Nga Ervin Salianji

Kënd nga qelia nr.6

Për Shqipërinë në BE.

Lajmet e mira, pak më vonë se të këqijat, sidoqoftë mbërrijnë dhe në qelitë e të burgosurve politikë. Kështu lajmi mbi avancimin  e Shqipërisë në marrëdhëniet me BE-në, një hap më shumë drejt Brukselit, është  pozitiv,  në gjithë atmosferën mbytëse në Shqipëri e pavarësisht se autokrati e ka hapur shampanjën e fitores së gënjeshtërt edhe 8 herë të tjera vitet e shkuara. Mundet që ndokush nuk e përjeton të tillë, sepse ndërsa duket se këtu po bëhen hapa pas, kur janë vënë në dyshim parime dhe vlera, liri e të drejta që u arritën para 34 viteve me rrëzimin e regjimit komunist, edhe kur shihet se sundimi i qeverisë dhe kontrolli i institucioneve nga një dorë është fakt dhe shfaqet në gjithë përmasat e tij si e kundërta e Europës, hapen negociatat. E pra sërish e gjithmonë zgjidhja e vetme është; më shumë Europë.

Ka idealistë që me të drejtë shqetësohen me paradoksin se si disa zyrtarë të Brukselit mbështesin autokratin e korruptuar. Por, serish e ne çdo rast, më shumë Europë, është melhemi për plagën tonë. Sa më afër BE-së, aq më i madh ekspozimi i qeverisjes së keqe, aq më e dukshme fotografia e realitetit të demokracisë nën thundër në Tiranë.

Ai ka për t’i marrë nderet e rastit, fotot dhe lëvdatat.

Janë thjesht kortezia e protokollit.

Është shoqëria, shqiptarët, që në fakt i kanë të gjitha meritat.

Nuk besoj të ketë një vend të rajonit tonë, ku qytetarët me vokacionin dhe aspiratat, vlerat e parimet ku qëndrojnë, të kenë shkuar shumë më përpara shumë më herët drejt Perëndimit, se sa udhëheqësit e tyre.

Të gjitha ngjarjet tregojnë madje se rilindja ka qenë pengesë, e pengesë serioze në rrugën e integrimit. Sfidat më të vështira që ka hasur dhe përballet edhe sot vendi ynë, janë korrupsioni dhe krimi e lidhjet e tij me politikën. Nëse dikush bën pyetjen se kush është burimi më i madh për këto dy fenomene, çdokush do të drejtojë menjëherë gishtin nga qeveria.

Po nëse qëndrojmë në këtë terren, në këtë argument, është dikush që sot duhet falenderuar për kontributin në këtë drejtim. Është Opozita, Partia Demokratike, dhe kjo duhet thënë pa droje, pa asnjë kompleks. Në këtë sens, ne kemi bërë më shumë se qeveria për integrimin. Aferat më të mëdha korruptive sot, të cilat shënohen si rekorde të luftës që po i bën drejtësia, janë zbuluar dhe janë denoncuar, madje edhe referuar nga Opozita. Në asnjë rast të vetëm qeveria nuk ka prodhuar një kontroll, një audit, ku të ketë gjetur shkelje e të jetë “vetëkorrigjuar”

Edi Rama reagon gjithnjë pas vaktit, dhe hajdutëritë e mëdha e ka zakon t’i emërtojë si gjëra të vogla, si fruta. Kush më shumë se sa ne, se sa Opozita ka luftuar me krimin, me bandat, me grupet e rrezikshme mafioze të lidhura me qeverinë.

Një betejë pa ndalim dhe jo me pak kosto, jo me pak sakrifica. Një sakrificë është dhe këndi nga ku po shkruhet ky shënim, me laps e me letër. Ky pozicionim nuk ishte një spontanitet, një produkt rrethanash, aspak. Por, një zgjedhje, një vlerë që u mbajt në mënyrë konsistente, pa hezitim, në 12 vite. Skena publike dhe politike sot është më e pastër prej angazhimit pa kompromis të demokratëve. Me denoncime me emra me fakte, ja dolëm që shumë të inkriminuar dhe banditë të ktheheshin atje ku e kishin vendin. Cila ishte zgjedhja e qeverisë dhe e kryeministrit në këtë rast? Të gjithë e panë së fundmi, listën e deputetëve të Durrësit. Si qe bërë përzierja, si qenë vendosur emrat, dhe kush kishte lobuar për vendet e sigurta. Me firmën e kryetarit të PS, krimi i organizuar ja ka dalë të dërgojë njerëzit në sallën më të lartë kushtetuese, aty ku bëhen ligjet e vendit. Nga kjo pikëpamje, është Opozita, janë demokratët që kanë gjakuar për Europën. Janë qytetarët që kanë dhënë mundin e punën e tyre. Është shoqëria që ka kulturalisht busullën kah perëndimi. Është dhe qeveria që ka ngritur çdo herë pengesa.

