Ndërsa pesë vende të rajonit kanë nisur operacionet për evakuimin e qytetarëve nga Lindja e Mesme për shkak të luftës, Shqipëria nuk ka ndërmarrë ende asnjë veprim. Rreth 3 mijë shqiptarë ndodhen aktualisht në Emiratet e Bashkuara Arabe, mes tyre edhe zyrtarë shtetërorë, ndërsa gjyqtarja e posaçme Ëngjëllushe Tahiri raportohet se është bllokuar prej ditësh në Dubai…

Ndonëse e mban veten si lider global dhe nuk lë rast pa bërë protagonistin përballë udhëheqësve të tjerë ndërkombëtarë, kur vjen puna te hallet e popullit, Edi Rama nuk e vret shumë mendjen.

Afro 3 mijë shqiptarë janë bllokuar në Lindjen e Mesme për shkak të luftës dhe Shqipëria është i vetmi shtet në rajon që ngre supet.

Mali i Zi ka disa ditë që ka kryer fluturime emergjente në Egjipt dhe shtetet e tjera të Lindjes së Mesme për të evakuuar stafet e ambasadave dhe qytetarët që u kapën në befasi atje.

Greqia ka kryer dje një operacion riatdhesimi në Oman, teksa ka njoftuar se një fluturim special do të bëhet nga Dubai, në orën 21:30, në koordinim me Ministrinë e Punëve të Jashtme.

Një fluturim i ri riatdhesimi përsëri nga Omani do të zhvillohet nesër, me kapacitet më pak të kufizuar. Në të njëjtën kohë, një aeroplan C-130 ka shkuar në Abu Dhabi për të riatdhesuar 90 grekë. Gjithashtu, një aeroplan i Air Arabia nga Sharjah në Emiratet e Bashkuara Arabe mbërriti së fundmi në Aeroportin Eleftherios Venizelos me disa grekë.

E njëjta gjë ka ndodhur me Kroacinë. Duke folur për përpjekjet e evakuimit deri më tani, kryeministri Plenković theksoi se shumica e qytetarëve kroatë tashmë janë larguar nga zonat e prekura nga kriza. “Të gjithë qytetarët kroatë që dëshironin të largoheshin nga Irani, Izraeli dhe Jordania tani janë evakuuar plotësisht”, tha ai. Ai shtoi se një numër qytetarësh ishin evakuuar gjithashtu nga Omani.

Dje, ministri i Punëve të Jashtme i Serbisë, Marko Gjuriq, tha se Serbia ishte e para që filloi fluturimet e evakuimit nga vendet e prekura nga konflikti midis SHBA-së dhe Izraelit me Iranin, me qëllim evakuimin e qytetarëve të saj nga ato territore, si dhe qytetarëve të vendeve në rajon.

Shkupi njoftoi se deri më tani, 632 qytetarë maqedonas kanë kërkuar evakuim; disa do të kthehen me fluturime çarter, disa me aeroplan qeveritar.

Ndërkohë, nga qeveria shqiptare nuk ka asnjë lëvizje. Sipas Ministrisë së Jashtme, në Emirate aktualisht ndodhen afro 3 mijë shqiptarë, 1500 rezidentë, shumica në Dubai. Ndërkohë, afro 1500 të tjerë ndodhen atje për qëllime turistike, 500 nga të cilët janë vetëdeklaruar në ambasadë që ndodhen në Emiratet e Bashkuara Arabe. Mes personave të bllokuar atje ka dhe zyrtarë të shtetit.

Sot u bë me dije se gjykatësja e posaçme Ëngjëllushe Tahiri është bllokuar në Dubai; ka 5 ditë që nuk zhvillohet asnjë nga gjyqet e saj në Gjykatën Speciale GJKKO. Sipas burimeve, atje kanë ngecur drejtorë dhe zyrtarë të tjerë të shtetit. Por deri më tani qeveria shqiptare nuk ka bërë asnjë lëvizje për riatdhesimin e personave të bllokuar.

Ndryshe nga të gjitha shtetet e rajonit, ku kanë linjat e tyre ajrore, Shipëria ka mbetur me duar në xhepa. “Air Albania” që promovoi me shumë bujë Rama, tani ka falimentuar dhe Shqipëria nuk ka linja të sajat. Kur vjen puna tek udhëtimet e tij private, Rama nuk i ndahet Charterit, mirëpo tani që shqiptarët kanë mbetur atje, nuk flet askush. /Pamfleti