– Poezi nga “Kanuni poetik”

Gjatë jam konsultuar me veten

tëra hallet bluar i kam në kokë

një shtëpi shteti ma premtoi, se

atë që e kisha serbët ma dogjën

.

Asnjë turp unë s´e ha me bukë

bëra atë që më kërkonte atdheu

u plagosa  dy herë nëpër beteja

dhe tani jam  një gjysmë i rënë

.

Nderi im bukën s´e ha me turp

lirinë s´e kam menduar kështu

gruaja ime provoi të gjejë punë

por i vunë kusht, test në krevat

.

Atë  çast  i  tërë  qielli  më zuri

desha ti vras ose t´ua vë flakën

por amaneti i babës nuk më la;

biri im, ti s´ke plumb për vëlla!…

.

Atdhe Geci – Prishtinë, 2007 – poezi nga “Kanuni poetik”