Në foto: nga e majta në të djathtë gazetari italian Gianni Bellesia dhe Drejtori i Përgjithshëm i RTSH Skënder Buçpapaj (1994)

Tridhjetë vite më parë, fotografi italian Gianni Bellesia mbërriti për herë të parë në Shqipëri si pjesë e një misioni humanitar, duke shoqëruar dy kamionë me ndihma për familjet e varfra të një vendi që sapo kishte hyrë në rrugën e demokracisë.

Sot, pas tri dekadash, ai është kthyer sërish por jo më si vëzhgues i varfërisë, por si dëshmitar i transformimit të një populli, shkruan A2.

Në ekspozitën fotografike të titulluar “Shqipëria 1994, një popull në lëvizje”, Bellesia sjell 30 imazhe autentike, që rrëfejnë historinë e njerëzve të thjeshtë dhe ndryshimet e një kohe që nuk duhet harruar.

Fotografitë janë realizuar nga Durrësi në Tiranë, Shkodër e deri në fshatin e thellë të Nënshatit, vende ku ai ka dokumentuar me objektivin e tij jetën, shpresën dhe buzëqeshjen e shqiptarëve të atyre viteve.

Ekspozita “Shqipëria 1994, një popull në lëvizje” do të qëndrojë e hapur për publikun gjatë fundjavës, në ambientet e Qendrës Kulturore të Fëmijëve në Durrës. Një udhëtim mes kujtesës dhe ringjalljes së një kombi që, për Gianni Bellesian, nuk ka reshtur kurrë së buzëqeshuri. (A2 Televizion)