Rezultati? Kemi nisur bisedimet, por 12 vite me vonesë. E sot pas 12 vitesh despoti është vlera më antieuropiane që ka Shqipëria. sn

Hetimi ndaj ish-presidentit të Shqipërisë, Ilir Meta, i cili u arrestua më 21 tetor nën akuzat për korrupsion, nisi pas një kallëzimi të ngritur në vitin 2018 nga Romeo Kara, jurist pranë institucionit Operatori i Shpërndarjes së Energjisë.

Kallëzimin, atëkohë, e mori në dorë Prokuroria e Krimeve të Rënda, e cila më vonë, për shkak të reformës në drejtësi, u shkri.

Me krijimin e Strukturës së Posaçme Kundër Korrupsionit dhe Krimit të Organizuar (SPAK) në vitin 2019, dosja i kaloi asaj.

Në atë kallëzim pretendohej për akte korruptive nga ana e Metës, derisa mbante postin e ministrit të Jashtëm, e më pas të Ekonomisë, mes viteve 2009-2013.

Si president shteti, Meta shërbeu nga korriku i vitit 2017 deri në korrik të vitit 2022.

Kara bëri kallëzim jo vetëm ndaj Metës, por edhe Sali Berishës si kryeministër i asaj kohe.

Ndaj Metës, ndërkohë, u ngritën edhe dy kallëzime të tjera.

Më 10 qershor të vitit 2022, ishte ish-deputeti Halit Valteri që ngriti kallëzim kundër tij në SPAK me pretendimin se në kohën që drejtonte partinë Lëvizja Socialiste për Integrim, kishte firmosur kontrata lobimi me kompani në Shtetet e Bashkuara të Amerikës, duke shpenzuar shuma të konsiderueshme parash, disa prej të cilave nuk janë deklaruar.

Po në qershor të vitit 2022, SPAK-u i regjistroi të dyja kallëzimet në një të vetëm.

Në shtator të po atij viti, në dyert e SPAK-ut mbërriti edhe një tjetër kallëzim ndaj Metës dhe bashkëshortes së tij, Monika Kryemadhi.

Avokati Idajet Beqiri pretendonte se çifti Meta kishte shpenzuar shuma të mëdha parash për shërbime mjekësore dhe të kirurgjisë estetike, që nuk justifikoheshin me të ardhurat e tyre, duke ngritur kështu dyshime për mosdeklarim të të ardhurave dhe për burime financimi me origjinë korruptive.

Afera CEZ-DIA

Në mars të vitit 2009, Shqipëria lidhi kontratë me Qeverinë e atëhershme çeke, që 76% e aksioneve të Operatorit të Shpërndarjes së Energjisë t’i kalonin kompanisë çeke, CEZ.

Opozita e asaj kohe, me në krye Partinë Socialiste, e kundërshtoi, duke akuzuar Qeverinë se veproi në mënyrë klienteliste.

CEZ-i hasi në vështirësi për mbledhjen e detyrimeve si nga abonentët familjarë, ashtu edhe nga institucionet shtetërore.

Për këtë arsye u kërkua lidhja e një kontrate me një kompani që do ta ndihmonte CEZ-in t’i mblidhte borxhet.

Kontrata u lidh në shtator të vitit 2010 me kompaninë DIA.

Kjo kompani rezultoi të ishte regjistruar në korrik të vitit 2010 në Ishujt Virxhinia, me një kapital prej 50 mijë dollarësh.

Drejtues të saj ishin dy shtetas shqiptarë, njëri prej të cilëve Kastriot Ismailaj.

Rreth një muaj më vonë, kompania hapi degën e saj në Shqipëri për “investime financiare, mbledhje detyrimesh, konsulta në fushën e energjetikës” etj.

Më 1 shtator, pastaj, u firmos marrëveshja me CEZ-in për mbledhjen e detyrimeve të papaguara, edhe pse, sipas SPAK-ut, “nuk kishte asnjë përvojë në këtë fushë”.

Marrëveshja u kundërshtua nga Bordi Mbikëqyrës i CEZ-it dhe nuk u miratua prej tij.

Megjithatë, pak ditë më vonë, DIA përfitoi dy pagesa në vlerën e një milion eurove. Në muajin shkurt të një viti më vonë u firmos e njëjta marrëveshje e refuzuar më herët dhe në tetor të vitit 2011 marrëveshja u zgjidh.

Gjatë kësaj kohe rezulton se janë kryer dhjetëra transaksione bankare dhe kompania DIA ka përfituar rreth 649 miliardë lekë – apo rreth 6.4 milionë euro – me ndihmën e dy shtetasve çekë, që ishin pjesë e bordit mbikëqyrës të CEZ-it, duke i shkaktuar dëm shtetit, që zotëronte 24% të aksioneve.

