ARISTIR LUMEZI/Ministri i Jashtëm grek, Nikos Kotzias, ka deklaruar se me marrëveshjen për përcaktimin e kufirit detar me Shqipërinë, Greqia do të zgjerojë hapësirën e saj detare. Gjatë një interviste për radion greke “News 24/7”, Kotzias tha se Greqia do të marrë 100% influencën e saj në ishujt veriorë të Korfuzit.

Sa i përket shtrirjes së mëtejshme të ujërave territoriale në 12 milje, ministri i Jashtëm grek tha se kjo do të bëhet gradualisht. Ai e barazoi këtë lëvizje me një zgjerim të Detit Territorial.

“Do të jetë hera e parë që Greqia, pas dekadash, do të zgjerojë horizontin e saj territorial”. Për të shkuar te 12 miljet, baza do të jetë Deti Territorial. Sepse ju e dini se, zona ekonomike ekskluzive nuk na jep të drejta sovrane, nuk është sovranitet, nuk është si toka, ndërsa Deti Territorial është si toka, janë të drejta sovraniteti, është zgjerim i Greqisë dhe zgjerimi i Greqisë është një veprim që do të ndodhë dhe do të jetë hera e parë pas shumë dekadave që Greqia zgjeron horizontin e saj”, tha Kotzias.

I pyetur nëse bëhet fjalë për disa mijëra kilometra, Kotzias nuk dha shifra dhe metodologjinë se si do të bëhet, por tha se Greqia do të dyfishojë Detin e saj Territorial. “Zgjerimi i Detit Territorial do të çojë në dyfishimin e Detit Territorial, domethënë në zonën detare, do të kemi dyfishim të sovranitetit tonë”, tha ministri i Jashtëm grek, Nikos Kotzias.

Sipas tij, Greqia dhe Shqipëria ndodhen në përfundim të negociatave për marrëveshjen e delimitimit të zonave ekskluzive ekonomike. “Ka pasur një negocim më të hershëm, kemi një vendim të Gjykatës Kushtetuese të Shqipërisë për një zbatim jo të saktë të së drejtës ndërkombëtare, pati disa çështje teknike dhe tashmë jemi në përfundim të këtyre negociatave”, tha dje Kotzias, gjatë një interviste për radion vendase “News 24/7”. Ministri i Jashtëm grek dha edhe disa detaje lidhur me pritshmëritë e Athinës nga këto negociata.

“Ne duam të kemi 100% influencën mbi ishujt, posaçërisht atyre që janë sipër Korfuzit, e para së gjithash Otonoit. E them këtë, sepse, në marrëveshjen e vitit 2009, e morëm influencën 100%. Por Gjykata Kushtetuese e Shqipërisë bëri një konstatim: se në marrëveshjen që bëri Kostandinos Karamanlis në 1997 për shelfin kontinental me Italinë, influenca që vetë Karamanlis i dha Otonoit ishte 70%. Rrjedhimisht, ka një vështirësi ligjore, por besoj se do ta kapërcejmë në maksimum”, tha Kotzias.

I pyetur nëse delimitimi i zonave ekskluzive ekonomike me Shqipërinë do të influencojë edhe përqasjen ndaj mosmarrëveshjeve greko-turke, Kotzias u përgjigj: “Do të fillojmë nga Shqipëria që kemi delimitimin e ZEE dhe shpresoj të mos kemi keqkuptime nga ana e Turqisë, sepse do të avancojmë dalëngadalë”.

ÇAMËT

Në intervistë, ministri i Jashtëm grek mohoi edhe njëherë kategorikisht që në negociatat me Tiranën të jetë diskutuar çështja çame. “Nuk diskutuam kurrë dhe as pranova ndonjëherë të diskutojmë në këtë marrëveshjepaketë çështjen çame. Të jemi të qartë”, tha Kotzias. Ai shtoi se janë tjetër gjë pasuritë e mbajtura në sekuestro nga Ligji i Luftës dhe tjetër pronat e çamëve.

“Është tjetër gjë kur shteti grek tha ‘kjo pasuri shqiptare, përderisa jemi në luftë vihet nën sekuestron time dhe nuk mund ta përdorë armiku dhe kur të mbarojë lufta do të shohim si dhe nëse do t’ia kthejmë apo jo. Dhe janë tjetër gjë pasuritë që u konfiskuan për shkak të bashkëpunimit me armikun, domethënë me nazizmin gjerman dhe fashizmin italian, nga grupi i liderëve çamë kryesisht në Thesproti”.

