Ke heshtur si një fije bari- Cikël poetik nga BEDRI ALIMEHMETI

March 6, 2023

PËRKOHSHMËRI

E gjitha kjo

që po ndodh mes nesh,

thjesht është përkoshmëri.

Të pamundur e kemi.

Po, po absolutisht.

Nuk mund të vijojmë më tej,

Në këtë rrugë të trëndafiltë

Tejet të qetë

Por tërësisht të pakuptimtë,

Mbarsur keqas

Në tërësinë e saj

Nga problemet tona,

Që nuk u sosën kurrë.

Edhe pse e re kjo marrëdhënie

Në fund të fundit

Është qetësuese

Në përkoshmërinë e saj.

————-

HESHTJE

Ajo e pamëshirshmja heshtje

Qe shumë e madhe.

Madje e paparë,

Jo e padëgjuar.

Sepse në një heshtje të tillë

Nuk ke se ç’të dëgjosh

Aq më tepër

Kur je i bindur

Që nga një heshtje e kësisojtë

S’duhet të kesh besim.

Aty, në mbretërinë e  saj

Domosdoshmërisht

Duhet të thuhet diçka

Enkas

Për ta thyer e grimëcuar

Atë të padurueshmen heshtje

Që të mos mendoj askush

Se ne janė shterur ndjenjat.

————–

E PËRHUMBUR

“Është i lodhshëm

Apo tejet raskapitës,

Kërkimi i kohës së humbur?”

Më ke pyetur jo një herë

Dhe kur ta kam dhënë

Gjithnjë përgjigjen e duhur

Ti çuditërisht ke heshtur

Si një fije bari.

Jo që s’më ke thënë asgjë

Por ke mbetur e përhumbur.

Nuk e di në cfarë mendimesh

Edhe pse e di mirë

Madje dhe e njeh

Dobësinë time

Që nuk të duroj aspak

Kaq të mbyllur e të largët.

—————

DUHET

Nuk e mohoj

Kurrsesi

Mes nesh ka pas edhe gabime.

Absolutisht.

Nuk ka qenë faji yt.

Zotërues

Them se më shumë se sa ti.

Gjithnjë

Unë kam qenë.

Pangurim

Ti jepeshe e gjitha

Papërmbajtmërisht

Kur bënim dashuri.

Pa as më të voglën frikë

Më falje gjithshka

Pa rezerva.

Oh duhet të shmangesh!

E të zësh vend.

Sa më larg nga ndjenjat.

Atëhere po.

Po.

Shumë herë më e lehtë

Do të jetë marrëdhënia.

————

• twitter

  Follow
• facebook
• linkedin

Fjalë kyçe: Bedri Alimehmeti