Për aferën e njohur si CEZ-DIA ka pasur një kallëzim në vitin 2014, ndaj Kastriot Ismailajt, që u arrestua një vit më pas dhe në vitin 2018 u dënua me 11 vjet burg. Pasi kreu dënimin vitin e kaluar, ai u lirua.

SPAK-u, gjatë hetimeve, zbuloi se Meta ka pasur njohje të hershme me Ismailajn dhe se ka qenë ndikimi i tij si ministër i Jashtëm e më pas si ministër i Ekonomisë që ka çuar në nënshkrimin e marrëveshjes.

SPAK-u thotë se këtë e ka konfirmuar edhe shtetasi çek, Jozef Hejsek, ish-shef ekzekutiv i CEZ-it, në Gjykatën e Arbitrazhit në Vjenë.

Sipas SPAK-ut, Meta ka marrë përfitime në shuma të konsiderueshme nga Ismailaj, përmes kësaj afere.

CEZ-it, pas tre vjetësh qëndrimi në Shqipëri, iu hoq licenca dhe kompania çeke e çoi çështjen në Arbitrazh, ku kërkoi 200 mijë euro dëmshpërblim.

Pas ardhjes në pushtet të socialistëve në Shqipëri, çështja u zgjodh me negociata. CEZ u tërhoq dhe u ra dakord që shteti shqiptar t’i paguante palës çeke një vlerë prej 87.1 milionë eurosh.

Kontratat e lobimit të LSI-së në SHBA

Më 10 qershor të vitit 2022, SPAK-u regjistroi një tjetër procedim penal ndaj Metës, pas kallëzimit të bërë nga ish-deputeti Halit Valteri.

Sipas tij, Lëvizja Socialiste për Integrim, siç quhej atëkohë Partia e Lirisë e drejtuar nga Meta, kishte firmosur kontrata lobimi në shkurt të vitit 2016 me kompani në SHBA, duke shpenzuar shuma të konsiderueshme parash, por duke mos i deklaruar ato.

Në kallëzim ngrihen dyshime për “korrupsion dhe pastrim parash” nga Meta dhe bashkëshortja e tij, Monika Kryemadhi.

SPAK-u thekson se bëhet fjalë për një faturë prej 690 mijë dollarësh, të padeklaruar as në Komisionin Qendror të Zgjedhjeve dhe as pranë Inspektoratit të Deklarimit të Pasurive.

Hetime mbi pasurinë e çiftit Meta

Në shtator të vitit 2022 ishte avokati Idajet Beqiri, i cili ngriti kallëzim penal në SPAK kundër çiftit Meta-Kryemadhi për “korrupsion, pastrim parash, mosdeklarim dhe fshehje të të ardhurave”, bazuar në të dhënat që ka siguruar, se gjatë viteve 2014-2022, ata kanë shpenzuar shuma të mëdha parash për shërbime mjekësore dhe të kirurgjisë estetike, me qëllim humbjen në peshë dhe ndryshimin e pamjes së jashtme.

Për këto kallëzime, SPAK-u ka hetuar edhe lidhjet korruptive të çiftit Meta me një biznesmen shqiptaro-amerikan, Adrian Shatku.

Falë ndikimit dhe ndërhyrjes së çiftit Meta, ai ka përfituar lejen për shtrimin e fibrave optike të internetit dhe ka dhënë me qira këtë shërbim.

Më pas, ai ka përfituar edhe një marrëveshje interkonjeksioni të transferimit të thirrjeve telefonike ndërkombëtare.

Hetimet e SPAK-ut kanë zbuluar se Meta dhe Kryemadhi kanë marrë pjesën e tyre të fitimit nga këto dy kontrata. Sipas SPAK-ut, përitimet lidhen me karta krediti të dhuruara, pagesa për shkollim të fëmijëve etj.

Në qershor të këtij viti, Meta u thirr në Prokurorinë e Posaçme dhe kur doli, deklaroi se “u thirr për gjëra të kota, u pyet për pasurinë, me të cilën në mirëbesim është marrë Monika”.

Në mars të këtij viti, ai dorëzoi në gjykatë kërkesë për divorc nga Kryemadhi.

Që prej fillimit të këtij viti, Meta nuk i ka ndalur sulmet verbale ndaj kreut të SPAK-ut, Altin Dumani, dhe prokurorëve të tjerë.

Kjo ka sjellë edhe reagimin e ndërkombëtarëve. Bashkimi Evropian dhe Shtetet e Bashkuara i kanë cilësuar si “të papranueshme” deklaratat e tij.

Karriera politike e Metës

Ilir Meta u bë zëvendëskryeministër i Shqipërisë në vitin 1998. Një vit më vonë mori postin e kryeministrit dhe më 2002 u bë ministër i Jashtëm, si përfaqësues i Partisë Socialiste.

Pas shkëputjes nga kjo parti, Meta krijoi një parti të re, të quajtur Lëvizja Socialiste për Integrim në vitin 2004.