Duke komentuar reagimet në Greqi, sipas të cilave, me marrëveshjen Athinë-Tiranë, do t’u dorëzojë shqiptarëve krahinën e Thesprotisë që do të quhet më pastaj Çamëri, Kotzias i cilësoi si “absurditete”. “Kjo është retorika e urrejtjes dhe e absurditetit. Dhe duhet ta presin. Sepse nuk i shërben vendit, por vetëm interesave idiote të tyre”, ka përfunduar Kotzias.

Presidenti i Serbisë, Aleksandër Vuçiç, tha se vizita e presidentit rus, Vladimir Putin, në vjeshtë do të jetë nder i madh për Serbinë dhe konfirmim i lidhjeve tradicionale miqësore midis dy vendeve.

Vuçiq u takua të premten me ambasadorin rus në Beograd, Aleksandër Chepurin, i cili konfirmoi se Putini e ka pranuar ftesën për vizitë.

Siç transmeton Shërbimi i Ballkanit i Radios Evropa e Lirë, Chepurin e falënderoi Vuçiqin për nivelin e lartë të marrëdhënieve dypalëshe.

Ai tha se vizita e Putinit shpreh dëshirën dhe synimin e Moskës për të punuar në thellimin e bashkëpunimit midis dy vendeve.

Pritet që gjatë vizitës së Putinit në Beograd të nënshkruhen disa marrëveshje, tha Presidenca e Serbisë.

Presidenti i Serbisë, Aleksandër Vuçiç, është kërcënuar me jetë nëse do të nënshkruajë ndonjë marrëveshje me Prishtinën.

Lajmi mësohet përmes një letre që deputeti i kuvendit serb, Slavisha Ristiç, i ka dërguar presidentit rus Vladimir Putin, në të cilën e kërcënon me vrasje presidentin serb Aleksandër Vuçiç.

Në letrën dërguar Presidentit rus Putin ai pretendon se “nëse Vuçiç tenton të arrijë paqe dhe të nënshkruajë ndonjë marrëveshje me Prishtinën do të përfundojë si ish-kryeministri i vrarë serb, Zoran Gjingjiç”.

Ristiç kujton në letër se serbët “në historinë e marrëdhënieve serbo-ruse, gjithmonë u janë ankuar sundimtarëve rusë për shumë armiq të serbëve”, dhe shton se ata tani për herë të parë këtë duhet ta bëjnë për shkak të pushtetarëve serbë.

Ai tregon se Presidenti i Republikës së Serbisë po përgatitet ta nënshkruajë marrëveshjen gjithëpërfshirëse me Prishtinën, dhe e paralajmëron Vuçiçin për “fatin tragjik të kryeministrit të ndjerë të Serbisë Zoran Gjingjiç”, e që ky fat mund ta gjejë edhe atë.

“Gati të gjitha mediat të cilat e përkrahin regjimin në Serbi e theksojnë dashurinë e Aleksandër Vuçiçit ndaj Rusisë”, thotë Ristiç në letrën dërguar Putinit, të cilën e kanë transmetuar disa portale serbe, dhe pretendon se “Vuçiçi krenohet me atë se deri tani është takuar 13 herë me Putinin”.

ATHINE- Kërcënohet sërish me vdekje ministri i Jashtëm grek, Nikolaos Kotzias.

Në intervistë pak orë me parë për radio ’24/7 Athinë’, ministri sulmon opozitën greke për retoriken e urrejtjes që sipas tij po ushtron në negociatat e fundit me Shkupin dhe ndaj qeverisë greke, raporton gazetarja Ira Londo.

Po ashtu ai komentoi zhvillimet në Maqedoni si dhe u përgjigj hapur për negociatat e fundit me Tiranën. “Me kërcënojnë jetën vazhdimisht dhe prokuroria nuk reagon. Më kanë dërguar kuti me gjak, me baltë dhe fishekë. 800 paketa kërcënuese kanë ardhur tek unë dhe familja ime”, deklaroi Kotzias.

Në lidhje me ecurinë e negociatave me Tiranën, diplomati grek tha edhe njëherë së “çështja çame nuk u bisedua kurrë dhe nuk do këtë të tillë bisedë në tryezë, përveç të drejtave në pasuri. Pas abrogimit të ligjit të luftës shqiptaret mund te rimarrin pasuritë e paraluftës, por është tjetër teme sekuestrimi i pasurive ne Thesprotia nga çamet. Rreth 16-23 shtator pritet referendumi ne Maqedoni, ne vijim reforma kushtetuese”.
(BalkanWeb)

BEOGRAD – Presidenti i Serbisë Aleksandër Vuçiç ka deklaruar me rastin e vazhdimit të dialogut mes Prishtinës dhe Beogradit në Bruksel se Serbia është e gatshme të bisedojë për kompromise, por jo edhe të pranojë çfarëdo presioni, shkruajnë mediat serbe.

