Kryeministri Edi Rama është përfshirë në një debat me gazetarin amerikan Andrew Callaghan të Channel 5, gjatë një interviste ku u përball me pyetje të drejtpërdrejta për korrupsionin në administratën e tij dhe përgjegjësinë e Partisë Socialiste.

Callaghan e pyeti Ramën nëse akuzat dhe dënimet për korrupsion ndaj zyrtarëve të qeverisë së tij mund të tregojnë se korrupsioni është i përhapur brenda partisë që ai drejton.

Gazetari theksoi se Rama i trajton këto raste si çështje të përgjegjësisë individuale, duke shmangur kritikën ndaj vetë strukturave të partisë.

“Pika është se ata dënohen për korrupsion, pas së cilës ju shpesh i denonconi dhe e trajtoni këtë si çështje të përgjegjësisë individuale dhe dështimit moral personal, duke shmangur kritikën se korrupsioni mund të jetë i përhapur në vetë partinë tuaj”, u shpreh Callaghan.

Në përgjigje, Rama këmbënguli se përgjegjësia për veprimet e individëve është personale. “Gjithçka që ka të bëjë me individët është çështje e përgjegjësisë individuale”, tha kryeministri.

Gazetari këmbënguli në pyetjet lidhur me korrupsionin, ndërsa në pamjet e dokumentarit shfaqeshin akuzat penale të zyrtarëve të qeverisë Rama, mes tyre edhe ato të ish-zv/kryeministres Belinda Balluku. Ai e pyeti gjithashtu Ramën se si ndihej kur persona në administratën e tij ose pranë tij përballeshin me akuza dhe dënime për korrupsion.

Kryeministri refuzoi të përgjigjej duke u shprehur: “Nuk kam ardhur këtu të ndaj ndjenjat e mia me ju, djalosh. Kam ardhur t’u përgjigjem pyetjeve për fakte”.

Callaghan i kujtoi se si kryeministër, ndjenjat dhe qëndrimet e tij për të ardhmen e vendit kanë rëndësi, por Rama e ndërpreu duke e pyetur se çfarë synonte të përcillte për publikun.

“Çfarë doni t’i thoni publikut tuaj? Keni ardhur nga Amerika për të bërë çfarë? Për të bërë thashetheme me mua këtu?”, u shpreh kryeministri.

Gazetari iu përgjigj se qëllimi i tij ishte t’i jepte mundësinë Ramës të sqaronte çështjet e ngritura, por kryeministri reagoi: “Jo, nuk kam nevojë për mundësitë tuaja”.

Pjesë nga intervista:

Andrew Callaghan: Pika është se ata dënohen për korrupsion, pas së cilës ju shpesh i denonconi dhe e trajtoni këtë si çështje të përgjegjësisë individuale dhe dështimit moral personal, duke shmangur kritikën se korrupsioni mund të jetë i përhapur në vetë partinë tuaj. Po, për këtë e kam fjalën. Ju e trajtoni si çështje të përgjegjësisë individuale.

Edi Rama: Gjithçka që ka të bëjë me individët është çështje e përgjegjësisë individuale. Por unë po flas për rastin kur bëhet fjalë për korrupsionin.

Andrew Callaghan: Pra, mendoni se nëse keni njerëz në administratën tuaj ose pranë jush që dënohen për korrupsion…

Edi Rama: Jo, por si e dini ju se si ndihem unë? Çfarë dini ju për ndjenjat e mia?

Andrew Callaghan: Po ju pyes.

Edi Rama: Por çfarë do të thotë se si ndiheni? Çfarë është kjo?

Andrew Callaghan: Po ju pyes se si ndiheni.

Edi Rama: Nuk kam ardhur këtu të ndaj ndjenjat e mia me ju, djalosh. Kam ardhur t’u përgjigjem pyetjeve për fakte.

Andrew Callaghan: Dua të them, ju jeni edhe kryeministër, ndaj ndjenjat tuaja për të ardhmen e vendit…

Edi Rama: Po, jam kryeministër, sigurisht. Përndryshe, nuk do të ishim takuar kurrë. Por cila është pika juaj? Çfarë doni të thoni? Çfarë doni t’i thoni publikut tuaj? Keni ardhur nga Amerika për të bërë çfarë? Për të bërë thashetheme me mua këtu?

Andrew Callaghan: Jo, për t’ju dhënë mundësinë të sqaroni gjërat.

Edi Rama: Jo, nuk kam nevojë për mundësitë tuaja.

Edi Rama: Jam këtu vetëm për t’ju mirëpritur, me respekt, duke ju kushtuar kohën time të çmuar. Dhe ju duhet ta përdorni kohën time me respekt.

Andrew Callaghan: Epo, ju pyeta për një investitor strategjik që u arrestua, dhe më pas ju më thatë se nuk jeni investitor strategjik. Mos më pyesni për këtë.

Edi Rama: Unë ju dhashë përgjigjen. Nuk thashë se ju nuk jeni investitor strategjik. Thashë se ju…

Andrew Callaghan: Ju thatë se nuk e dini se çfarë do të thotë kjo.

© Panorama.al