Pavarësisht këtij fakti, ai bashkëpunoi me socialistët në zgjedhjet për pushtetin vendor në vitin 2007, kur dolën me kandidatë të përbashkët.

Një vit më vonë, ai e kundërshtoi reformën elektorale, që ishte hartuar në bashkëpunim mes Sali Berishës dhe Edi Ramës, kryeministrit aktual të Shqipërisë.

Meta hyri në grevë urie, në përpjekje për ta bllokuar miratimin e kësaj reforme.

Në zgjedhjet e vitit 2009, Meta kaloi në krahun e djathtë, duke bërë aleancë me Berishën.

Më 2010, ish-bashkëpunëtori i tij, Dritan Prifti, publikoi një video të Metës, duke folur për shifra të mëdha parash, korrupsion dhe ushtrim të ndikimit në sistemin e drejtësisë.

Më 21 janar të vitit 2011, Partia Socialiste, bazuar në këtë video dhe zemërimin që kishte shkaktuar ajo te qytetarët, doli në protestë. Në atë ngjarje që u bë e dhunshme, u vranë katër qytetarë.

Pavarësisht akuzave të ashpra në drejtim të njëri-tjetrit, Meta bëri aleancë më Ramën para zgjedhjeve parlamentare të vitit 2013.

Nga këto zgjedhje, partia e Metës doli me 16 deputetë.

Partia Socialiste dhe Lëvizja Socialiste për Integrim garuan së bashku në zgjedhjet për pushtetin vendor të vitit 2015.

Meta dhe Rama u ndanë në vitin 2017, kur Partia Socialiste e Ramës kërkoi që ta kishte e vetme “timonin e qeverisjes”.

Megjithatë, pas zgjedhjeve, Partia Socialiste i ofroi Metës mandatin e presidentit të Republikës së Shqipërisë.

Pasi mbaroi mandatin si president më 2022, ai mori drejtimin e Lëvizjes Socialiste për Integrim, që deri atëherë mbahej nga bashkëshortja e tij, Monika Kryemadhi.

Ai akuzoi disa prej bashkëpunëtorëve të tij se kishin punuar kundër kësaj partie, së cilës ia ndryshoi emrin në Partia e Lirisë.

Gjatë karrierës së tij politike, Meta shërbeu edhe si kryetar Kuvendi.

Meta u arrestua më 21 tetor. Ai u nxor me forcë nga automjeti i tij ndërsa udhëtonte drejt selisë së partisë së tij në Tiranë, ku kishte njoftuar se do të mbante një konferencë për mediat.

Partia e Lirisë dhe Monika Kryemadhi thanë se arrestimi i ngjante një “arrestimi banditesk”, ndërsa ministri i Brendshëm, Ervin Hoxha, deklaroi se përdorimi i forcës ishte i pashmangshëm, pasi Meta refuzoi t’i bindej policisë dhe lëshoi fjalë fyese ndaj punonjësve të policisë.

Prokuroria e Posaçme e akuzon ish-presidentin e Shqipërisë për “korrupsion, pastrim parash dhe fshehje të pasurisë”.

Më 23 tetor, Meta doli para gjykatës, e cila la në fuqi masën e arrestit “burg pa afat” deri në fund të hetimeve që vijojnë ndaj tij.

Meta i konsideroi akuzat si politike dhe të urdhëruara nga kryeministri Edi Rama. Të njëjtën gjë deklaroi edhe bashkëshortja e tij, Monika Kryemadhi. REL

Gazeta e njohur gjermane “Frankfurter Allgemeine Zeitung” i ka kushtuar një shkrim të plotë arrestimit të ish-Presidentit Ilir Meta në Shqipëri. Në shkrimin e gazetarit Matthias Rüb thuhet se BE e konsideron si një problem madhor korrupsionin në Shqipëri, por dyshimet janë hedhur se gjyqësori po heton vetëm kundërshtarët e kryeministrit Edi Rama. Në shkrim, proceset e ngritura ndaj Sali Berishës dhe Ilir Metës shihen si procese me ngjyrime politike. Më poshtë shkrimi i plotë.

Drejtësia ngre çështje ndaj liderëve të opozitës

Presidentja e Komisionit të BE-së, Ursula von der Leyen po udhëton aktualisht nëpër vendet e Ballkanit Perëndimor. Ndalesa e parë ishte Tirana, ku ajo u takua me kryeministrin Edi Rama. Ndalesat e mëtejshme përfshijnë Maqedoninë e Veriut, Bosnje – Hercegovinën, Serbinë, Kosovën dhe në fund Malin e Zi. Në një konferencë për shtyp me Ramën, von der Leyen nuk pranoi të japë një vit për anëtarësimin e Shqipërisë në BE.