Gjatë një konference për gazetarë, Vuçiç ka deklaruar se ka kontaktuar me zyrtarë të Brukselit të cilëve u ka thënë se: “nëse janë të vërteta qëndrimet e shqiptarëve, atëherë nuk ka nevojë të shkoj në Bruksel të humb kohë”, duke pretenduar se kinse ata e kanë lutur që të shkojë në Bruksel, transmeton Telegrafi.

“Nëse mendoni se mund të me detyroni t’i dëgjoj dhe shërbej Haradinajt, Hotit dhe Hoxhajt, mos më thirrni”- ka shtuar Vuçiç.

Ai ka thënë para gazetarëve se nuk i frikësohet presionit të perëndimit.

“Keni gjetur personin e gabuar për t’i bërë presion. Nëse jeni të gatshëm të bisedojmë për kompromise, jemi të gatshëm”, ka thënë për fund presidenti serb.

Policia kufitare e Serbisë sot ia ka ndaluar hyrjen në territorin e saj pa dhënë shpjegime këshilltarit për Rajonin të kryeministrit Edi Rama.

Filozofit dhe kritikut të artit nga Kosova, Shkëlzen Maliqi i është ndaluar hyrja në Serbi, në pikën e kalimit kufitar në Merdare.

Policia kufitare e Serbisë nuk ofroi informacion apo arsye për veprimin e tyre.

Maliqi po udhëtonte me dramaturgun dhe drejtorin e Qendrës Multimedia Jeton Neziraj dhe kryeredaktoren dhe fotografen e “Kosovo 2.0”, Besa Luci dhe Majlinda Hoxha.

Ata planifikonin të merrnin pjesë në një diskutim me rastin e publikimit të “20 Vjet Përtej/Preko/Beyond”, që përmbledh një kronologji të 20 viteve të bashkëpunimit kulturor ndërmjet faktorëve kulturorë nga të dyja shtetet.

Pas ndalimit të Maliqit, anëtarët e tjerë të grupit po ashtu vendosën të kthehen në Prishtinë.

Maliqi ka thënë për “Insajderin” se Serbia po merr masa hakmarrëse për zyrtarët e Kosovës. Ai thotë se edhe ekipi ka refuzuar të hyjë në territorin serb në shenjë revolte për ndalimin e Maliqit në kufi.

Shkëlzen Maliqi është analist politik, kritik arti, por edhe filozof. Ai ka lindur në vitin 1947 dhe jeton në Prishtinë. Maliqi ka drejtuar një sërë organizatash, mes të cilave edhe Institutin e Studimeve Sociale, “Gani Bobi”.

Deputeti grek i Agimit të Artë, Konstandinos Barbarusis është arrestuar tre ditë pasi prokuroria greke urdhëroi ndjekje penale për të me akuzën për tradhti të lartë ndaj atdheut.

Deputeti neonazist ka bërë thirrje në Parlament të premten, ditë kur po votohet marrëveshja me Maqdoninë, për grusht shteti, duke kërkuar që ushtria të arrestojë Presidentin e Republikës së Greqisë dhe kryeministrin grek, shkruajnë mediat në vend.

Barabarusis i ka shpëtuar një kontrolli të policisë greke që kishte urdhër-arresti për të, duke u larguar me shpejtësi mbrëmjen e së shtunës.

Por sot ai është arrestuar në lagjen Pendeli, pas një operacioni të antiterrorit grek dhe bashkë me të është shoqëruar në polici edhe një person që e strehonte.

Isuf Kadriu

Maqedonia dhe Greqia të dielën nënshkruajnë marrëveshjen për zgjidhjen e kontestit shumëvjeçar të emrit. Dokumenti që parasheh emrin, Maqedonia e Veriut. Do të nënshkruhet në Prespë, në pjesën e Greqisë nga Ministrat e Punëve të Jashtme, Nikolla Dimitrov dhe Nikos Kotzias, në prani të kryeministrave, Zoran Zaev dhe Aleksis Cipras.

Nga përfaqësuesit ndërkombëtar në këtë akt që vlerësohet si një nga më të rëndësishmit që nga pavarësia e Maqedonia dhe përfundimi i konfliktit të vitit 2001, marrin pjesë ndërmjetësi i OKB-së, Metju, Shefja e diplomacisë evropiane, Federica Mogerini si dhe Rozmari Di Karko, përgjegjëse për çështje politike e sekretarit të përgjithshëm të OKB-së, Antonio Guteresh.

