Sulmuesja që ka lënë të vdekur gjashtë persona në një shkollë amerikane në Nashvill, Tenesi, ka blerë shtatë armë ligjërisht dhe i ka fshehur në shtëpi, ka thënë policia.

Hetuesit kanë thënë se prindërit e të dyshuarës kanë besuar se 28-vjeçarja nuk ka pasur armë dhe nuk e kanë kuptuar asnjëherë që ajo i ka fshehur diku në shtëpi.

Gjashtë persona, përfshirë tre fëmijë të moshës nëntëvjeçare, kanë vdekur si pasojë e sulmit në Shkollën Covenant.

Në mesin e të vdekurve kanë qenë edhe tre punëtorë të shkollës.

E dyshuara ka qenë “nën kujdes mjekësor për çrregullim emocional”, ka thënë policia.

Shteti amerikan, Tenesi nuk ka ligje që i mundësojnë policisë të konfiskojë armë nga të dyshuarit e dhunshëm.

Pavarësisht një hapësire të tillë ligjore, policia ka thënë se do t’i konfiskonte armët, nëse autoritetet do të kishin ndonjë paralajmërim që e dyshuara përbën kërcënim.

Policia ka biseduar me prindërit e të dyshuarës, Audrey Hale, e cila është vrarë më pak se 15 minuta pasi ka nisur sulmi.

Hale, e cila e ka identifikuar veten si transgjinore dhe ka qenë nxënëse e asaj shkolle, ka qenë e armatosur me tri armë, përfshirë një pushkë gjysmë-automatike.

Policia ka thënë se sulmuesja nuk e ka shënjestruar asnjë person në veçanti, mirëpo e ka shënjestruar “shkollën, ndërtesën e kishës”.

Ky sulm përbën incidentin e 131-të me të shtëna masive në Shtetet e Bashkuara këtë vit, sipas organizatës joqeveritare, Gun Violence Archive, e cila mbledh të dhëna për dhunën e shkaktuar me armë.

Forcat ajrore të katër vendeve nordike ranë dakord të operojnë flotën e tyre prej rreth 250 avionësh luftarakë si një forcë e kombinuar.

Duke shpresuar të pengojnë Rusinë duke bashkëpunuar së bashku.

Komandantët e Forcave Ajrore të Suedisë, Norvegjisë, Finlandës dhe Danimarkës thanë të premten se kanë nënshkruar një letër për të krijuar një mbrojtje ajrore të unifikuar nordike, raportoi Reuters.

“Qëllimi përfundimtar është të jemi në gjendje të operojmë pa probleme së bashku si një forcë e vetme duke zhvilluar një koncept nordik për operacionet e përbashkëta ajrore bazuar në metodologjinë tashmë të njohur të NATO-s”, thanë  forcat ajrore të Danimarkës në një deklaratë, për Bloomberg.syri.net

Dialogu mes Kosovës dhe Serbisë, do të jetë në rend dite në takimin e Këshillit Evropian, që zhvillohet të enjten dhe premten në Bruksel.

Po ashtu, pajtueshmëria e arritur mes kryeministrit të Kosovës, Albin Kurti dhe presidentit serb, Aleksandar Vuçiq, më 18 mars në Ohër, për zbatimin e Marrëveshjes drejt normalizimit të marrëdhënieve mes dy vendeve, do të jetë pjesë e konkluzave të këtij takimi të liderëve të BE-së.

Marrëveshja me 11 nene, e bërë publike më 27 shkurt, nuk e obligon Serbinë që ta njohë Kosovën, por kërkon nga të dyja vendet që t’i pranojnë dokumentet dhe simbolet e njëra-tjetrës, përfshirë: pasaportat, diplomat dhe targat.

Ajo kërkon, po ashtu, nga palët që t’i zbatojnë të gjitha marrëveshjet e arritura deri tash në dialogun për normalizimin e marrëdhënieve, përfshirë edhe atë për formimin e Asociacionit të komunave me shumicë serbe në Kosovë, të cilin Qeveria në Prishtinë e ka refuzuar deri tash, me arsyetimin se mund të rrezikojë funksionalitetin e shtetit.

Radio Evropa e Lirë ka pasur qasje në draftin e konkluzave nga samiti i BE-së dhe në të gjendet edhe paragrafi në të cilin përshëndetet arritja e marrëveshjes në Ohër.

“Këshilli Evropian mirëpret marrëveshjen e arritur në dialogun e lehtësuar nga Bashkimi Evropian për aneksin e implementimit të Marrëveshjes drejt normalizimit të raporteve mes Kosovës dhe Serbisë, dhe u bën ftesë të dyja palëve që në mënyrë të përshtatshme dhe në mirëbesim, të implementojnë obligimet e tyre përkatëse”, përmendet në draft të raportit.

