Deputeti i Partisë “Mundësia”, Erald Kapri, denoncoi nga foltorja e Kuvendit ligjet me porosi që bën mazhoranca, paqen fiskale, koncesionet dhe PPP-të në favor të klientëve, duke e ilustruar me shembuj konkretë.

Ai tha se edhe koncesioni i Portit të Vlorës me vlerë 60 milionë euro, i është dhënë një magazinieri që rezulton i lidhur me një biznesmen të njohur ndërtimi dhe nuk ka asnjë reagim, e jo më që ai koncesion të anulohet. Kapri i shtoi listës edhe koncesionet e tjera në vend ku vilen para nga privati, por nuk shkon asnjë e ardhur në buxhetin e shtetit.

Mes tyre kujtoi Thumanë-Kashar, apo Rrugën e Kombit. Kapri u shpreh kundër paqes fiskale, duke thënë se nuk bëhen transparent firmat fituese, duke hedhur dyshime edhe për pastrim parash të klientëve të caktuar. Ai tha se edhe SHBA-të janë kundër kësaj paqeje fiskale.

“Koncesioni për triportin e Vlorës është marrë nga një magazinier, që është i lidhur me emrin e një biznesmeni të njohur të ndërtimeve në Shqipëri. Zero reagim. Si mund të marri një magazinier operimin e një porti me vlerë 60 mln euro. Nuk ka asnjë reagim, se për anulim as që bëhet fjalë. Marrim koncesionin e Rrugës së Kombit, ku trau ka mbledhur nja 170 mln euro të ardhura, por pyesim çfarë ka ofruar ai, se kur bie borë jemi bllokuar atje, nuk e dimë a verifikohen shpenzimet. Ministria e Financave duhet t’i mbikëqyr ato koncesione, por regjistri është fiktiv”, tha Kapri.

Deputeti vijoi edhe me rrugën Thumanë-Kashar, ku analizoi se në fund të afatit firma do vjelë 1,3 mld euro, sikurse dhe rastin Bankers.

“Çfarë u bë dhe për çfarë shërben koncesioni Thumanë-Kashar, do jenë mbi 1,3 miliardë euro fitim neto në fund për të, janë dy mijë e ca lekë për kalim në atë rrugë as 20 km. Pa llogaritur koncesionet e tjera. Kemi edhe rastin e Bankersit, me këtë projektligj po bëhet gati për atë që do e marri ta ketë gati për të operuar. Kështu keni thënë gjithmonë për çdo koncesion dhe amnisti dhe e kemi parë se çfarë ka ndodhur më parë, (replikon me deputetin Erion Braçe, që i ndërhyn nga vendi duke i thënë se po gënjente)”, vijoi ligjvënësi nga foltorja e Kuvendit.

Ai komentoi edhe paqen fiskale, duke thënë se është e dyshimtë:

“Po për paqen fiskale, çfarë po ndodh. Pse bëhen ligje shpejt e shpejt për të pastruar paratë e krimit? Kujt i shërben kjo shpejtësi, refuzohen emrat e atyre që do përfitojnë, kur në raste të tjera thuhen. Dhoma Amerikane është kundër, ambasada Amerikane është kundër paqes fiskale. Pse e bëni ju këtë, kush përfiton nga kjo? Pse nuk bëhen transparente nga ministri firmat private që përfitojnë”.

Për analogji Kapri solli amnistinë penale të vitit të kaluar, kur u tha në Parlament se nuk do liroheshin të korruptuarit, por ndodhi e kundërta. Kjo shkaktoi ndërhyrjen për herë të dytë të deputetit Braçe, por ligjvënësi opozitar vijoi në deklaratën e tij se amnistia u bë për të falur të korruptuarit.

“Ju kujtohet amnistia Penale në këtë Kuvend ku thatë se nuk do lirohen të dënuarit për korrupsion dhe ndodhi e kundërta, u liruan ata që ishin dënuar për korrupsion, më kujtohet Fran Frrokaj, (Braçe i ndërhyn përsëri). Ku ke parë amnisti fiskale vetëm me dy apo tre javë debat, kurse në vende të tjera bëhen me vite debate për këtë çështje”, tha ai.

Ai theksoi se “ia kanë parë sherrin koncesioneve” tashmë, ku edhe për aeroportin e Vlorës, që nuk do nisë punë, u caktua në zyrën e ministres, duke iu referuar publikimeve të deritanishme për zv/kryeministren Belinda Balluku.

“Me kë koncension ta nisësh më parë. Cili koncesion i dhënë nga qeveria ka qenë frytdhënës? Nuk gjen asnjë. Por tek koncensionet e shëndetësisë të 4 në SPAK. A kemi shërbim më të mirë? Zero. Edhe pasi janë zbuluar që janë afera korruptive ato kanë vazhduar. Më interesanti, koncesioni i aeroportit të Vlorës që nga qeveria u trumpetua që vitin e ardhshëm do nisë punë. Por vetë qeveria e di që nuk do nisë punë sepse e kanë parë sherrin e konsensionarëve dhe se si është dhënë në zyrën e ministres. Si ka mundësi që nuk ka asnjë reagim edhe pas daljes së investigimit”, theksoi ai.

Dhe në fund e mbylli fjalën me mesazhin që ligji për koncesionet dhe paqja fiskale u jepte qytetarëve:

“Çfarë mesazhi u jepni atyre qytetarëve dhe njerëzve që paguajnë taksat me këtë projektligj? Që të mos paguajnë taksa se nesër do bëhet projektligj që ua fal. Janë ligje me porosi, me porosi”.