Anëtari i kryesisë së Lëvizjes Vetëvendosje Elvis Hoxha ishte sot i ftuar në “Kjo Javë” me Nisida Tufën në News24.
Së pari zoti Hoxha foli në lidhje me protestën e mbajtur pasditen e djeshme në Tiranë në mbështetje te krerëve të UÇK që po gjykohen në Gjykatën Speciale në Hagë, ku vlerësoi se arriti qëllimin e saj.
“Protesta ishte shumë e madhe, e konsideroj protestë të suksesshme. Nuk kam çfarë i shtoj deklaratës së VV. Protesta kreu funksionin e saj aq më mirë që ishte mbarë popullore, mbarë shoqërore, u mbajt në Tiranë, mësim ky i përshpejtuar edhe për çështjet këtu në Tiranë se zakonisht shoqëria e Shqipërisë nuk i njeh mirë problematikat e Kosovës, çka krijon edhe efekte negative, të folura të hapërdara”, tha ai.
Hoxha u shpreh se mosnjohja e saktë e situatave dhe të vërtetave në Kosovë, çon në një perceptim të gabuar nga ana e shoqërisë shqiptare mbi gjithçka që po ndodh me Gykatën Speciale dhe jo vetëm.
Ai u shpreh se Vetëvendosja dhe kryeministri Albin Kurti kanë paralajmëruar që në 2015 kur kjo gjykatë u krijua, se çfarë do të ndodhte. Ndërsa ka sqaruar dhe faktin që perceptimi se Parlamenti i Kosovës mundet që me një vendim të “shkarkojë’ Gjykatën Speciale është i gabuar. Sipas tij, për një hap të tillë duhet të arrihet dakordësia e shumicës së pakicës në Kuvend.
“Kam parasysh psh që kur themi Gjykata Speciale të shkarkohet në Parlament.
Nëse do kishim nisur të reflektonim progresivisht mbi gabimin e bërë, do të kishim zgjeruar territorin e veprimit. Por cili ka qenë reagimi I atyre që e mbështetën këtë gjykatë? Më i keqi ishte “ju të LVV po mbani Gjykatën Speciale”. Nëpër tubime në Kosovë thuhej një frazë tronditëse, një nga deputetët e PDK, thoshte “Nëse nuk fiton Kurti, lirohet Hashim Thaçi”. Nuk di çfarë lidhje ka në këtë punë. Fraza më e mirë ndër të këqija ka qenë e ardhur nga eksponentë të PDK: Bëmë gabim sepse besuam shumë ndërkombëtarët. Të dyja këto fraza fshehin diskutimin e problemit.
Njëanësia e Gjykatës është makabre. U tha për herë të parë në 2015 në Kuvend kur Kurti tha se nëse ekziston kjo gjykatë do të thuhet: Ja çfarë janë të aftë të bëjnë shqiptarët për krime. Ata që ishin pro gjykatës, e hoqën pjesën e parë dhe thanë, Kurti tha: Ja çfarë krimesh janë të aftë të bëjnë shqiptarët.
LVV paralajmëroi çdo gjë, do të jetë jashtë Kosovës, provat do të vijnë nga Serbia.
Ka ardhur puna që gjykata akuzon për veprime që janë bërë nga paramilitarët. Paramilitari është i armatosur. Gjyqtari sillet si prokuror. Dëmet janë të papara. Problemi është si ta sanosh këtë dëm pa krijuar të tjerë.
Ndaj duhej një sipër marrje shumë e gjerë. Protesta është një gjë, shpreh entuziamin popullor kundër kësaj. Por ajo që nuk po i ikim dot janë korridoret, ne duam t’i zgjidhim gjërat nëpër korridore, gjë që solli pikërisht edhe gjykatën.
Si VV kemi parime, nëse do i futesh asaj pune duhet të krijuar situatat e mira që ta bësh të mundshme. Të niset puna për të ngritur padi për gjenocidin serb, të ndërtosh institutin e krimeve dhe institutin e dëmeve ekonomike që ka shkaktuar Serbia, këto janë bërë në këto 4 vite por nuk thuhen”, tha ai.
Anëtari i kryesisë së Lëvizjes Vetëvendosje Elvis Hoxha ishte sot i ftuar në “Kjo Javë” me Nisida Tufën në News24, ku foli mbi “akullin” mes qeverisë së Kosovës dhe asaj shqiptare, që sipas tij e ka themelin në Tiranë.
Hoxha u shpreh se sa i përket përplasjeve mes kryeministrit të Shqipërisë Edi Rama dhe homologut të Kosovës Albin Kurti, çka janë bërë më të forta ditët e fundit me deklaratat për organizimin e protestës në mbështetje të krerëve të UÇK në Tiranë, duhet një koordinim mes dy qeverive.
“Përplasja ka një historik. Duhet punuar në mënyrë të koordinuar mes dy qeverive por kjo nuk po ndodh sepse u ndërpre. Por kush e ndërpreu? Nga një anë thuhet ka ndodhur diçka, pastaj autori thuhet të mos përmendet, pra kur vjen puna tek emri i përveçëm. Dëmi mbahet i vlefshëm dhe akuzohet ai që është në qeveri në Kosovë. Duhet koordinim maksimal. Shqipëria ka luksin të krijojë institute, të bëjë rezoluta kundër gjenocidit. A do ta themelojë dikush një gjendje t’i kundërvihesh një gjykate? Krijo atmosferën për këtë punë. Nuk thuhet bërtisni ju dhe protestoni, un vijoj punën time. E di sa e ndihmon Kosovën një rezolutë?”, tha ai.
