Presidentja e Bankës Qendrore Evropiane, Christine Lagarde, u largua papritur nga një darkë private e profilit të lartë në Forumin Ekonomik Botëror në Davos të Zvicrës, pasi Sekretari i Tregtisë i SHBA-së, Howard Lutnick, kritikoi ashpër performancën ekonomike të Evropës.

Incidenti, i cili ndodhi të martën vonë, u raportua për herë të parë nga Financial Times. E organizuar nga Drejtori Ekzekutiv i BlackRock, Larry Fink dhe e ndjekur nga më shumë se 100 liderë globalë, darka thuhet se u bë e tensionuar ndërsa Lutnick nisi të tallej me ekonominë evropiane se ka mbetur pas SHBA-së.

Episodi ndodhi mes tensioneve në rritje transatlantike, pasi Presidenti i SHBA-së, Donald Trump, kërcënoi të vendoste tarifa prej 10% për importet nga disa vende evropiane duke filluar nga 1 shkurti, me një rritje të mundshme deri në 25% në qershor, nëse nuk plotësohen kërkesat e SHBA-së të lidhura me Groenlandën.

Megjithatë, të mërkurën, Trump njoftoi se do të pezullonte tarifat pasi tha se ishte arritur një kornizë për një marrëveshje të ardhshme që përfshinte Groenlandën dhe rajonin e gjerë të Arktikut, pas një takimi me Sekretarin e Përgjithshëm të NATO-s, Mark Rutte, në Davos.

“Bazuar në një takim shumë produktiv që kam pasur me Sekretarin e Përgjithshëm të NATO-s, Mark Rutte, ne kemi formuar kornizën e një marrëveshjeje të ardhshme në lidhje me Groenlandën dhe, në fakt, të gjithë Rajonin Arktik”, shkroi Trump në platformën e tij Truth Social.

“Bazuar në këtë mirëkuptim, unë nuk do të vendos tarifat që ishin planifikuar të hynin në fuqi më 1 shkurt”, shtoi ai, pa dhënë detaje të mëtejshme.

© Panorama.al