Kryeministri i Norvegjisë, Jonas Gahr Støre, ka deklaruar se pajtohet me pranimin e Princeshës së Kurorës, Mette-Marit, se ajo ka treguar “gjykim të dobët”, pasi u zbulua se kishte pasur kontakte të shpeshta me Jeffrey Epstein, shkelësin famëkeq të ligjit për krime seksuale.

Emri i princeshës shfaqet qindra herë në dokumentet e publikuara së fundmi nga Departamenti Amerikan i Drejtësisë, të cilat lidhen me aktivitetet dhe rrjetin e kontakteve të Epstein gjatë viteve 2011–2014.

Ky skandal i fundit rëndon më tej imazhin e familjes mbretërore norvegjeze, në një kohë veçanërisht të ndjeshme, pasi djali i princeshës, Marius Borg Høiby, po përballet me një gjyq shtatëjavor në Oslo, ku akuzohet për 38 vepra penale, përfshirë përdhunim dhe sulm seksual.

Mette-Marit u martua me Princin e Kurorës Haakon kur ajo nuk kishte ende status mbretëror dhe djali i saj ishte vetëm katër vjeç. Ajo pritet të bëhet mbretëreshë kur bashkëshorti i saj të ngjitet në fron.

Pas publikimit të përmbajtjes së korrespondencës së saj elektronike me Epstein, princesha lëshoi një deklaratë ku pranoi gabimin:

“Kam treguar gjykim të dobët dhe pendohem që kam pasur ndonjë kontakt me Epstein. Është thellësisht e turpshme.”

Ajo shtoi gjithashtu se ndjen “solidaritet dhe dhembshuri të thellë për viktimat e abuzimeve të kryera nga Jeffrey Epstein”.

Edhe pse kryeministri Støre u kufizua vetëm në mbështetjen e këtij pranimi, një qëndrim i tillë konsiderohet i pazakontë për një figurë kaq të lartë shtetërore ndaj familjes mbretërore. Ai shtoi se edhe ish-kryeministri Thorbjørn Jagland kishte treguar “gjykim të dobët”, pasi ishte zbuluar se kishte planifikuar pushime familjare në ishullin privat të Epstein, megjithëse ato u anuluan më vonë.

Dokumentet zbulojnë gjithashtu se Princesha Mette-Marit kishte kaluar katër ditë në rezidencën e Epstein në Palm Beach, Miami, në janar të vitit 2013. Në një email nga llogaria e saj zyrtare, ajo e pyeste Epsteinin nëse ishte e përshtatshme që një nënë t’i sugjeronte djalit të saj imazhe me gra të zhveshura që mbanin një dërrasë surfi, për t’i përdorur si letër-muri.

Toni i ngrohtë i këtyre shkëmbimeve ka tronditur opinionin publik norvegjez, veçanërisht pasi disa mesazhe sugjerojnë se princesha ishte në dijeni të dënimit të Epstein me burg në vitin 2008.

Familja mbretërore norvegjeze është përfshirë në disa polemika kohët e fundit, përfshirë edhe martesën e Princeshës Märtha Louise, motrës së Princit të Kurorës, me një shaman amerikan të vetëshpallur.

Ndërkohë që vendi përgatitet për fillimin e gjyqit të Marius Borg Høiby, po shtrohen pyetje serioze mbi dështimin e nënës së tij për të kuptuar natyrën problematike të ruajtjes së kontakteve me Epstein, si dhe mbi rolin e këshilltarëve të saj.

Princesha Mette-Marit vuan nga fibroza pulmonare dhe mjekët po përgatisin përfshirjen e saj në listën e kandidatëve për transplant të mushkërive.

Djali i saj 29-vjeçar, i cili nuk është anëtar i familjes mbretërore, mohon akuzat më të rënda. Një nga akuzat për përdhunim lidhet me marrëdhënie seksuale ndërsa një grua ishte në gjumë, ndërsa tre raste të tjera përfshijnë sulme seksuale ndaj grave të paafta për t’u mbrojtur — veprime që sipas ligjit norvegjez klasifikohen gjithashtu si përdhunim. Nëse shpallet fajtor, ai rrezikon të paktën 10 vjet burg.

Asnjë anëtar i familjes mbretërore nuk do të marrë pjesë në gjyqin që nis të martën në Gjykatën e Distriktit të Oslos. Megjithatë, javën e kaluar, Princi i Kurorës Haakon deklaroi me emocion para gazetarëve:
“Mendimet tona janë me të gjithë ata që janë prekur nga ky rast. E kuptojmë se kjo është një kohë e vështirë dhe ju shprehim ngushëllimet tona.”

Ai shtoi se, ndonëse djali i tij i adoptuar nuk është pjesë zyrtare e familjes mbretërore, “ne kujdesemi për të dhe ai është një anëtar i rëndësishëm i familjes sonë”.