tek Medreseja”, shkruajnë miqtë në faqen “Rreth i Tepelenës”.

JETESHKRIMI
Petrit Ruka Lindur në Tepelenë më 21.08.1954. Ka kryer studimet e larta për Gjuhë Letërsi Shqipe dhe studimet pasunuversitare pёr dramaturgji filmike, Akademia e Arteve të Bukura, Tiranё 1985 – 1986.

Ka punuar si pedagog nё Shkollёn e Mesme tё Pёrgjthshme, Tepelenё.1976 – 1984. Skenarist dhe regjisor. Kinostudio “Shqipёria e Re” dhe Alba Film Studio.Tiranё.1986 – 1996. Drejtor nё Teatrin Kombëtar të Fëmijëve. Tiranё 2000 – 2000. Kryetar i Qëndrës Kombëtare Kinematografike Shqiptare 2000 – 2005, 2007 – 2008 Pedagog i jashtëm, Universiteti i Arteve, Dega e Regjisë së Filmit

Ka botuar:
1. “ Rinia ime” vёllim, poezi, 1978.

2. “ Atdheu fillon tek zemrat” vёllim, poezi 1983

3. “ Mirupafshim, hënë e vendlindjes!” vёllim, poezi, 1990

4. “ Vërtitu, Kokë e prerë!” vёllim, poezi, 2000.

5. “ Në zemër bie shi…” vёllim, poezi, 2003

6. “Shtatë mijë shirat e mi” poezi të zgjedhura, 2008

7. “Kalorësi mbi det“ esse monografike për Kadri Roshin 2009

8. “Iso dashurie“ Ars Poetika & Petrit Ruka, poezi e zgjedhur 2015

9. “Nëntë vjet e nëntë ditë“ Poemë baladeske, 2015

Ka realizuar me shume se 40 vepra kinematografike si skenarist dhe regjisor.

Si skenarist: filma artistik. Vepra tё ekranizuara:

1. “Eja” 1986, skenari pёr film artistik, regjisor Piro Milkani.

2. “Njё i tretё “ 1987, skenar pёr film artistik, met. i shkurtёr, regjisor F.Koçi.

3. “Lumi qё nuk shteron” 1988, skenar pёr film artistik, regjisor Fatmir Koçi.

4. “Njё djalё dhe njё vajzё” 1989. skenar, film artis, regjisor I. Muça. K. Mitro.

5. “Vazhdojmё me Bethovenin” 1995 skenar pёr film artistik, regjia S. Pecani

Filma dokumentarë.

1. “Shembja e idhujve” 1994 skenar pёr film dokumentar, regjisor K. Gjonaj.

2. “Tё burgosurit e galerisё” 1994, sken pёr film dok, regjisor S.Kumbaro

3. “Nёnё Tereza” 1999, skenar pёr film dokumentar, regjisor K. Gjonaj.

4. “ Butrinti i gjallë” 1996 skenar pёr film dokumentar, regjisor P. Ruka

5. “Në fillim ishte Ademi” skenar pёr film dokumentar, regjisor P. Ruka.

6. “Braktisja e Madhe” skenar pёr film dokumentar, regjisor P. Ruka.

7. “Qyteti mbi gur” 2002 skenar pёr film dokumentar, regjisor Eli Bici.

8. “Qyteti mbi naftё” 2003 skenar pёr film dokument, regjisor P. Dervishi.

9. “Nënë Tereza” 2004 skenar pёr film dokumentar, regjisor K. Gjoni.

10. “Drama Fadil Paçrami“ 2006 skenar pёr film dokument, regjisor N.Ajazi.

11. ’’Atdheu lind nga tё rёnёt’’ 2006 skenar pёr film dokum, regjia Esat Ibro.

12. “Kur vriteshin poetët” 2007 skenar për film dokumentar. Regjia N.Ajazi.

13. “Poet i ekranit” skenar për film dokumentar. regjia P. Ruka.

14 “Aleksandër Moisiu“ skenar për film dokumentar. regjia N. Ajazi.

15. “Unë jam Ismail Qemali“ skenar për film dokum. regjia Viktor Gjika.

Filma vizatimorë.

1. “I vdekuri i gjallё” 1993, skenar pёr film vizatimor, regjia Albert Malltezi.

(shpallur skenari mё i mirё i filmit nё Fest e 10 kombёtar tё Filmit shqiptar.)

