Kur vij në Pejën time- Poezi nga Neki Lulaj

September 24, 2024

 Jam gati të bëhem tjetër dritë dielli për udhët e Pejës

 Të marr për dore fëmijët kur nisin klasën e parë

Të shtroj me loket e çikat flinë mes tryezës.

 Me druvarët të shtrëngoj në supe sëpatë e sharrë.

 Dua të lodhem në Rugovë pas qengjave mes barinjve.

 Të gdhihem pranë stanit me qentë e Sharrit të bleruar.

 Janë shtuar ujqërit në këtë kohë me gjëmime

Janë shtuar dhelprat me gëzofë të ndërruar.

 Në gjunjë do të ulem në Pejë në çdo avlli e bahçe

 Të vadis lulet që I duam për mësues, nëna e dëshmorë

Me Komandant Saliun dashkam ta gjerbokam një kafe

 Të më rrëfejë si Gjergji gjoksin e trupin e plaguar.

Në Pejë bëhem njëheresh djalosh që bën garë me duar.

Në Bërliqin tim do të bëhem si babagjyshi me thinja

 Dua të jem kryekrushku me tupan e flamurin kuqëluar

Të udhëkryqe e sheshe të më dehë lahuta e çiftelia.

 Besomëni për besë, se gjumin këtu dua ta dëboj

Për foshnjën e porsalindur djepim e pelenat i kam gati.

 Evropa qënka larg, shumë larg ku Pejën përqafoj

 Me vargun e thurur bëhem si fëmijë a si ushtari

• twitter

  Follow
• facebook
• linkedin

Fjalë kyçe: NEKI LULAJ