Ka përfunduar pas 15 minutash seanca plenare në Kuvend, e para që nga zgejdhjet e 11 majit.

Seanca u karakterizua nga tone të ashpra dhe akuza të ndërsjellta mes kreut të PD Sali Berisha dhe kryetares së Kuvendit Elisa Spiropali.

Berisha akuzoi maxhorancën se ka manipuluar rezultatin e zgjedhjeve të 11 majit me ndihmën e karteleve të drogës dhe parave të ardhura nga bota e krimit.

Debati në Kuvend:  

Sali Berisha: Të nderuar deputetë, kjo seancë mblidhet pas farsës elektorale më të turpshme, pas rënies së Perdes së Hekurt në Europën ish-komuniste. Kjo seancë mblidhet pasi partia e krimit me në krye Edi Ramën zhvilloi farsën zgjedhore më kriminale që ka njohur ndonjëherë historia e vendit. Kjo seancë mblidhet pasi në shkelje të të gjitha ligjeve kombëtare dhe ndërkombëtare, Edi Rama përdori 76 milionë euro dhuratë për 48 përqind të votuesve. Pasi fali 200 milionë euro gjoba dhe kamata për të marrë votat. Pasi mobilizoi kartelet më të rrezikshme të drogës në Europë.

Sali Berisha: Deputetët e këtyre karteleve u zëvendësojnë ju në këtë parlament, jo se ju nuk ishit mëkatarë, por vetëm njëri prej tyre, Arkendi, që mori 2500 vota në vitin 2021, mori këtë vit nga Troplinët 5 mijë vota më shumë se Edi Rama. Ju mblidheni këtu pasi klanet e vrasësve, drogës, kartelet e drogës, sjellin në këtë parlament 28 deputetë në lista të mbyllura dhe të hapura. Ju mblidheni sot këtu pasi për të blerë votat me drogë, kreu juaj firmosi mbjelljen e 28 mijë hektarëve kanabis në mbarë vendin. Ju mblidheni sot këtu në një kohë kur votën e parë të diasporës shqiptare e manipuluat në mënyrën më të egër. Kur 1.6 milionë shqiptarëve iu shkelmuat votën. O botë e krimit, nuk mund të ishit ndryshe ju. Përfaqësues të klaneve më të egra dhe vrasësve, nuk mund të ishit ndryshe, këta mund të ishit. Po, po. Shumë herë më e ndershme do ishte që këtu në parlament të ulej Xhevdet Troplini, Altin Hajri, Elvis Çela, Bahri Bajri, Pëllumb Gjoka, Arben Qimja, Renato Salihi, Orik Shyti dhe të tjerë të cilët u përdorin ju si lecka politike në funksion të perandorive të tyre të krimit.

Spiropali i ndërpret fjalën: Koha mbaroi!

Sali Berisha: Cila kohë?

Elisa Spiropali: Koha juaj ka mbaruar, ka perënduar! Fjala për Niko Peleshi.

Flamur Noka flet nga vendi: O Xhabaft ngrije kokën, Blendi Xhabafti.

Niko Peleshi: Jemi si grup parlamentar dakord që të rifillojmë punën pas një fushate të suksesshme për të gjithë, vendin dhe shqiptarët. Jemi në Parlament jo në cirk këtu (i drejtohet opozitës)! Natyrisht që kemi plot arsye që të kërkojmë diskutime jashtë rendit të ditës sepse kemi shumë arsye. Do kemi disa seanca intensive deri në fillim të korrikut dhe më pas nuk do të mund të marrim më vendime për të ndryshuar projektligje. Janë 25-30 akte që duhet t’i miratojmë në këto 5-6 seanca. Të fillojmë që nga e enjtja tjetër me miratimin e këtyre projekt-akteve.

Elisa Spiropali: Votimi i hapur me kartona. Miratohet programi dhe kalendari i punimeve 29 maj-18 qershor 2025. Ju njoftoj se në Kuvend është depozituar kërkesa e kryetarit të grupit parlamentar të PD për ndryshimin e rendit të ditës të seancës së sotme plenare ku kërkohet përfshirja si pikë e tretë e tij diskutimi jashtë rendit të ditës. Kush do ta bëjë propozimin për ndryshimin e rendit? 3 minuta kohë (Sali Berisha sërish në foltore).

Sali Berisha: Të dashur qytetare dhe qytetarë, ai që shihni aty, ai ndërroi mbiemrin. Ai tani quhet Blendi Xhabafti. Ai është Blendi Xhabafti, një bandit më i keq, më i rrezikshëm se Robert dhe Alfred Xhabafti. Ja, ky është!

Elisa Spiropali: Ju tërheq vëmendjen dhe do t’ju ndërpres fjalën. Mos iu drejto me gisht, me fjalë, anëtarit të Këshillit të Ministrave.

Sali Berisha: Pusho tani. Ai është njëlloj si ti, se edhe ti erdhe si Spiropali dhe përfundove si Spirogjoka.

Elisa Spiropali: Të heq të drejtën e fjalës.

Elisa Spiropali: S’mund të vish këtu pas humbjes tënde dëshpëruese dhe turpëruese edhe të tentosh të prishësh punimet e Kuvendit të Shqipërisë. Ta dhash fjalën sipas rregullores në mirësim për të folur për ndryshimin e rendit të ditës. Keni bërë një kërkesë, nuk dilni të flisni për kërkesën tuaj. E mbylle për sot siç e ke mbyllur gjithnjë me turp.

(Spiropali hedh në votim kërkesën e PD e cila u rrëzua me votat e mazhorancës. Seanca e Kuvendi mbyllet pas 15 minutash) BW