Nuk ka fatkeqësi më të madhe për një komb sesa kur budallenjtë flasin në emër të patriotëve.

Kjo pastaj duket në gjithçka, edhe në qëndrimin ndaj marrëdhënieve mes shteteve.

Sulmi i budalltë i shypeve ndaj presidentit ukrainas, Zelenskit, pas vizitës së tij në Beograd, është një shembull i kësaj fatkeqësie…

Vizita e kryetarit ukrainas në Serbi realisht nuk i sjell asgjë të keqe Kosovës.

Ai tash e gati pesë vjet është në luftë me Rusinë dhe ka nevojë për municion. Serbia prodhon municion dhe armë konvencionale. Ukraina ka nevojë për to. U krye puna.

Një kanalist, e bir kanalisti, shkoi edhe më larg: Kosova po ia mbyll vetes dyert në Ukrainë.

Rrenë sa bjeshka.

Në gjendjen ku ndodhet, Ukraina nuk e njeh Kosovën – dhe kjo për shumë arsye.

Nuk është fundi i botës.

Ukraina po i bën një shërbim të madh Evropës, e vetvetiu edhe Kosovës.

Po ia thyen kurrizin Rusisë.

Falë Ukrainës, tash Rusia po ndahet nga Evropa me pesë shtete ushtarakisht të fuqishme, që ia ndalin turrin drejt Evropës përgjithmonë: Suedia, Finlanda, Polonia, Ukraina, Rumania… Ky është një brez sigurie që më parë nuk ka mundur as të imagjinohet.

NATO-ja nuk ka më nevojë të lodhet me Rusinë…

Kjo është tepër e rëndësishme. Prandaj mos e prekni flamurin heroik të Ukrainës. Por nderojeni sa herë të ndodheni pranë tij.

E për sa i përket grimasave ngadhënjyese të Vuçiqit, ju siguroj se ai më me kënaqësi do ta merrte ngryk Bollën e madhe se Zelenskin, por kështu ia ka kërkuar regjia e Teatrit të madh të gjeopolitikës. E vozhdi i gjatë është aktor që nuk ia prish regjizorit tymin e duhanit. Sepse e do pushtetin më shumë se këndoqoftë tjetër.

Të tjerat janë përralla kanalistësh, që, aktualisht, problem kryesor në jetën e tyre e kanë pse Albin Kurti po i fiton votat.

Ndërsa Kosova e ka një hall krejt tjetër: pse Albin Kurti nuk po di çka të bëjë me votat që po ia jep populli.

Në këtë dynja, kurrkush pa halle…