Në një intervistë për edicionin e pasdites në SYRI TV me moderatorin Edvin Parruca, Nikola Kedhi, anëtar i sekretariatit për marrëdhëniet me jashtë në Partinë Demokratike, komentoi mbi çështjen e pezullimit të fondeve amerikane nga administrata Trump. Sipas tij, ky vendim ka shkaktuar një debat të madh dhe shumë keqkuptime, ndërsa në thelb bëhet fjalë për miliarda dollarë, përdorimi dhe destinacioni i të cilëve mbetet i paqartë.
Kedhi theksoi se shqetësimi kryesor është mungesa e transparencës mbi shpërndarjen e këtyre fondeve, duke sjellë si shembull deklaratat e presidentit Zelensky për mospërputhjen mes shumave të premtuara dhe atyre të marra nga Ukraina. Ai argumentoi se këto fonde janë shpesh keqpërdorur ose janë përdorur për të përkrahur agjenda ideologjike të caktuara, si ato të së majtës ekstreme dhe kulturës woke. Sipas Kedit, presidenti Trump ka kërkuar një auditim të thelluar 90-ditor për të kuptuar se si dhe ku kanë shkuar këto miliarda dollarë.
Ai kritikoi mënyrën se si USAID-i dhe organizata të tjera kanë menaxhuar këto fonde, duke e cilësuar atë si një institucion të mbushur me korrupsion dhe keqmenaxhim. Për më tepër, Kedhi ngriti akuza se USAID-i është përdorur si një mjet nga CIA për të ndikuar në ndryshimet e qeverive në vende të ndryshme të botës. Ai gjithashtu përmendi rolin e George Soros-it në shpërndarjen e këtyre fondeve, duke pohuar se ato nuk janë para të tij personale, por të taksapaguesve amerikanë, të përdorura për të përkrahur agjendat e tij politike.
Kedhi:
Ka një keqkuptim dhe një zhurmë shumë të madhe mbi këtë bllokim që ka bërë presidenti Trump për këto fonde. Çështja është miliarda e miliarda dollarë; për çfarë përdoren, ku shkojnë?
Mjafton të përmendim rastin që ka thënë presidenti Zelensky së fundi, që neve na u premtuan 177 miliardë dollarë dhe na erdhën vetëm 75 apo 77 miliardë. Ku kanë shkuar 100 miliardë të tjera? Dhe si këto raste ka pafund.
Janë miliarda e miliarda dollarë që nuk dihet se ku kanë shkuar, se për çfarë janë përdorur, dhe presidenti Trump ka thënë pikërisht këtë: ne nuk mund të harxhojmë shuma kaq të mëdha parash pa pasur idenë se për çfarë përdoren, se ku shkojnë.
Dhe ky është qëllimi i pezullimit të këtyre fondeve dhe hetimit për periudhën 90-ditore. Natyrisht që ka nevojë për një reformim të kësaj organizate, por edhe në tërësi të administratës amerikane, sepse ka dy arsye kryesore pse është i nevojshëm një pezullim i tillë dhe një auditim i thelluar:
1. Këto fonde janë keqpërdorur.
2. Këto fonde janë përdorur për të çuar përpara agjenda të caktuara ideologjike, si ato të të majtës ekstreme, cancel culture, wokizmit dhe asaj që quhet në mënyrë më të përgjithshme marksizmi kulturor.
Gjë që nuk shkon, sepse nuk janë fonde të një grupi të caktuar të shoqërisë amerikane apo të shoqërive të tjera, por janë fonde që vijnë nga taksapaguesit amerikanë—të gjithë taksapaguesit amerikanë—konservatorë, progresistë, të qendrës, të gjithë qytetarët amerikanë që paguajnë taksa në shtetin amerikan.
Ndaj, sot bëhet e qartë për të gjithë diçka që ka qenë e ditur dhe është thënë nga zëra të ndryshëm dhe nga ekspertë. Ka pasur gjithmonë akuza se USAID-i është një organizatë kriminale—siç e quajti Elon Musk—por edhe nëse nuk shkojmë deri aty, është një çerdhe korrupsioni brenda shtetit amerikan, e keqpërdorur, e keqmenaxhuar dhe e përdorur për të çuar përpara këto ideologji të caktuara.
Dhe kjo nuk është e gjitha. Ka akuza të tjera nga segmente të ndryshme të popullsisë se USAID-i ka shërbyer si një mbulim për CIA-n, për ndryshime qeverish, ndryshime regjimesh apo përmbysje qeverish në vende të ndryshme të botës.
Këto nuk janë fonde të një individi apo të një filantropi të caktuar, që i përdor sipas ideve apo besimeve të tij. Këto janë fonde të qeverisë amerikane, të taksapaguesve amerikanë, dhe nuk janë përdorur për të përcuar vlerat në të cilat beson shumica e qytetarëve amerikanë apo për të forcuar interesat amerikane jashtë Amerikës.
Këto janë përdorur për të çuar përpara besime të caktuara të disa grupimeve në Amerikë ose filialet e tyre nëpër botë. Janë përdorur nga rrjeti Soros, sepse thonë që Soros është filantrop. Por Soros nuk përdor paratë e tij për të bërë filantropi—Soros përdor paratë e taksapaguesve amerikanë për të çuar përpara agjendat e tij, agjendat në të cilat ai beson. Dhe ky është një ndryshim thelbësor.