KENGA E GJERGJ ELEZ ALISE 1992- Poezi nga KONSTANDIN DHAMO

February 18, 2026

Kështu të ndodhi në fund

Te jetës tënde materiale,

Zotni Bernardin,

Meshtar e mësues dhe,

Studiues folklori …

.

Në burgun e Diktaturës,

Telat e ndryshkur me gjemba

Në trup t’i spërdridhnin,

Tek të dhunonin e të poshtëronin.

.

Ti, ndërmendje mundimin

E Krishtit në kryq dhe,

Dëlireshe prej dhimbjeve,

Ashtu si edhe kur vetëgjakoseshe

Me grethoren e ritit

Castigo corpus meum…

.

Homazh për ty,zotni Bernardin,

Që të masakroi bajlozi i Diktaturës !

Homazh për ty,

Që solle i pari të shkruar

Këngën e Gjergj Elez Alisë

Në duelin e tij legjendar

Me bajlozin sundues !

.

Udhëtove drejt asaj Kënge,

Bernardin

Dhe u ngjite

Dy mijë metra lart,pranë qiellit

Dhe,pranë Zotit,

Atje,në Nikaj të Tropojës.

.

Dhe gjete Gjergjin

Trimin mbi trimat dhe,

Motrën e tij mbi krye

Si dielli dhe hëna…

.

Çaste ngazëllimi përjetove

Bernardin,sigurisht

Me të nisur udhën ndër pjerrina

Nga vareshin e vareshin ujërat

Tek binin e bumbonin ;

Ujëvarat pra siç quhen kaherë…

.

Më pas ke ndaluar e je freskuar

Me ujin e centë që hidhet

Gur më gur e gurgullon

Ndër gurrat e kristalta ,

Siç quhen kaherë,

Bernardin.

.

Kështu, në Nikaj

Mes shkrepash tempullorë,

Mrekullisht e vërtetë

Tingëllonte kënga e Gjergj Elez Alisë.

.

Nënëtë plagë kishte

Ai trim në trup

Varra varra, Bernardin,

Siç i quan Kënga plagët;

Nëntë varra,

Ç’fjalë që të zymton me dramë,

Me tragjedi ,madje,

E mendjen ta nis

Kah varri i mirëfilltë …

.

Ç’ngazëllim t’u përndez

Martir Bernardini,

Tek dëgjoje shqipen

N’ato maja ,

Shqipen e lashtësisë,

Shqipen e ditës dhe,

Të së nesërmes…

.

Falëminderit,atdhetari Bernardin

Për Këngën që e solle

Edhe për ne, që banojmë

Poshtë…

• twitter

  Follow
• facebook
• linkedin

Fjalë kyçe: Konstandin Dhamo