Alireza Karami është një prej viktimave që janë vrarë në Teheran gjatë shtypjes së protestave kundër regjimit. Pamjet e qenit të tij besnik, Arielit, pranë varrit të të ndjerit, kanë marrë vëmendje të madhe në rrjetet sociale. Duke folur për Radion Farda, shërbimin në gjuhën persiane të Radios Evropa e Lirë, një familjar i tij i afërt tha se Karami është qëlluar me armë teksa ka tentuar t’i ndihmonte një gruaje të plagosur.

Ali Karami, 26 vjeç, i cili u qëllua dhe u vra nga forcat e sigurisë së Iranit më 8 janar, kishte një amanet: “Nëse vdes para qenit tim,” tha ai, “le ta shohë ai trupin tim të pajetë.”

Para vdekjes së tij, 26-vjeçari, riparues karrocerie makinash, e ka lënë një testament prekës për kafshën e tij të dashur.

“Nëse unë vdes para tij, ju lutem tregojani trupin tim, sepse Ariel do ta kuptojë vdekjen dhe se unë kam vdekur, ndryshe nëse nuk do t’ja tregoni, ai do të kujtojë se unë e kam braktisur dhe do të vazhdojë e të presë kthimin tim.”