BBC paralajmëron skenarë ekstremë në Europë, pas konfliktit në lindje dhe luftës 3-vjeçare mes Rusisë dhe Ukrainës.

Në një artikull, BBC shkruan se ushtria gjermane, Bundeswehr, ka iniciuar kohët e fundit një plan masiv investimesh pasi Parlamenti votoi për të hequr kufizimet e shpenzimeve të mbrojtjes dhe rregullat strikte mbi borxhin.

Një gjeneral i lartë i vendit është shprehur për BBC se rritja e shpenzimeve ushtarake është nevojë urgjente, sepse ai beson se agresioni rus nuk do të ndalet në Ukrainë.

“Ne jemi të kërcënuar nga Rusia. Ne jemi të kërcënuar nga Putin. Ne duhet të bëjmë gjithçka që është e nevojshme për ta penguar atë (Putinin)”, thotë gjenerali Carsten Breuer.

Ai paralajmëron se NATO duhet të përgatitet për një sulm të mundshëm ushtarak nga Rusia, brenda 4 vjetësh.

“Nuk ka të bëjë me sa kohë na duhet, ka të bëjë më shumë me atë se sa kohë na jep Putini për t’u përgatitur”, shprehet drejtpërdrejt shefi i mbrojtjes.

Ai vijon më tej: “Dhe sa më shpejt të jemi të përgatitur, aq më mirë”.

Pushtimi i Ukrainës nga Rusia ka ndryshuar thellësisht mendimin në Gjermani. Për dekada, njerëzit refuzonin fuqinë ushtarake kjo për shkak të rolit që ka luajtur Gjermania në të kaluarën si agresior në Europë.

“Ne filluam dy luftëra botërore. Edhe pse kanë kaluar 80 vjet që nga përfundimi i Luftës së Dytë Botërore, ideja që gjermanët duhet të qëndrojnë jashtë konflitit është ende në ADN-në e shumë njerëzve”, shpjegon Markus Ziener ngan Fondi Gjerman Marshall në Berlin. bw