Duke pasur parasysh kërkesat e shumta për reforma, është “e arsyeshme të mos kemi një datë të caktuar”. Nga ana tjetër, mikpritësi Rama nuk u tërhoq nga synimi për t’u anëtarësuar në BE deri në vitin 2030. Edhe pse vendi i tij ka ende “shumë male për të ngjitur drejt anëtarësimit”, Rama siguroi se unioni mund të arrihet “deri në fund të dekadës”.

Teksa von der Leyen dhe Rama flisnin në Tiranë, diplomatët e BE-së dhe Shqipërisë hapën kapitullin e parë të negociatave të anëtarësimit në një konferencë në Luksemburg. Vendi ka qenë zyrtarisht kandidat për anëtarësim në BE që nga viti 2014. Tirana kishte paraqitur kërkesën e saj për anëtarësim 5 vjet më parë.

Në Luksemburg u tha se gjatë negociatave, diplomatët do të diskutonin “themelet” e anëtarësimit: se si vendi mund të bëjë përparim në respektimin e të drejtave të njeriut, në konsolidimin e shtetit të së drejtës dhe institucioneve demokratike dhe, në veçanti, në luftën kundër korrupsionit.

Një ditë para mbërritjes së von der Leyen, me urdhër të Prokurorisë Shqiptare Kundër Korrupsionit (SPAK), ish-ministri, ish-kreu i qeverisë dhe ish-presidenti Ilir Meta u arrestua me akuzat për ryshfet, pastrim parash dhe fshehje pasurie. Ish-bashkëshortja e Metës, Monika Kryemadhi, u vendos në arrest shtëpie nga SPAK për akuza të ngjashme. Kryemadhi përfaqësoi bashkëshortin e saj si kryetare e Partisë së Lirisë së majtë-liberale gjatë mandatit të Metës si president nga 2017 deri në 2022. Meta dhe Kryemadhi hodhën poshtë akuzat dhe e shohin veten si viktima të persekutimit politik nga SPAK, të cilin Rama e shfrytëzon në luftën kundër kundërshtarëve.

Hetime me ngjyrime politike

Që prej fillimit të vitit, ish-kreu i qeverisë dhe kryetari i Partisë Demokratike Konservatore (PD) Sali Berisha ndodhet në arrest shtëpie me urdhër të SPAK-ut për akuza për korrupsion. Pas arrestimit të Metës, Berisha tha në një konferencë për shtyp nga shtëpia e tij se përndjekja e Ilir Metës ishte po aq e motivuar politikisht sa edhe veprimet e SPAK-ut ndaj tij. Berisha ishte presidenti i parë i Shqipërisë i zgjedhur lirisht pas përfundimit të komunizmit. Ai ka drejtuar efektivisht PD-në në mënyrë të vazhdueshme që nga viti 1990 dhe ka qenë gjithashtu lider i opozitës në parlament deri në heqjen e imunitetit të tij si deputet në dhjetor 2023. Ilir Meta e filloi karrierën e tij politike me Partinë Socialiste (PS), e cila drejtohet nga Edi Rama që nga viti 2005, organizata pasardhëse e ish-Partisë së Punës Komuniste. Meta themeloi partinë e tij, në vitin 2004 pas një mosmarrëveshjeje me PS.

Në vitet që pasuan, partia e Metës si forca e tretë më e fortë politike në Shqipëri, hyri në koalicion si me PD-në ashtu edhe me PS-në. Fakti që krerët e dy partive kryesore opozitare – armiku i trashëguar politik i Ramës, Berisha dhe ish-aleati i tij, Meta, i cili është kthyer në një armik kryesor – janë në paraburgim për akuzat e korrupsionit, u jep veprimeve të SPAK-ut një ngjyrim politik. Berisha dhe Meta kritikuan ashpër edhe ngritjen e qendrave italiane të pritjes dhe dëbimit për emigrantët në veri të Shqipërisë, për të cilën Rama ra dakord me kryeministren italiane Giorgia Meloni në nëntor.

Në Tiranë, Von der Leyen nuk pranoi të komentojë mosmarrëveshjet e brendshme politike në Shqipëri si dhe për kampet italiane. Përpara samitit të BE-së për migracionin, javën e kaluar, kryetarja e Komisionit i përshkroi kampet e pritjes dhe dëbimit jashtë BE-së, në një vend kandidat si Shqipëria, si një model të mundshëm. Evropianët duhet të “zhvillojnë shtigje të mundshme në lidhje me qendrat e kthimit jashtë BE-së” dhe falë marrëveshjes midis Romës dhe Tiranës, “mund të nxirren mësime nga kjo përvojë në praktikë,” shkroi von der Leyen në një letër drejtuar krerëve të shteteve dhe qeverive.

