Presidenti amerikan Donald Trump është vënë në shënjestër të disa tentativave për vrasje, incidenteve të sigurisë dhe kërcënimeve të dhunshme gjatë rrugëtimit të tij politik, nga tubimet elektorale deri te aktivitetet zyrtare.

Interesi për sigurinë e tij u rrit sërish të shtunën, më 25 prill, kur ai dhe Zonja e Parë Melania Trump u larguan me urgjencë nga darka e Shoqatës së Korrespondentëve të Shtëpisë së Bardhë, pas një incidenti sigurie.

Ngjarja ringjalli shqetësimet për mbrojtjen e tij, rreth dy vite pas një tentative të konfirmuar për vrasje dhe në një klimë frike në rritje për dhunë politike në Shtetet e Bashkuara.

Më poshtë paraqitet një përmbledhje e tentativave të konfirmuara dhe incidenteve më serioze të sigurisë që lidhen me Trump:

25 prill 2026: Të shtëna në darkën e gazetarëve

Trump dhe Melania u larguan menjëherë nga darka e Shoqatës së Korrespondentëve të Shtëpisë së Bardhë në Uashington, pasi zhurma të forta dhe një incident sigurie shkaktuan panik mes të pranishmëve.

Duke folur pas ngjarjes, Trump deklaroi se një burrë “i armatosur me disa armë” tentoi të kalonte një pikë kontrolli sigurie në hotelin Washington Hilton, por u arrestua nga policia. Një agjent u plagos nga një e shtënë, por shpëtoi falë jelekut antiplumb.

“Nuk është hera e parë vitet e fundit që demokracia jonë sulmohet nga një vrasës i mundshëm,” tha Donald Trump për gazetarët pas incidentit. Edhe pse pranoi rritjen e kërcënimeve, ai theksoi se nuk ka ndërmend të kufizojë daljet publike.

“Nuk do të lejojmë askënd të marrë kontrollin e shoqërisë sonë,” u shpreh ai, duke shtuar: “Nuk do të anulojmë aktivitetet, sepse nuk mund ta bëjmë këtë.” Ai njoftoi gjithashtu se darka e korrespondentëve do të organizohet sërish së shpejti. Autoritetet nuk e kanë cilësuar zyrtarisht incidentin si tentativë vrasjeje.

Shtator 2024: Kërcënim në një fushë golfi në Florida

Agjentët parandaluan atë që FBI e përshkroi si një tentativë të mundshme vrasjeje, ndërsa Trump po luante golf në klubin e tij në West Palm Beach, Florida. Policia identifikoi një person të armatosur të fshehur në shkurre dhe hapi zjarr para se ai të afrohej.

Trump nuk u lëndua, ndërsa reagimi i shpejtë konfirmoi nivelin e lartë të gatishmërisë pas incidenteve të mëparshme. I dyshuari, Ryan Wesley Routh, u identifikua me pushkë, një agjent i Shërbimit Sekret qëlloi në drejtim të tij, ai u arratis përkohësisht dhe më pas u arrestua. Aktualisht po vuan dënim me burgim të përjetshëm.

13 korrik 2024: Të shtëna në një tubim në Pensilvani

Sulmi më i rëndë ndodhi në një tubim në Butler, Pensilvani, kur një person i armatosur hapi zjarr drejt skenës, duke plagosur lehtë Trump në veshin e djathtë dhe duke vrarë një spektator. Autori, i identifikuar nga FBI si 20-vjeçari Thomas Matthew Crooks, u vra nga policia.

Autoritetet federale e cilësuan ngjarjen si tentativë vrasjeje dhe arritën në përfundimin se ai kishte vepruar i vetëm. Ngjarja shkaktoi tronditje dhe çoi në hetime për mangësi në siguri, ndërsa disa agjentë u përballën me masa disiplinore.

5 nëntor 2016: Alarm për “armë” në Reno

Pak ditë para zgjedhjeve të vitit 2016, Trump u largua me urgjencë nga skena gjatë një tubimi në Reno, Nevada, kur dikush bërtiti “armë”. Më vonë u konstatua se personi nuk ishte i armatosur, por reagimi i autoriteteve ishte i menjëhershëm dhe aktiviteti u ndërpre përkohësisht.

18 qershor 2016: Tentativë për të rrëmbyer armën në Las Vegas

Gjatë fushatës së tij të parë elektorale, një shtetas britanik tentoi të rrëmbente armën e një polici në një tubim në Las Vegas. Autoritetet raportuan se i dyshuari kishte pranuar synimin për të vrarë Trump. Ai u arrestua në vend, u dënua dhe më pas u deportua në Mbretërinë e Bashkuar.

12 mars 2016: Sulm në skenë në Ohio

Në një aktivitet elektoral në Dayton, Ohio, një burrë vrapoi drejt skenës përpara se të neutralizohej nga policia. Edhe pse nuk iu gjet armë, incidenti u konsiderua kërcënim serioz për sigurinë, ndërsa autori u dënua më vonë me masë mbikëqyrjeje.