Departamenti i Drejtësisë i Shteteve të Bashkuara ka publikuar mbi tre milionë faqe dokumente që lidhen me Jeffrey Epstein.

Kjo përfshin më shumë se 2,000 video dhe 180,000 imazhe në grupin e fundit të dokumenteve. Publikimi vjen gjashtë javë pas një afati ligjor të vendosur nga një ligj i nënshkruar nga Presidenti Donald Trump.

Departamenti ka shpjeguar më parë se vonesa në përmbushjen e afatit u shkaktua nga nevoja për të rishikuar miliona materiale dhe për të fshirë çdo gjë që mund të rrezikonte identitetin e viktimave.

Mijëra faqe janë bërë tashmë publike në publikime të mëparshme, duke përfshirë fotografi me persona të njohur, mesazhe dhe email-e.

Shfaqja e emrit në dokumente nuk nënkupton keqbërje, dhe shumë nga personat që janë shfaqur në publikimet e mëparshme e kanë mohuar çdo përfshirje në aktivitetet e Epstein.

Zëvendës-prokurori i Përgjithshëm, Todd Blanche, ka listuar kategoritë e informacionit që janë përjashtuar nga publikimi i sotëm:

Detaje personale identifikuese të viktimave
Dosje mjekësore
Çdo material që tregon abuzim seksual me fëmijë
Çfarëdo që mund të rrezikonte një hetim aktiv
Çfarëdo që tregon vdekje ose dhunë fizike
WhatsApp Image 2026-01-30 at 17.42.06

Blanche tha gjithashtu se janë mbuluar fytyrat e grave që shfaqen në dokumente, përveç Ghislaine Maxwell, ndërsa fytyrat e burrave nuk janë fshirë, përveç rasteve kur ishte e pamundur të fshihej një grua pa fshirë edhe burrin.

Ai theksoi se shfaqja në këto dokumente nuk nënkupton fajësi. Blanche u shpreh gjithashtu i zemëruar me sugjerimet se Departamenti i Drejtësisë nuk e merr seriozisht shfrytëzimin e fëmijëve, duke përmendur disa hetime të fundit: arrestimin e 293 personave përgjegjës për trafikimin e njerëzve dhe mbylljen e 3.8 milionë llogarive në “dark web”.

Një gazetar e pyeti për pretendimin e Ghislaine Maxwell se më shumë se dy duzina burrash kishin nënshkruar marrëveshje sekrete me qeverinë federale për të shmangur ndjekjen penale. Blanche tha se nuk ka koment për këtë dhe shtoi se departamenti ka rishikuar çdo dokument të hetimeve, dhe nëse ekzistojnë marrëveshje të tilla, ai nuk është i informuar për to.

Blanche u pyet gjithashtu për viktimat dhe mbijetuesit e abuzimeve të Epstein, duke thënë se disa kanë shprehur frustrim për procesin e publikimit të dokumenteve.

“Edhe unë po ashtu,” u përgjigj ai. “Viktimat e Epstein kanë përjetuar dhimbje të pashpjegueshme,” vazhdoi ai. Blanche shprehu shpresën se puna e kryer gjatë muajve të fundit ka mundur të sjellë njëfarë mbylljeje për viktimat.

Ai theksoi gjithashtu se Departamenti i Drejtësisë nuk e ka mbrojtur Presidentin Donald Trump gjatë rishikimit të dokumenteve dhe se kërkesa e Trump për transparencë është përmbushur. Blanche shtoi se interesi publik për informacion rreth Trump nuk do të mbyllet me këto dokumente.

Duke iu përgjigjur kritikave mbi publikimin e dokumenteve, Blanche krahasoi madhësinë e mbi 6 milionë faqeve me “dy Kullat Eiffel” dhe theksoi se departamenti nuk ka shkelur afatin 30-ditor të vendosur nga Kongresi, por ka vepruar për të mbrojtur viktimat. gsh