Krerëve të shteteve anëtare të BE-së, do t’iu raportojë në këtë temë edhe kryediplomati i bllokut evropian, Josep Borell.

Ai ka raportuar për këtë çështje edhe të hënën para ministrave të Jashtëm të vendeve anëtare.

Arritjen e pajtueshmërisë në Ohër, Borell e ka quajtur “status quo të re”, në dialogun mes Kosovës dhe Serbisë, e cila do të mundësojë kalimin nga një fazë e krizave në fazën e zbatimit të marrëveshjes.

Në samitin e fundit të Bashkimit Evropian, të mbajtur në muajin shkurt, liderët e BE-së e kanë mbështetur propozimin e BE-së për normalizim të marrëdhënieve dhe u kanë bërë thirrje Kosovës dhe Serbisë që ta pranojnë atë.

Përmes përfshirjes së kësaj çështjeje në Këshillin Evropian, BE-ja dëshiron të dërgojë porosi sesa lart në agjendën e saj është normalizimi i marrëdhënieve mes Kosovës dhe Serbisë.

Me ndërmjetësimin e BE-së dhe mbështetjen e SHBA-së, Kosova dhe Serbia janë në negociata për normalizimin e marrëdhënieve qysh nga viti 2011.

Ato kanë arritur dhjetëra marrëveshje, por shumica e tyre nuk janë zbatuar dhe palët kanë fajësuar njëra-tjetrën për ngecje.

Ukraina tha të martën se raketa ruse janë shkatërruar gjatë një shpërthimi në Gadishullin e Krimesë.

Ky gadishull ukrainas u aneksua paligjshëm nga Rusia më 2014.

Megjithatë, Kievi mohoi përgjegjësinë për këtë incident “misterioz”.

“Një shpërthim në qytetin Dzhankoi në veri të Krimesë së pushtuar përkohësisht shkatërroi raketat ruse Kalibr-NK, teksa ato po transportoheshin përmes trenave”, tha inteligjenca ushtarake ukrainase përmes një njoftimi të publikuar në rrjetet sociale.

Hetuesit rusë më herët kishin deklaruar se sistemet e mbrojtjes ajrore kishin zmbrapsur sulme me dronë në Dzhankoi dhe se pjesët e shkatërruara të dronëve dëmtuan një dyqan dhe një shtëpi, duke lënë të plagosur një person.

“Dronët e shkatërruar ranë në objekte civile”, tha Komiteti hetues rus përmes një deklarate.

Dzhankoi është një qendër logjistike dhe gjendet mes Krimesë së kontrolluar nga rusët dhe jugut të Ukrainës, që është pushtuar nga forcat ruse pasi Moska nisi pushtimin e Ukrainës shkurtin e vitit të kaluar.

Oleg Kryuchkov, një këshilltar i kreut të instaluar rus në Krime, tha se sulmi duket se ishte “hakmarrje” për aneksimin.

Ky shpërthim ndodhi disa ditë pasi Moska festoi 9-vjetorin e aneksimit të gadishullit.

Presidenti rus, Vladimir Putin, gjatë fundjavës që shkoi vizitoi Krimenë. Kjo ishte vizita e tij e parë në këtë gadishull, që kur ai urdhëroi dërgimin e trupave në Ukrainë më 24 shkurt 2022.

Përfaqësuesi i Politikës së Jashtme të Bashkimit Evropian, Josep Borell, ka treguar se për dialogun Kosovë-Serbi sot ka raportuar në kuadër të takimit të ministrave të jashtëm të Bashkimit Evropian.

Ai, pas takimit në një konferencë për media, ka thënë se të gjitha shtetet e BE-së e kanë shprehur përkrahjen e tyre për arritjen e fundit që është bërë në dialog, lidhur me aneksin e marrëveshjes që u arrit në Ohër, e propozuar nga Bashkimi Evropian.

“Më në fund e kam informuar Këshillin e Ministrave të Jashtëm të Bashkimit Evropian për arritjen e dakordimit për marrëveshjen e BE-së në kuadër të dialogut Kosovë-Serbi. Kjo marrëveshje krijon një status-quo të re në dialog, ne më nuk jemi duke shpresuar se do të mbetemi më gjatë në situatë krize”.