Pas nënshkrimit të marrëveshjes, dy delegacionet do të kalojnë në pjesën e territorit të Maqedonisë në një drekë solemne prej nga do të përcjellin mesazhe për paqe, fqinjësi të mirë dhe siguri në rajoni.

Marrëveshja që zgjidh kontesti mbi 25 vjeçar, zhbllokon procesin e integrimit të Maqedonisë në NATO dhe BE, por edhe normalizon raportet mes dy vendeve, që shpesh herë janë përcjell edhe me tensione dhe bllokada ekonomike.

BEOGRAD – Anëtarët e organizatës “Lëvizja Qytetarët e Lirë (PSG) u mblodhën sot para godinës së Presidencës Serbe në Beograd, me rastin e pesë mujorit të vrasjes së kreut të SDP-së, Oliver Ivanoviç, për të parashtruar pyetje në adresë të organeve të shtetit, se kush e vrau politikanin nga Mitrovica në Kosovë.

Ata paralajmëruan se çdo të premte të ardhshme do të protestojnë në të njëjtin vend, me të njëjtat pyetje se kush vrau Ivanoviçin.

Para Presidencës së Serbisë, PSG shpalosi një transparente me mbishkrimin “Kush e vrau Oliver Ivanoviçin?”.

Asembleisti i PSG-së, në qytetin e Beogradit, Pavle Grboviq, tha se shqetëson “heshtja e theksuar” e presidentit serb, Aleksandër Vuçiç, i cili disa herë premtoi se vrasësit e Ivanoviçit do të zbuloheshin.

“Pyesim Aleksandar Vuçiçin dhe të gjitha organet shtetërore se ku ka mbërritur hetimi për vrasjen e Oliver Ivanoviçit, a janë përfshirë autoritetet tona shtetërore në hetimin në fjalë, dhe nëse mungesa e rezultateve ka të bëjë se ata janë të paaftë ose për shkak se nuk duan ta bëjnë hetimin”, tha Grboviç.

Lideri i nismës qytetare “Liri, Demokraci, Drejtësi”, Oliver Ivanoviç, ka humbur jetën si pasojë e plagëve të marra nga një armë më 16 janar të këtij viti, përpara selisë së SDP-së në pjesën e Mitrovicës me shumicë serbe, ndërsa kohë më pas u arrestuan dy policë për manipulimin e provave nga terreni. aa

Për periudhën në fjalë eksportet më të mëdha në vendet e Ballkanit u realizuan në Bullgari me 1.1 miliardë dollarë, e cila ndiqet nga Greqia me 839.5 milionë dollarë, Sllovenia me 587.8 milionë dollarë dhe Serbia me 367.6 milionë dollarë

STAMBOLL – Eksportet e kompanive turke në Ballkan janë rritur me 22.1 për qind në 5 muajt e parë të vitit, duke arritur në 3 miliardë e 962 milionë e 246 mijë dollarë, ndërsa eksportet më të mëdha në vendet e Ballkanit janë realizuar në Bullgari me 1.1 miliardë dollarë.

Sipas të dhënave që AA ka përpiluar bazuar në të dhënat e Asamblesë së Eksportuesve Turq, theksohet se në 5 muajt e vitit në Ballkan janë kryer eksporte në vlerë 3 miliardë e 962 milionë e 246 mijë dollarë duke përfshirë kryesisht vendet Shqipëri, Bosnje dhe Hercegovinë, Bullgari, Kroaci, Kosovë, Maqedoni, Sllovaki, Serbi, Slloveni, Mali i Zi, Greqi dhe Rumani.

Teksa kjo shifër ka qenë në nivelin prej 3 miliardë e 245 milionë e 298 mijë dollarë në të njëjtën periudhë të vitit të kaluar, bëhet e ditur se eksportet në pozitën gjeografike të Ballkanit kanë shënuar rritje me 22.1 për qind në vitin e fundit.

Për periudhën në fjalë eksportet më të mëdha në vendet e Ballkanit u realizuan në Bullgari me 1.1 miliardë dollarë, e cila ndiqet nga Greqia me 839.5 milionë dollarë, Sllovenia me 587.8 milionë dollarë dhe Serbia me 367.6 milionë dollarë.

Po ashtu në të njëjtën periudhë, eksportet e kryera vazhdojnë me 211.5 milionë dollarë në Sllovaki, 190.8 milionë dollarë në Kroaci, 179.2 milionë dollarë në Bosnje dhe Hercegovine, 164.3 milionë dollarë në Maqedoni, 159.1 milionë dollarë në Shqipëri, 123.2 milionë dollarë Kosovë dhe 27.6 milionë dollarë në Mal të Zi.