2. “Ekuilibёr” 1994 skenar pёr film vizatimor, regjia Albert Malltezi.

3. “Nёntё vjet e nёntё ditё” 2001, skenar pёr film vizatim, regjia Artur Dauti.

Si regjisor ka realizuar: (skenari dhe regjia)

1 “Njëqind për qind” 1994 film artistik, skenar e regji P. Ruka, A. Minarolli.

2. “Plumbi prej plasteline” 1995 film art, s kenar e regji P. Ruka, A. Minarolli.

3. “Butrinti i gjallë” 1998. dok. për Kadri Roshin, skenari e regjia Petrit Ruka.

4. “Në fillim ishte Ademi” 1999 dok. për A, Jasharin, skenar e regji P. Ruka.

5 “Braktisja e Madhe” 2001 dok për emigrimin. skenari e regjia Petrit Ruka.

6. “Kapedani i këngëve”, 2005 dok. poetit Maliq Lila. S kenar e regji P. Ruka.

7. “Amanet Labërinë” 2006. Dok. për Enver Guga. skenari e regjia P. Ruka.

8. “Me varrin hapur” 2006 dok për L. Mërkurin. skenar e regji P. Ruka.

9. “Bolenë, trimja Bolenë” 2007 dok. skenari e regjia Petrit Ruka.

10. “Aulona Folk Inernacinal Festival“ I 2009 dok. skenar e regji P. Ruka.

11. “Folk Inernacinal Festival“ II film dok. S kenari e regjia Petrit Ruka.

12. “Folk Inernacinal Festival“ III film dokument. skenari e regjia Petrit Ruka.

13. “Poeti i ekranit, Viktor Gjika” 2009 film dok. skenari e regjia Petrit Ruka.

14. “Homerët e filmit ballkanik“ – vëllezërit Manaqi. dok. sken e regji P/ Ruka.

15. “100 vjet me Himnin e Flamurit“ film dokum. skenari e regjia P. Ruka.

16. “Flamurmbajtësi i Vatrës“ film dokumentar. skenari e regjia P. Ruka.

17. “Syri i Shqiponjës“ film dokumentar. skenari e regjia. Petrit Ruka.

18. “Buzët tek kënga…“ dok për poetin Agim Shehu. skenar regji. P. Ruka.

Të tjera:

1. Anëtarë i disa bordeve artistikë në RTSH. QKK dhe institucione të tjera.
2. Pjesëmarrës në disa Koferenca Kombëtare e Ndërkombët, për Kinematog,
3. Autor i një sërë shkrimesh në shtypin letrar, reportazhe, ese, artikuj për kulturën e kinematografinë.

ÇMIME LETRARE DHE FILMIKE
Çmimi libri më i mirë poetik i vitit 1983 me vëllimin “Atdheu fillon tek zemrat”

Disa cmime të para dhe të dyta për cikle poetik në shtypin letrar në gazetën “Drita” dhe “Nëntori” në vitet 1980- 1990

Çmimi i parë për skenarin e filmit “I vdekuri i gjallë” në Festivalin e 10-të Kombëtar Kinematografik 1993

Çmimi i parë për kameran në filmin artistik “Plumbi prej plasteline” në Festivalin Kombëtar Kinematografik 1995

Çmimi “Dokumentari më i mirë i Jubileut 2012” për filmin dokumentar “Kryekënga e Kombit” viti 2012

Çmimi i Akademisë KULT për dokumentarin më të mirë të viti 2012 për filmin “Kryekënga e Kombit” viti 2013

Çmimin poeti më i mirë i viti 2013 nga Fondacioni letrar “Harpa” Fier.

Çmimi i parë poetik në Manifestimin poetik të Pejës, 2015

TITUJ
Skenarist, akorduar nga Kinostudio “ Shqipëria e Re” në vitin 1988
Regjisor i filmit, akorduar nga Kinostudio “ Shqipëria e Re” në vitin 1995

MJESHTËR I MADH, akorduar nga Presidenti i Republikës së Shqipërisë, Bujar Nishani me dekretin nr, 9371, Tiranë, më 18 dhjetor 2015 me motivimin e mëposhtëm: “për krijimtarinë e tij letrare dhe kinematografike, si poet, skenarist, shkrim-tar e publicist i shquar”.

Ndarja nga jeta e Petrit Rukës, publicisti Pëllumb Kulla: Ditë e trishtë, dua ta ndriçoj me një poezi të tij! Poet i pazëvendësueshëm