VOAL – TIRANË, 10 NËNTOR – Mediat në Tiranë bëjnë të ditur se shkrimtari ynë i shquar Moikom Zeqo është i sëmurë rëndë.

Zeqo është diagnostikuar me leucemi kronike, por nuk gjendet dot një vend në spitalin onkologjik që të marrë trajtimin e duhur mjekësor.

A ka një shtrat të lirë për Moikom Zeqon?

Kështu pyesin mediat në Tiranë. Ky është apeli që iu drejtojmë sot të gjithë organeve të shëndetësisë në kryeqytetin e Shqipërisë.

Moikom Zeqo ka lindur më 3 qershor 1949 në qytetin e Durrësit. Njihet si arkeolog e si krijues letrar. Ka bërë edhe studime në këto fusha. Më 1971 është diplomuar në Universitetin e Tiranës për filologji dhe letërsi. Më vonë është diplomuar për histori dhe arkeologji si dhe ka bërë studime pasuniversitare në Romë, Athinë dhe në Washington D.C. Ka punuar si redaktor letrar në gazetën “Drita” dhe arkeolog dhe specialist i artit të lashtë pranë Akademisë së Shkencave.

Është Doktor i Shkencave dhe mban Urdhërin e Lartë “Mjeshtër i Madh”.

Është autori i 62 librave me poezi, studime arkeologjike, për historinë e artit, si dhe të nje numëri skenaresh për filma kinematografike e televizivë me karakter arkeologjik dhe kulturor. Ka marrë disa herë çmime të para për librat e tij. Krijime të Moikom Zeqos janë përkthyer në gjuhët anglisht, frëngjisht, greqisht, italisht, sërbokroatisht, bullgarisht, rumanisht, polonisht, danisht, esperanto, gjermanisht si dhe në gjuhën tonë.

Është autor i tre ekspozitave vetiake në pikturë. Ka përfaqësuar Shqipërinë në Konferenca Shkencore Ndërkombëtare me dhjetra herë dhe është vlerësuar nga personalitete të larta të kulturës shqiptare dhe të huaj.

Moikom Zeqo është sot një nga personalitetet më të mëdha dhe të njohura të kulturës sonë kombëtare. Veprat e tij dallohen për një stil lakonik, të ngjeshur dhe eruditë dhe mbahet si pionier i postmodernizmit në letrat shqipe.