Për çështjen kyçe politike të trajtimit të migracionit të paligjshëm në BE, Meloni, Rama dhe von der Leyen përfaqësojnë pozicione të ngjashme, pavarësisht nga përkatësia e tyre në familje të ndryshme partiake. Në raportin e tij vjetor të progresit për vendet kandidate drejt anëtarësimit në BE, Komisioni tha në nëntor se korrupsioni në Shqipëri mbeti “një shkak për shqetësim serioz, pavarësisht disa përparimeve dhe përpjekjeve të vazhdueshme për ta luftuar atë”.

Zyrtarët e BE-së në Bruksel pranojnë privatisht se korrupsioni ekziston në të gjitha fushat dhe është i gjithëpranishëm në jetën publike si dhe është sfida më e madhe për afrimin e Shqipërisë me BE-në dhe integrimin e vendit. Në vlerësimin vjetor të Departamentit Amerikan të Shtetit për situatën në shtetin anëtar të NATO-s, në raportin për vitin 2023 thuhet se “korrupsioni ekziston në të gjitha degët dhe në të gjitha nivelet e qeverisjes”. Qeveria në Shqipëri drejtohet nga Edi Rama dhe PS-ja e tij që nga viti 2013, në shumicën e rasteve pa një partner koalicioni./ Lapsi.al/

E përjavshmja më e madhe franceze me prirje të qendrës së majtë, Le Nouvel Obs ka publikuar një artikull shumë të gjatë për atë që e quan si mafiokracia shqiptare. Në shkrimin analizë nga e dërguara speciale Marie Vaton e cila ka pasur si synim të përshkruajë krijimin e një kampi të ri për mbajtjen e emigrantëve në Shqipëri, si pjesë e një marrëveshjeje midis Italisë dhe Shqipërisë.

Artikulli thekson se ky projekt ka ngjallur shqetësime ndërkombëtare, sidomos nga Këshilli i Evropës dhe Komisioneri i Lartë i OKB-së për Refugjatët. Megjithatë, Meloni mbron planin e saj si një qasje e guximshme dhe e re për menaxhimin e migracionit, duke tërhequr vëmendjen e disa vendeve të tjera evropiane.

Në shkrim përshkruhen edhe ata zyrtarë shqiptarë që janë pro projektit Rama Meloni si dhe bëhet një historik i kësaj ideje të finalizuar në nëntor 2023.

Nga Marie Vaton, ‘Le nouvel Obs’

Besmira Lekaj nuk është raciste. Megjithatë, në Lezhë, kjo aktiviste 39-vjeçare është përpjekur të bashkojë njerëzit kundër ‘këtyre burgjeve për emigrantët të negociuara në fshehtësi’. Por, përveç një proteste të shkurtër prej disa orësh, e cila u ndalua menjëherë nga bashkia, lëvizja e rezistencës nuk pati sukses. ‘Në dhjetë vite, pushteti ka shuar opozitën, ka mbytur shoqërinë civile. Nepotizmi po gërryen të gjitha partitë. E djathta, e majta, asgjë nuk ka më kuptim’, ankohet ajo në selinë e organizatës së saj, ‘Dorë më dorë kundër apatisë kombëtare’.

Pas më shumë se dyzet vitesh totalitarizëm, Shqipëria duket se ka rrëshqitur në një diktaturë tjetër: një ‘mafiokraci’, e gërryer nga oligarkët, krimi i organizuar dhe mediat që janë në shërbim të tyre. Formula është e shkrimtarit Fatos Lubonja, sipas të cilit ky marrëveshje është një pjesë tjetër e ‘platformës gjigante të mbeturinave’ që është bërë vendi i tij, i ‘shitur për interesat e Shteteve të Bashkuara dhe Italisë’. Dissidenti politik, i burgosur për afro njëzet vite në burgjet e regjimit të Enver Hoxhës, e njeh shumë mirë kryeministrin Edi Rama, i cili ishte një nga redaktorët e revistës së tij ‘Përpjekja’ në vitet 1990: ‘E kam parë të ndryshojë dhe të krijojë një personazh për të kënaqur Perëndimorët.’

Nga njëra anë, ai është një ikonoklast i gjithanshëm, njëkohësisht artist – ka studiuar në Beaux-Arts në Paris – intelektual, basketbollist profesionist, fytyra kozmopolite 2.0 e Shqipërisë, rinovuesi dhe stabilizuesi i Ballkanit, ai që i premton Antony Blinken-it, sekretarit të Shtetit Amerikan, një vend të pastër, të liruar nga krimi dhe paraja e pistë. Nga ana tjetër, ai është klientelist, mik i Melonit, Trumpit dhe Erdoganit, që di të bëjë të harrohen lidhjet e tij me Camorrën italiane. Kur i kujtohet lista e të afërmve të tij të akuzuar për korrupsion ose trafik droge, duke filluar me ish-ministrin e tij të Brendshëm të dënuar në 2022, Edi Rama përgjigjet se ‘ka derra në çdo pyll’.