Në eksportet e kryera këtë vit në vendet e Ballkanit, në krahasim me periudhën 5 mujore të vitit 2017 janë shënuar rritje në të gjithë vendet, ku rritja më e madhe është shënuar me 47.7 për qind në Kroaci, ku shifrat për 5 muajt e vitit të kaluar kanë qenë 129.2 milionë dollarë, ndërsa këtë vit kanë arritur në 190.8 milionë dollarë.

Gjithashtu në mesin e vendeve të Ballkanit pas Kroacisë rritje më e madhe është shënuar edhe në Bosnje dhe Hercegovinë me 37.2 për qind e cila ndiqet nga vendet Serbi me 37 për qind, Sllovakia me 36.5 për qind, Greqia me 35.3 për qind, Shqipëria me 25 për qind ,Mal të Zi me 24.6 për qind, Sllovenia me 22.6 për qind, Kosova me 21.3 për qind, Maqedonia me 17.9 për qind dhe me 3.7 për qind në Bullgari.

46 për qind e eksporteve në Ballkan janë nga Stambolli

Duke parë shpërndarjen e eksporteve të realizuara në 5 muaj të vitit në vendet e Ballkanit në bazë të qyteteve, vërehet se eksportet e realizuara në këtë pozitë gjeografike janë në shumën 1 miliard 826 milionë 183 mijë dollarë, ku Stambolli radhitet i pari me 46,1 për qind në totalin e eksporteve prej 3 miliard e 962 milionë e 246 mijë dollarë që janë kryer në vendet ballkanike.

Në eksportet më të mëdha të kryera, Stambolli ndiqet nga qytetet Kocaeli me 605,2 milionë dollarë, Bursa me 302,9 milionë dollarë, Izmir me 192,7 milionë dollarë, Ankara me 169,4 milionë dollarë, dhe Manisa me 102,3 milionë dollarë.

Industria e automobilave në eksportet në vendet e Ballkanit ka qenë sektori kryesues ku në periudhën janar-maj 2018 eksportet arritën në 829.5 milionë dollarë. Ky sektor është ndjekur nga artikujt dhe produktet kimike me 533.8 milion dollarë, tekstilet dhe lënda e parë me 427.9 milionë dollarë, veshjet e gatshme dhe konfeksionet me 332.9 milionë dollarë dhe 321.1 milionë dollarë për sektorët elektirkë, elektronikës dhe të shërbimeve.

Ndërsa sektori ku janë shënuar më pak eksporte për të njëjtën periudhë ka qenë sektori i bimëve dekorative me 2 milionë e 253 mijë dollarë.

Sipas të dhënave nga Asambleja e Eksportuesve Turq, shuma e eksportit (mijë dollarë) dhe shkalla e rritjes së eksporteve në vendet e Ballkanit për periudhën janar-maj 2017 dhe 2018 janë si më poshtë:

Presidenti i Serbisë Aleksandër Vuçiç njoftoi në një konferencë të jashtëzakonshme për media se gazetari serb Stefan Cvetkoviq është gjetur i gjallë.

“Atij nuk i mungon asnjë fije floku”, tha Vuçiq për gazetarët në Beograd, dhe shtoi se Cvetkoviq është në duart e Policisë, ku do të mbetet për disa kohë derisa të merret në pyetje.

Zhdukja e Cvetkoviqit është raportuar më 13 qershor, pasi vetura e tij ështe gjetur e braktisur në qytetin Bela Crkva, rreth 100 kilometra në lindje të Beogradit.

Cvetkoviq është ankuar vazhdimisht se ka marrë kërcënime me vdekje, derisa më 2008 ai është rrahur nga sulmues të panjohur.

Në periudhën e fundit ai ka përcjellur hetimet për vrasjen e politikanit serb në Mitrovicën e Veriut, Oliver Ivanoviq.

Nga sot emri i ri i do të jetë Republika e Maqedonisë së Veriut, nacionaliteti maqedonas të veriut, gjuha maqedonase dhe po ashtu do të përkthehet në të gjitha gjuhët e botës.

Një marrëveshje “që ruan trashëgiminë kulturore të lashtë të Maqedonisë greke dhe ofron ndryshime të gjerë në Kushtetutën e vendit fqinj,” u dërgua këtë pasdite në Presidencë, nga kryeministrit Aleksis Tsipras për të informuar Prokopis Pavlopulos, ndërsa emri i ri i Maqedonisë do të jetë Republika e Maqedonisë së Veriut.

