Ardit Dulaj, protestues i angazhuar në lëvizjen që po organizon mobilizimin e diasporës për protestën e 28 dhe 29 nëntorit në Tiranë, ka zbuluar detaje mbi organizimin dhe itinerarin e marshimit. I ftuar në emisionin “Minuta e Parë” në News24, me Ola Brukon, Dulaj tha se shqiptarët që do të vijnë nga jashtë vendit dhe qytete të ndryshme të Shqipërisë do të bashkohen në kryeqytet për të kërkuar dorëheqjen e kryeministrit Edi Rama.

Ai bëri të ditur se më 28 nëntor do të organizohet një kolonë që do të vijë nga veriu i Shqipërisë, duke e cilësuar këtë zonë si portën tokësore që lidh vendin me Europën. Më pas, pjesëmarrësit do të bashkohen me shqiptarët që do të vijnë nga jugu, në ish-stacionin e Trenit në Tiranë, për të vijuar së bashku marshimin drejt sheshit.

“Me 28 nëntor do të përgatisim një kolonë që do të vijë nga veriu i Shqipërisë, që është porta hyrëse tokësore me Europën dhe ne na bashkon flamuri kuq e zi. Do të nisemi drejt Tiranës. Më pas, takimin bashkë me shqiptarët që vijnë nga jugu i Shqipërisë do ta kemi te ish-stacioni i Trenit. Më pas do të ndalemi te sheshi”, u shpreh Dulaj.