Megjithatë, derrat trajtohen mirë: ata banojnë në burgje VIP, me kuzhinë personale dhe palestër. Njëmbëdhjetë vjet pas ardhjes së Edi Ramës në pushtet, Shqipëria është ende një nga vendet më të korruptuara në Evropë, sipas OJQ-së Transparency International.

Një narco-shtet që po zbrazet nga popullsia e tij: që nga rënia e regjimit totalitar në 1991, afërsisht një milion shqiptarë, ose një e treta e popullsisë, kanë ikur nga papunësia dhe paga mesatare prej 750 eurosh. Ata që mbeten, shohin vendin e tyre duke u shitur për ofertat më të larta: Edi Rama sapo i ka dhënë Jared Kushner-it, dhëndrit të Donald Trump-it, një koncesion mbi ishullin e Sazanit,  për ta shndërruar atë në një kompleks për milionerët, me vila luksoze dhe pishina. Dhe kjo nuk është e gjitha: në 2020, ai gjithashtu dha koncesionin e portit të Durrësit grupit Emaar, me qendër në Emiratet e Bashkuara Arabe, për të ndërtuar aty një marinë prej 2 miliardë eurosh.

‘Kështu është me Ramën: ai vepron dhe mendon si një pronar me Shqipërinë’, thotë me trishtim Migen Qiraxhi, një aktivist i grupit të opozitës qytetare Civic Resistance në Tiranë. Në kryeqytet, kullat nuk ndalen së ndërtuari dhe çmimet e pasurive të paluajtshme po rriten: ‘Sot, një apartament në Tiranë kushton më shumë se në Mynih, Romë ose Londër’, konstaton arkitekti 37-vjeçar.

Kulla kryesisht të pabanuara, të përdorura kryesisht për pastrim parash nga krimi dhe korrupsioni, sipas disa mediave investigative… Kjo duket se nuk shqetëson Edi Ramën. Për të kënaqur Giorgia Melonin, kryeministri shqiptar shumon përkuljet dhe gjestet qesharake. Kështu, pranë portit të Shëngjinit -dhe burgut të tij për emigrantët- ai përuroi në gusht ‘Tratoria Meloni’, një restorant me prodhime deti paksa të veçantë, pasi është i mbuluar tërësisht me portrete të lideres italiane.

Nëpër mure, ajo shfaqet në të gjitha moshat dhe në të gjitha pozicionet e jetës së saj, në një homazh Warholian shumë kitsch.

/‘Le nouvel Obs’-Përshtati: Lapsi.al

Rrjeti më i madh televiziv në Amerikë, FOX NEWS, raporton se kryeministri Edi Rama po përdor drejtësinë e korruptuar për të goditur opozitën. Sipas këtij rrjeti, Edi Rama është një autokrat që e përdor drejtësinë e korruptuar dhe policinë si armë

Nga Chris Massaro, FOX NEWS

Ish-presidenti shqiptar Ilir Meta u arrestua të martën në kryeqytetin e Tiranës me akuzat e dyshuara për pastrim parash dhe korrupsion, si dhe fshehje të të ardhurave personale pas një vizite në Kosovë.

Policia e Shtetit me maska ​​të zeza ndaloi papritur makinën e tij dhe arrestoi Metën, raportojnë mediat lokale. Policia pretendoi se nuk kishin zgjidhje tjetër veçse të përdornin forcën, sipas Reuters.

Struktura e Posaçme e Shqipërisë Kundër Korrupsionit dhe Krimit të Organizuar tha në një deklaratë se arrestimi i Metës erdhi pas një hetimi pesëvjeçar, sipas Associated Press.

Jam i sigurt në fitoren e kauzave tona kombëtare dhe demokratike! Armiqtë e kombit dhe demokracisë do ta humbasin buzëqeshjen nga fytyra. Rrëmbimi im sot, në mënyrën më banditeske, tregon panikun e regjimit diktatorial kur përballet me të vërtetën,” tha Meta në një deklaratë në X pak pas arrestimit të tij.

Ballkani, një rajon i paqëndrueshëm në Evropë me ndarje të gjata etnike, ka një histori të paqëndrueshmërisë politike. Ekziston frika se arrestimi i një ish-lideri popullor mund të rrisë tensionet përpara zgjedhjeve në vitin 2025.

Opozita shqiptare akuzoi kryeministrin Edi Rama për politizimin e gjyqësorit dhe forcave të rendit për të sulmuar kundërshtarët e tij politikë.

Disa vëzhgues të vjetër të rajonit gjithashtu shprehën shqetësim për zhvillimet e fundit.

“Arrestimi i ish-presidentit të Shqipërisë tregon se qeverisja e kryeministrit aktual të Shqipërisë, Edi Rama, po merr gjithnjë e më shumë një prirje autoritare. Pa dashur të paragjykoj vendimin e gjykatës, akuzat dhe momenti i arrestimit janë të dyshimta dhe mund të tregojnë se Rama po përdor forcat e rendit për të goditur kundërshtarët e tij politikë,” tha një burim diplomatik i rangut të lartë me njohuri të thella të rajonit për Fox Neës Digital.

