Presidenti i Ukrainës, Volodymyr Zelensky duket se e ka konfirmuar tashmë se kundërsulmi i shumëpritur e vendit të tij kundër Rusisë ka filluar.

“Po zhvillohen veprime kundërsulmuese dhe mbrojtëse”, tha ai, njofton BBC.

Por ai shtoi se nuk do të jepte hollësi se në cilën fazë apo gjendje ishte kundërofensiva.

Komentet vijnë pas një përshkallëzimi të luftimeve në jug dhe lindje të Ukrainës dhe spekulimeve për përparimin e sulmit të shumëpritur.

Trupat ukrainase raportohet se kanë avancuar në lindje pranë Bakhmutit dhe në jug pranë Zaporizhzhia dhe se kanë kryer sulme me rreze të gjatë ndaj caqeve ruse.

Por vlerësimi i realitetit në vijën e parë është i vështirë, me dy palët ndërluftuese që paraqesin narrativa të kundërta: Ukraina pretendon përparim dhe Rusia se po i zmbraps sulmet.

Ndërkohë në rajonin Kaluga të Rusisë – që kufizohet me rrethet jugore rreth Moskës – guvernatori Vladislav Shapsha tha në Telegram se një dron u rrëzua pranë fshatit Strelkovk herët të dielën. BBC nuk e ka verifikuar në mënyrë të pavarur raportin.

Presidenti rus Vladimir Putin tha në një video-intervistë të publikuar të premten se forcat ukrainase sigurisht që e kishin filluar ofensivën e tyre, por se përpjekjet për përparime kishin sjellë viktima të shumta.

Duke folur nga Kievi të shtunën pas bisedimeve me kryeministrin kanadez Justin Trudeau, Zelensky i përshkroi fjalët e liderit rus si “interesante”.

Duke ngritur supet, duke ngritur vetullat dhe duke u shtirur se nuk e dinte se kush ishte zoti Putin, Zelensky tha se ishte e rëndësishme që Rusia ta ndiente se “nuk i ka mbetur shumë kohë”.

Ai tha gjithashtu se komandantët ushtarakë të Ukrainës ishin në një humor të mirë, duke shtuar: “Thuajani këtë Putinit”.

Trudeau njoftoi 500 milionë dollarë kanadezë (297 milionë £) në ndihmë të re ushtarake për Ukrainën gjatë vizitës së paparalajmëruar.

Një deklaratë e përbashkët e lëshuar pas bisedimeve thoshte se Kanadaja mbështet anëtarësimin e Ukrainës në NATO “sapo ta lejojnë kushtet”, duke shtuar se çështja do të diskutohej në Samitin e NATO-s në Vilnius, Lituani, në korrik.

Ndërkohë, luftimet janë përshkallëzuar ditët e fundit në rajonin kyç jugor Zaporizhzhia, thonë zyrtarët rusë, me forcat e Ukrainës që raportohet se po përpiqen të rifitojnë hyrjen në detin Azov, gjë që do të ndante forcat ruse.

Shpresa e Ukrainës për përparime në rajon mund të pengohet nga përmbytjet e mëdha në jug të vendit pasi diga Nova Khakovka u shkatërrua javën e kaluar.

Përmbytja ka mbuluar rreth 596 km katrorë në të dyja anët e lumit Dnipro.

Në fjalimin e tij të natës të shtunën, Zelensky tha se 3,000 njerëz janë evakuuar nga rajonet e përmbytura Kherson dhe Mykolaiv.

Dhe kreu rajonal i Khersonit, Oleksandr Prokudin tha se nivelet e ujit kishin rënë me 27 cm, por më shumë se 30 vendbanime në bregun e djathtë të lumit ishin ende të përmbytura dhe pothuajse 4,000 ndërtesa banimi mbetën nën ujë.

NATO dhe ushtria e Ukrainës kanë akuzuar Rusinë për hedhjen në erë të digës, ndërsa Rusia ka fajësuar Ukrainën

Mbetjet e dronit godasin shtëpitë në Odesa

Diku tjetër, tre persona vdiqën dhe dhjetëra u plagosën në një sulm rus në qytetin jugor të Odesa gjatë natës nga e premtja në të shtunën.

Rënia e mbeturinave nga një dron rus i rrëzuar shkaktoi një zjarr në një bllok banimi në qytetin port të Detit të Zi, thanë zyrtarët ukrainas./SYRI.NET