Kryeministri grek, i tha Presidenti i Republikës se tashmë ka një marrëveshje për një çështje që rrënoi për vite me radhë politikën greke të jashtme, një marrëveshje e mirë dhe e dobishme për Greqinë në lidhje me emrin e vendit fqinj.

“Lajm i mirë. Ne kemi arritur një marrëveshje me kryeministrin maqedonas për një çështje që na intereson shumë vite,” i tha Tsipras Presidentit të Republikës.

“Ne kemi një marrëveshje të mirë, e cila mbulon të gjitha kushtet e vendosura nga pala greke të cilët janë bazat e asaj që ne e quajmë linjën kombëtare: Ne kemi një emër të përbërë me përcaktim gjeografik, si jashtë vendit dhe bilateral, ndërkombëtare si dhe brenda. Pra, fqinjët marrin detyrimin tonë për rishikim kushtetues”, tha ai.

Ai theksoi se marrëveshja parashikon ndryshime përtej emrit. Më e rëndësishmja, kjo marrëveshje është për të siguruar dhe mbrojtur trashëgiminë kulturore dhe trashëgiminë e lashtë të Maqedonisë greke, theksoi kryeministri, duke vënë në dukje se ka pasur disa në të kaluarën të cilët janë përpjekur për të përvetësuar këtë trashëgimi, “kjo ishte një pengesë e përhershme të marrëdhënieve mes dy vende”.

Marrëveshja do të ratifikohet nga pala greke, pas rishikimit kushtetues në Shkup.

Fjala e deputetit grek Manolis Glezios nga partia SYRIZA. Ai duke treguar me fakte se ka plot politikanë grekë me prejardhje Arvanitase, nënvizon faktin se duhet gjetur  një gjuihë të përbashkët për fqinjësi të mirë dhe bashkëjetesë midis dy popujve tanë. “Ne i kemi këngët dhe vallet e përbashkëta”, thotë Glezioz, një figurë shumë e shquar si shkrimtar, njeri i letrave, politikan dhe antifashist. “Mund të kesh probleme në familje, por me fqinjin duhet të kesh marrëdhënie shumë të mira”, thotë ai, gjithmonë duke iu referuar fqinjësisë midis grekëve dhe shqiptarëve. Këto marrëdhënie duhet t’i fuqizojë edhe fakti se arvanitasit janë pjesë integrale e Greqisë.

Nderime për Manolis Glezioz!

Nga: Ira Londo

“Janë gafa të gjitha lëvizjet, ashtu si gafat që bëjnë sa pretendojnë këtu se janë pasardhës të Grekeve të Lashtë. Aleksandri i Madh nuk ishte Nenë Tereza e Shqiptareve, ishte një gjeneral që vriste e priste për të sunduar. Emri i ri i Maqedonisë të këtë vetëm përcaktim gjeografik, Maqedonia e Epërme ose Maqedonia Veriore”- ka thënë ish zëvendës kryeministri i Greqisë.

Pangalos ka theksuar se zgjidhja e çështjes së emrit është e domosdoshme, për të parandaluar krijimin e Shqipërisë se Madhe apo Bullgarisë së Madhe në kufijtë e Greqisë. Se fundi Pangalos i është referuar edhe gjyshes së tij arvanitase shqipfolese që sipas tij është “më shumë greke se grekët”.

Ministri grek i Mbrojtjes, Panos Kammenos ka bere nje deklarate te forte qe ka ngjallur shume reagime. Ai ka deklaruar se Greqia së shpejti do të zgjerojë hapesiren e ujerave te veta territoriale, ne kuader te njohjes se zonave ekskluzive ekonomike (ZEE).

Sipas mediave greke, Kammenos ka thene se Greqia me njohjen se shpejti te zonave ekonomike ekskluzive (EEZ) do të fillojë të punoje per shfrytezimin e pasurisë nën det, per prodhimin e gazit natyror dhe ndoshta naftës më vonë.

Siç tha ai, “ne jemi në një moment te rendesishem në historinë e kombit, shumë shpejt do të “zgjerojmë” ujërat tona territoriale, njohjen e ZEE, shfrytëzimin e pasurisë nënujore dhe vendi ynë do të hyjë në një epokë të re”.

Me tej, duke dashur te shmange keqkuptimet theksoi se nuk behet fjale per nje zgjerim ne kuptimin fillestar te fjales.