Agim Nesho, ish-ambasadori shqiptar në SHBA dhe OKB, i tha Fox News Digital se arrestimi i Metës nga autoritetet e bën qëllimin e qartë. “Ishte një akt spektakolar politik, me dhjetëra persona të armatosur që arrestuan ish-presidentin me forcë në mes të ditës në një rrugë të mbushur me njerëz, ndërsa njerëzit po filmonin me telefonat e tyre,” tha Nesho. Ai gjithashtu tha se akuzat kundër liderëve të opozitës janë të vogla në krahasim me atë që e quajti vjedhje sistematike të orkestruar nga qeveria aktuale.

“Kryeministri aktual është lideri më i korruptuar në historinë moderne të Shqipërisë. Media ndërkombëtare raporton rregullisht se ai kërcënon drejtpërdrejt gazetarët e huaj që hetojnë veprimtaritë e tij dhe drejton një parti politike dhe një qeveri anëtarët e së cilës akuzohen për miliarda dollarë korrupsion.”

Meta ishte president nga viti 2017 deri në 2022, ishte aleat me kryeministrin aktual Rama dhe Partinë Socialiste në pushtet, dhe tani drejton opozitën dhe Partinë e Lirisë. Dikur aleatë, Meta dhe Rama tani janë rivalë të ashpër politikë. Meta është një kritik i shpeshtë i Ramës dhe pretendon se qeveria aktuale po bëhet gjithnjë e më shumë e korruptuar dhe autoritare.

Korrupsioni, veçanërisht në gjyqësor, është i përhapur në Shqipëri dhe gjykatat janë shpesh nën presion dhe ndikim politik, ndërkohë që procesi i rregullt zbatohet në mënyrë jokonsistente, sipas Freedom House.

Përdorimi i drejtësisë dhe agjencive të rendit, tha burimi diplomatik nga Ballkani, është pjesë e një modeli më të gjerë në rajon. Liderët autoritarë të Ballkanit, veçanërisht presidenti serb Aleksandar Vuçiç dhe kryeministri Rama, po mbajnë marrëdhënie të mira me Perëndimin me premtime për një “të ardhme evropiane” dhe “integrim ekonomik rajonal,” ndërkohë që veprojnë si autoritarë në vend dhe shpesh veprojnë kundër interesave të SHBA dhe Bashkimit Evropian (BE) në rajon, tha diplomati.

Rama është një bashkë-udhëheqës i nismës “Ballkani i Hapur,” një propozim që do të lejonte një lëvizje më të lirë të njerëzve dhe mallrave në të gjithë Ballkanin. Shumë njerëz në Shqipëri dhe në të gjithë Ballkanin e kundërshtojnë këtë nismë për shkak të frikës se ajo është një manovër serbe për të zëvendësuar tregun e përbashkët rajonal të Evropës dhe do të rrezikonte dëshirën e vendeve të Ballkanit për t’u bashkuar me BE.

Fox Neës Digital foli me Metën në maj 2024, dhe ai paralajmëroi për rreziqet e nismës “Ballkani i Hapur,” duke e quajtur atë një “alternativë kundër integrimit evropian.” Ai kishte frikë se ajo do të forconte regjimet hibride si Serbia, që do të minonin zgjedhjet e lira dhe të ndershme, do të eliminonin pluralizmin politik dhe do të synonin mediat dhe lirinë e shprehjes.

Meta nuk është i vetmi figurë politike që u ndalua së fundmi. Një tjetër ish-president dhe ish-kryeministër, si dhe kundërshtar politik i Ramës, Sali Berisha, u akuzua gjithashtu për korrupsion dhe u vendos në arrest shtëpiak.

“Policia Shqiptare (kriminelë me uniformë), duke ndjekur urdhrat e Edi Ramës, rrëmbyen dhe i goditën në kokë në publik ish-presidentin, ish-kryeministrin dhe ish-kryetarin e Kuvendit, Ilir Meta. Unë e dënoj fuqimisht këtë akt monstruoz!,” tha Berisha në një deklaratë në X.

Departamenti i Shtetit i drejtoi Fox News Digital autoriteteve shqiptare për detaje të mëtejshme në lidhje me çështjen. Sidoqoftë, një zëdhënës i tha Fox News Digital se “Shtetet e Bashkuara mbështesin përparimin e Shqipërisë në sundimin e ligjit, duke përfshirë përpjekjet e SPAK për të ndjekur penalisht korrupsionin në nivele të larta dhe krimin e organizuar, në përputhje me ligjin.”

Kërkesat e përsëritura për koment nuk u përgjigjën nga zëdhënësit e kryeministrit shqiptar dhe Ambasada Shqiptare në Washington, D.C. sn