BALADE PER SHOTE GALICEN 1967- Nga Konstandin Dhamo

February 20, 2026

Të gjithë trima gjokserreshkur

Hijerëndë e ballëlart,

Ty të kishin vënë në krye,

Moj burrnesha pushkëgjatë !

.

Nëpër shtigje, buzë qiellit,

Ti me çetën ikje larg

Nënat sokëllinin pragjesh,

Ndër oborre piksej gjak.

.

Të rrethonin , të plagosnin,

Shembnin strehët kosovare;

Lart ndër oda, ti në këmbë,

Në bedenë ktheje dritaret…

.

Dhe të ndiqnin gjer në male,

Teksa çeta ikte larg.

Hëna, si fener që s’shuhej,

Përmbi udhë t’hidhte ar…

.

Luftë në male, prehje në mal,

Shi dhe erë dhe, shtegtime…

Shkrepëtinin patkojt dhe qiejt,

Shkrepëtinin pushkët trime !

.

Qave burrin , qave trimat,

Lidhe plagë, të lidhën plagë.

Sa e rëndë jetë e malit,

Moj komitja pushkëgjatë !

.

Gjithë ndjenjat femërore

Diku thellë i ndrydhe ti,

Në një nyje që rëndonte

Si një medalion kujtimi…

.

Përmbi kalë i ndieve vitet,

Në mes luftërash me rrebesh;

Kali yt trokoi ndër male ,

Jelebardhë mes jele resh.

.

Përmbi kalë, për lirinë,

Shkrepe zjarr shkrep më shkrep.

Nuse dymbëdhjetë ditë,

Luftëtare dymbëdhjetë vjet !

• twitter

  Follow
• facebook
• linkedin

Fjalë kyçe: Konstandin Dhamo