“Borxh” që Shqipëria ia ka jo Kosovës, por kombit shqiptar!
Kështu e ka quajtur anëtari i kryesisë së Lëvizjes Vetëvendosje Elvis Hoxha miratimin nga Kuvendi i Shqipërisë të një rezolutë për gjenocidin serb në Kosovë.
I ftuar në emisioni, “Kjo Javë” me Nisida Tufën në News24 , Hoxha u shpreh se mos miratimi i rezolutës në seancën e së enjtes nuk është hera e parë që ndodh.
“Nuk është hera e parë që rezoluta nuk votohet në Kuvendin shqiptar. Rezoluta është një gjest i vonuar dhe i pa kryer, që Shqipëria ia ka për detyrë jo Kosovës por kombit shqiptar.
Nuk më intereson aspak se kush e kërkoi miratimin e rezolutës. Protesta ka arritjet e saj, por rezoluta është gjë tjetër”, tha ai.
Anëtari i kryesisë së Lëvizjes Vetëvendosje Elvis Hoxha është ndalur në përplasjen dhe retorikën e përdorur nga Albin Kurti dhe Edi Rama me njëri-tjetrin në debatin e tyre edhe në rrjetet sociale.
I ftuar në “Kjo Javë” me Nisida Tufën në News24 ai u shpreh se dallimi I vërtetë mes Ramës dhe Kurtit është se ky I fundit është patriot, ndërsa kryeministri shqiptar me deklarata e tij po dëmton Kosovën.
“Thotë një të vërtetë, Kurti është më pasionant se ç’duhet, po thotë të vërtetën e dallimit mes tyre. Frazat e Ramës kanë ardhur progresivisht. Kemi parë fraza që thonë patriotizmi është i tepërt. Ky njeri kur tha toka e askujt dhe më pas përgënjeshtroi që e ka thënë i bën dëm vërtetë Kosovës. Nuk dua të hyj në prototipin e mendimit të tij, por si kryeministër i Shqipërisë, patriotizmin do e marrësh në formën e Kosovës, njejtë siç mund të bësh me Çamërinë. Na ka vrarë me njëtrajtëzime.
Çfarë ligjërimi kemi ne? Nuk është rakorduar ligjërimi, çfarë gjuhe të kemi. Kosova ka fajet e veta por po flasim gjithmonë për Kosovën, nuk flasim për Shqipërinë. Kurrë nuk keni dëgjuar që Kurti të flasë për gabimin e qeverisë shqiptare psh për integrimin. Jemi në kohë për përmirësime por nuk kemi besim kolektiv tek e ardhmja”, tha ai.
Në studion e emisionit “Kjo Javë” në News24 ka qenë i ftuar anëtari i kryesisë së Lëvizjes Vetëvendosje, Elvis Hoxha për të dhënë komentin e tij lidhur me protestën e djeshme në Tiranë, në emër të ish-krerëve të UÇK-së.
Hoxha është shprehur se Kosova i ofron atij ndjenjën e përkatësisë dhe në shtetin kosovar, për të ka hapësirë për punë.
Anëtari i kryesisë së LVV e përshkruan Shqipërinë si një vend ku vetëm oligarkët, ndërtuesit dhe gazetarët mund të gjejnë punë.
Por çfarë ai ka theksuar më së shumti është nevoja për një strukturë që të ndërtojë shtetin.
Lidhur me gjykimin e ish- krerëve të UÇK-së, Elvis Hoxha beson se shtet-ndërtimi i saktë do të jetë “çelësi” për të “shkatërruar” Gjykatën Speciale në Hagë.
Thënë nga ai, për ta realizuar këtë, duhen parime, institucione ku zhvillohet inteligjenca.
Anëtari i kryesisë së VV e ka përfunduar duke nënvizuar se dhënia e hapësirës mediatike të intelektualëve do të sillte një ndryshim, në gjuhën dhe mendimin e shoqërisë.
“Futi njerëzit në punë. Unë jam në Kosovë më shumë, se në shtetin shqiptar nuk ka punë për mua.
Në shtetin shqiptarë ka punë për oligarkë, për ndërtues, për gazetarë dhe kaq.
Për strukturat që ndërtojnë shtetin, për të gjithë elementët që përbëjnë shtet-ndërtimin nuk ka vend. Shtet-ndërtimi i saktë është shkatërrimi më i mirë i Gjykatës Speciale. Bëhet me parime, ndërto institucione dhe zhvillo inteligjencën. Zhvillo dhe koordino intelektualët, nxirri në media që të japi një gjuhë më të përbërë dhe imagjinatë dhe përfytyrim shoqërisë së tyre. Shoqëria duhet të dijë të flasë në gjuhën e tyre dhe jo në gjuhën e replikës”, tha ai.
Hoxha u ndal edhe në faktin që kryeministri shqiptar ka kushtëzuar Kosovën duke dalë krah Aleksandër Vuçiç dhe duke punuar për Balkanin e Hapur.
“Serbët kanë qenë gjithmonë prishësit e stabilitetit në Ballkan.
Nëse shfaqesh me Vuçiçin aq shumë ke kushtëzuar marrëdhëniet me Kosovën. Nëse punon për Ballkanin e Hapur ke kushtëzuar Koosvën dhe ke lehtësuar punën për armikun historik të shqiptarëve”, tha ai.