Akuzat për korrupsion që po qarkullojnë rreth socialistëve të kryeministrit spanjoll Pedro Sánchez vazhdojnë të shtohen.

Policia bastisi të mërkurën selinë qendrore në Madrid të Partisë Socialiste të kryeministrit spanjoll Pedro Sánchez, duke e zhytur edhe më thellë një nga liderët progresistë më të njohur të Europës në skandalet e korrupsionit që po afrohen gjithnjë e më shumë pranë zemrës së qeverisë së tij.

Përveç kontrollit në zyrat qendrore të socialistëve, policia zhvilloi kontrolle edhe në banesa private dhe shpalli akuza të reja për korrupsion. Hetimet lidhen me financim të paligjshëm të partisë, trafik influence dhe vepra të tjera penale.

Bastisjet e së mërkurës erdhën pas padisë së ngritur më 19 maj ndaj ish-kryeministrit socialist José Luis Rodríguez Zapatero, mentor politik dhe aleat i afërt i Sánchez. Zapatero u bë ish-kryeministri i parë që përballet me akuza penale që nga rikthimi i demokracisë në Spanjë në vitin 1975.

Një gjykatës i Gjykatës Kombëtare e akuzoi Zapateron për pastrim parash, trafik influence dhe vepra të tjera që lidhen me paketën e shpëtimit prej 53 milionë eurosh për kompaninë ajrore “Plus Ultra” gjatë pandemisë së Covid-19 në vitin 2021.

Në atë kohë, Pedro Sánchez ishte kryeministër. Në dhjetor, policia arrestoi presidentin dhe drejtorin ekzekutiv të kompanisë nën akuzat për pastrim parash të lidhura me Venezuelën. Kompania kryente kryesisht fluturime mes Spanjës dhe Amerikës Latine.

Më 19 maj, policia bastisi zyrën e Zapateros në Madrid dhe sekuestroi dokumente si edhe bizhuteri luksoze, përfshirë varëse me diamante, gurë të çmuar, ora luksoze dhe zinxhirë ari, raportuan mediat spanjolle. Zyra e tij ndodhet pranë selisë së Partisë Socialiste.

Përveç Zapateros, në çështje korrupsioni janë përfshirë edhe bashkëshortja e Sánchez, vëllai i tij dhe ish-zyrtarë të lartë socialistë. Në nëntor të vitit të kaluar, ish-prokurori i përgjithshëm Álvaro García Ortiz u shpall fajtor për publikimin e informacionit konfidencial kundër opozitës konservatore.

Kjo ishte bastisja e dytë në selinë e socialistëve në Madrid brenda një viti.

Qershorin e kaluar, agjentët antikorrupsion kontrolluan zyrat pas akuzave për ryshfet ndaj Santos Cerdán, një nga bashkëpunëtorët më të afërt të Sánchez dhe ish-numri tre i PSOE-së. Të mërkurën, Cerdán u përball me akuza të reja dhe policia kontrolloi edhe banesën e tij. Ai akuzohet se ka marrë komisione nga kompani në këmbim të dhënies së kontratave publike.

Prokurorët nuk e kanë shpallur Sánchez të dyshuar, por gjatë dëshmive të fundit në gjykatë, biznesmeni Víctor de Aldama e akuzoi atë si drejtues të një skeme për manipulimin e kontratave publike dhe kanalizimin e parave drejt arkave të partisë. Aldama po bashkëpunon me hetuesit.

Skandalet kanë rënduar ndjeshëm mbi socialistët e qendrës së majtë dhe kanë forcuar kundërshtarët e tyre të djathtë, Partinë Popullore konservatore dhe Vox-in e ekstremit të djathtë. Këto parti kanë fituar disa zgjedhje rajonale së fundmi, ndërsa socialistët kanë pësuar humbje të mëdha.

Që pas hetimeve ndaj Zapateros, qeveria e brishtë e Sánchez është përballur me presion edhe më të madh, ndërsa opozita konservatore kërkon zgjedhje të reja.

“Sa bastisje të tjera? Sa komisione? Sa ryshfete? Sa para në çanta? Sa bizhuteri? Sa hetime të tjera?”, deklaroi lideri i Partisë Popullore, Alberto Núñez Feijóo.

Ai u bëri thirrje partive të vogla të majta dhe nacionalistëve baskë e katalanas të ndërpresin mbështetjen për qeverinë Sánchez, të cilën e cilësoi si “një qeveri që kundërmon”.

Fernando Casal Bértoa shprehu dyshime se Sánchez do të japë dorëheqjen.

“Në rrethana normale, ai do të dorëhiqej dhe do të shpallte zgjedhje të reja. Por Sánchez është një kafshë politike që di të mbijetojë”, tha ai.

Sipas tij, partitë baske dhe katalanase kanë frikë të rrëzojnë Sánchez, pasi Partia Popullore dhe Vox kundërshtojnë dhënien e më shumë autonomisë rajoneve.

Në zgjedhjet parlamentare të vitit 2023, e djathta nuk arriti të siguronte shumicën dhe Sánchez bëri lëshime ndaj partive nacionaliste rajonale për të qëndruar në pushtet.

Casal Bértoa paralajmëroi se skandalet mund të shkaktojnë dëme serioze për socialistët, veçanërisht nëse hetimet zbulojnë lidhje mes zyrtarëve të lartë të qeverisë, Zapateros dhe shpëtimit financiar të “Plus Ultra”.

Të mërkurën, gjatë një vizite në Vatikan, Sánchez mbajti konferencën e parë për shtyp që pas hetimeve ndaj Zapateros. Kryeministri spanjoll deklaroi se do të bashkëpunojë me hetuesit dhe mohoi akuzat për financim të paligjshëm të partisë.

Ndërkohë, një gjyqtar ngriti akuza edhe ndaj Ana Fuentes, menaxhere e Partisë Socialiste, e dyshuar për ngritjen e një sistemi pagesash që synonte diskreditimin e gjyqtarëve, prokurorëve dhe agjentëve antikorrupsion.

“Ajo është një grua që ka menaxhuar me përpikëri financat e Partisë Socialiste”, tha Sánchez për Fuentes.

Ai pranoi se ekziston “shumë spekulim” rreth financimeve të parregullta, por shtoi se do të “veprojë me vendosmëri” nëse dalin prova konkrete. /Përshtatur nga “Courthouse News”/Pamfleti