“Por në implementimin e marrëveshjeve që u arritën më 27 shkurt, këto marrëveshje që ata kanë rënë dakord do të hyjnë në funksion në momentin kur unë kam publikuar deklaratën, apo qëndrimin. Nënshkrime nuk pati për arsye ligjore, por të dyja palët kanë rënë dakord që deklarata ime ishte një përkushtim për ata që të përmbushin obligimet që vijnë nga kjo marrëveshje”, ka thënë Borrell.bw

Sllovakia miratoi të premten një plan për t’i dërguar Ukrainës avionë luftarakë MiG.

Sllovakia është vendi i dytë i NATO-s, pas Polonisë, që i përgjigjet pozitivisht kërkesave të përsëritura të Presidentit ukrainas Volodymyr Zelenskyy për avionë në betejën e vendit të tij kundër agresionit rus.

Kryeministri sllovak Eduard Heger tha se vendi i tij është “në anën e duhur të historisë” me dërgimin e flotës prej 13 avionësh MiG-29 në Ukrainë.

Ndërkohë ushtria ruse dhe forcat private të Grupit Wagner kanë fituar kohët e fundit terren në perëndim të lumit Bakhmutka në qytetin Bakhmut, sipas informacioneve nga Ministria britanike e Mbrojtjes.

Forcat ukrainase vazhdojnë të mbrojnë pjesën perëndimore të qytetit, sipas këtyre informacioneve.

Po sipas Ministrisë britanike të Mbrojtjes, intensiteti i luftimeve nga ana e forcave ruse është ndër më të ulëtit që nga janari.

“Arsyeja ka shumë të ngjarë të jetë dobësimi i fuqisë së tyre luftarake deri në atë masë sa edhe veprimet sulmuese lokale nuk janë aktualisht të qëndrueshme,” thotë Ministria.

Forcat ruse pritet ta rrisin “kapacitetin e tyre sulmues” sapo të plotësohen rezervat e personelit dhe municioneve, sipas të dhënave britanike.

Polonia do të dërgojë në Ukrainë katër avionë MIG-29 gjatë ditëve në vijim.

Lajmin e ka bërë të ditur  presidenti Andrzej Duda në një mesazh në Twitter.

“Në ditët në vijim, ne do t’i dorëzojmë Ukrainës 4 avionë MiG-29. Avionët pritet të dorëzohen së shpejti,” tha ai.

Një nga mbështetësit më të vendosur të Ukrainës, Varshava ka marrë një rol udhëheqës në bindjen e aleatëve ndonjëherë hezitues për të furnizuar Kievin me armatime të rënda. Ai ka thënë se çdo transferim i avionëve do të bëhet si pjesë e një koalicioni.

Aleatët e NATO-s në ish-lindjen komuniste si Polonia dhe Sllovakia kanë qenë veçanërisht mbështetës të zëshëm të Kievit që kur Rusia pushtoi Ukrainën më 24 shkurt 2022.

Sllovakia gjithashtu ka konsideruar nëse do të dërgojë avionë MiG-29 në Ukrainë, por ende nuk ka marrë një vendim. syri.net

Polonia ka shkatërruar një rrjet spiunazhi që vepronte në vend, konfirmoi ministri i Mbrojtjes të enjten, pasi transmetuesi privat RMF FM raportoi se një grup spiunësh që punonin për Rusinë ishin arrestuar.

RMF raportoi të mërkurën se shërbimet polake të sigurisë kishin arrestuar gjashtë persona të dyshuar për spiunazh për Rusinë.

Sipas transmetuesit, grupi kishte planifikuar aktivitete sabotuese.

“Dua të theksoj suksesin e madh të arritur nga oficerët e Agjencisë së Sigurisë së Brendshme, sepse i gjithë rrjeti i spiunazhit është çmontuar”, tha ministri Mariusz Blaszczak.

“Kjo është padyshim dëshmi se shërbimet polake punojnë për sigurinë e vendit tonë në një mënyrë shumë efikase”, shtoi ai.

Blaszczak nuk pranoi të komentojë më tej mbi rastin dhe tha se më shumë detaje do të njoftohen nga ministri i Brendshëm Mariusz Kaminski, në një konferencë për media.

Të mërkurën, presidenti polak Andrzej Duda u takua me drejtorin e CIA-s, William Burns. Zyra e presidentit tha në Twitter se ata diskutuan “situatën aktuale të sigurisë”.

Sipas raportit të RMF, gjashtë personat e arrestuar ishin nga qytete në lindje të Polonisë dhe punonin për inteligjencën ruse.

Spiunët kishin vendosur kamera të fshehura në rrugë të rëndësishme hekurudhore, kryesisht në një rajon jugor të vendit.

Sipas RMF, kamerat u gjetën pranë aeroportit Jasionka afër Rzeszov, i cili është bërë një pikë kyçe e transferimit të armëve dhe municioneve që dërgohen në Ukrainë.