Nga: Erion Kaçorri, Turqi

“Paqja botërore nuk është e mundur nëse struktura multikulturore, shumëgjuhësore dhe multireligjioze e Ballkanit nuk bëhet simbol i qetësisë, paqes dhe bashkëjetesës”, theksoi në fjalimin e tij Cavusoglu.

Ndërkohe sipas presidentit të TIKA-s Serdar Cam dallimet në rajon në fakt ishin një shembull i pasurisë që karakterizon Ballkanin. “Qytetarët e Ballkanit, të cilët kanë gjuhë, kulturë dhe fe të ndryshme, kanë treguar shumë mirë se si kanë jetuar së bashku dhe janë bërë model për të gjithë globin” deklaroi Cam.

Sipas mendimtarit turk Ibrahim Kalin, këshilltar i presidentit te Turqise, kombet e ndryshme të Ballkanit e kanë parë Turqinë dhe Perandorinë Osmane si pjesë të së njëjtës imagjinatë gjeopolitike. “Kjo mund të duket shumë romantike apo idealiste për disa, por realiteti është se turqit, shqiptarët, boshnjakët dhe të tjerët ndërtuan një kulturë dhe qytetërim që shkoi përtej vijave kufitare të rajonit. “Askush nuk mund të studiojë dhe të kuptojë jetën kulturore, fetare, artistike dhe politike osmane pa pranuar kontributet kryesore të figurave letrare, shkencore dhe politike të prejardhjes ballkanike” deklaroi Kalin i cili gjithashtu u kujtoi te pranishmeve ne kete samit se ishte Sami Frasheri nga Shqiperia autori i fjalorit të parë të rëndësishëm osman. Sipas Kalin, Turqia nuk sheh ndonjë kontradiktë mes zhvillimit të marrëdhënieve të mira me Serbinë nga njëra anë dhe Bosnje-Hercegovinës nga ana tjetër. Sipas tij përpjekjet e Turqisë për të ndikuar në njohjen e shtetit të Kosovës nga komuniteti ndërkombëtar ndihmojnë më shumë sesa pengojnë përpjekjet për paqe në rajon. Gjatë samitit të Ankarasë u analizuan zhvillimet e fundit në Ballkan, e ardhmja e rajonit, nevoja për vazhdimësinë e multikulturalizmit si dhe Identitetet Natyrore dhe Fiktive në Ballkan.

Pamje nga burgu, Guantanamo Bay.

Gjyqtarët evropianë kanë vendosur se Lituania dhe Rumunia kanë shkelur të drejtat e dy terroristëve të dyshuar të Al-Kaidës, duke lejuar CIA-n t’i torturojë ata.

Shtetet e Bashkuara kishin arrestuar Abu Zubaydah dhe Abd al-Rahim al-Nashiri, pas sulmeve të 11 shtatorit më 2001 dhe tani gjenden në burgun, Guantanamo Bay.

CIA ka vepruar në burgje të fshehta në disa shtete, duke përfshirë Lituaninë dhe Rumaninë.

Gjykata Evropiane për të Drejtat e Njeriut (ECHR), ka thënë se dy shtetet kanë shkelur ligjin evropian për ndalim të torturës.

Ekzistenca e të ashtuquajturave “vendet e errëta” të CIA-s për marrje në pyetje, është mbajtur sekret për shumë vjet, pas sulmit të 11 shatorit.

Abu Zubaydah, palestinez i lindur në Arabinë Saudite, është thënë se ka qenë shef i rekrutimit në kuadër të Al-Kaidës në vitet 1990 dhe më vonë është bërë organizator kyç që ka lidhur Osama Bin Laden me rrjete tjera të Al-Kaidës.

Sipas inteligjencës amerikane, Abd al-Nashiri, i lindur po ashtu në Arabinë Saudite ka udhëhequr operacionet e Al-Kaidës në rajonin e Gjirit Arab.

Gjykata Evropiane ka thënë se njëri nga burgjet e CIA-s ka qenë në territorin e Rumanisë, ku Abd al-Nashiri është përballur me “regjim tejet të ashpër të burgimit”.

I njëjti vendim është shpallur edhe kundër Lituanisë, duke ngritur shqetësime për trajtimin e Abu Zubaydah në periudhën kohore 2005-2006.

Gjyqtarët kanë cituar dokumente të CIA-s, sipas të cilave të dyshuarit për terrorizëm janë përballur me izolim, përdorimin të vazhdueshëm të prangave në këmbë dhe ekspozim të tepruar ndaj zhurmës dhe dritës. rel

Ministri i Jashtëm serb, Ivica Daçiç, ka thënë se disa përfaqësues shqiptarë kanë folur se ndarja është zgjidhja më e mirë për Kosovën.

Sipas tij, pala kosovare pa praninë e ndërkombëtarëve, do të pranonte edhe ndarjen.

“Unë vazhdoj të them se shqiptarët, kur do të fillonim të bisedonim me ta pa mentorët e tyre, do të pranonin për ndarjen e Kosovës, pasi kjo edhe për ata do të ishte një zgjidhje e mirë”, tha ai transmeton Novosti.

“Duhet të pranoj që presidenti Aleksandër Vuçiq ka bartur mjaft ngarkesë kur bëhet fjalë për kërkimin e zgjidhjeve për Kosovën. E dini, nuk është aspak e lehtë të diskutohet dhe të bindet një pjesë e mirë e bashkësisë ndërkombëtare që t’i rishikojë gabimet e tyre. Shumë nga Perëndimi nuk dëshirojnë të pranojnë asgjë përveç përmbushjes së të gjitha kërkesave të shqiptarëve. Kjo nuk mundet. Serbëve kurrgjë, e shqiptarëve të gjitha. E çfarë janë pastaj këto bisedime? Këto janë ultimatume”, u shpreh ai.

Daçiq ka folur edhe për përballjet me ambasadoren e Kosovës në Uashington, Vlora Çitaku.

“E keni parë që ndaj çdo argumenti tim në OKB, Vlora Çitaku përmendi Sllobodan Millosheviçin. Aman, njerëz, lini njeriun, ai ka vdekur, hajde të zgjedhim problemet”, theksoi ai.

I pyetur se me cilin përfaqësues nga Prishtina Serbia do të gjente gjuhën e përbashkët, Daçiq tha se është e vështirë të bisedohet me Behgjet Pacollin, Ramush Haradinaj dhe Hashim Thaçin.

SELANIK – Gjatë fjalës së tij nga Selaniku, Kryeministri grek, Aleksis Cipras tha se Greqia në negociatat për çështjen e emrit të Maqedonisë synon të marrë diçka që të tjerët e kanë dorëzuar para më shumë se 70 vjetësh. Ai tha se fqinjët veriorë nuk kanë asnjë lidhje me Aleksadrin e Madh dhe se kanë rrënjë sllave dhe shqiptare.

“Fqinjët tanë veriorë për mbi 70 vjet kanë një entitet shtetëror, qoftë në kuadër të Federatës Jugosllave, qoftë si shtet i pavarur më vonë pas shpërbërjes së Jugosllavisë, që quhet Maqedoni dhe mbajnë një emër i cili, pa asnjë referencë tjetër revokon botën antike greke dhe trashëgiminë e rëndë kulturore të Maqedonisë greke. Këtë po shkojmë të marrim. Nuk është e lehtë. Disa budallenj na thonë se po shkojmë të japim. Shkojmë që të marrim, jo që të japim.

Po shkojmë të pajtohemi me fqinjët tanë të cilët kanë një entitet shtetëror që për 70 vjet quhet Maqedoni, por që nuk ka asnjë lidhje me Aleksandrin e Madh dhe rrugëtimin e tij historik. Kanë rrënjë sllave dhe shqiptare dhe këtë ata e pranojnë. Nëse fitojmë përcaktues para emrit Maqedoni është fitore e madhe dhe akoma më e madhe nëse merremi vesh se tjetër është Maqedonia ynë që vjen nga tradita e lashtë e botës antike greke, ndërsa tjetër është tradita e tyre dhe shenja e tyre kulturore”– deklaroi Aleksis Cipras.

Xhon Keri dhe Aleksandër Vuçiç, Beograd 2015

Ish sekretari i SHBA-së Xhon Keri dhe biznesmeni amerikan Tim Kolins janë takuar sot në Beograd, pa asnjë paralajmërim, me presidentin e Serbisë Aleksandër Vuçiq dhe kryeministren e shtetit Ana Brnabiq.

Sipas një deklarate të lëshuar nga kabineti i presidentit Vuçiq temë e bisedimeve ishte ruajtja e paqes dhe e stabilitetit në rajon. Gjithashtu, thuhet se në këto takime është diskutuar edhe për investimet amerikane në Serbi.

Në deklaratë bëhet e ditur se Serbia do të investojë edhe më shumë në zhvillimin e sektorit të teknologjisë së informacionit.

“Forcimi i sektorit të teknoligjisë së informacionit do të rrisë zhvillimin e ekonomisë serbe dhe do të kontribuojë ndjeshëm në rritjen e prodhimit të brendshëm”, thuhet në deklaratën e presidencës serbe.