Në mediat që mbështeten financiarisht nga Edi Rama, ka plasur shqetësimi se kapja e Maduros shkelka të drejtën ndërkombëtare. Ky shqetësim vjen direkt pas qendrimit skandaloz të Shqipërisë e cila  i mbështeti SHBA në nivelin e ministres së jashtme, por jo në nivelin kryeministror dhe presidencial sikur Kosova.

Dhe tani, për të mbuluar skandalin, trupin e strucit mbi dymetrosh, Edi Rama po përdor mediat e tij me fishekzjarre për të justifikuar bojkotin e shtetit shqiptar në vend të mbështetjes ndaj aksionit të SHBA, siç ishte kapja e një diktatori narko-trafikant.

Këtyre shpirtdjegurve të së drejtës së ndërkombëtare u digjet shpirti po ashtu për diktatorët dhe duan t’i mbajnë përjetësisht në pushtet sepse vetëm ashtu jetojnë në luks duke shtypur popullin.

Për hir të së drejtës ndërkombëtrare u toleruan krimet kundër njerëzimit të kryekapsait të Ballkanit në ish-Jugosllavi, u tolerua Srebrenica, Snajperit e Sarajevës!

Ishte SHBA që ndërhyri bashkë me NATO-n në Serbi, që Beogradi të ndalte genocidin dhe spastrimin etnik në Kosovë!

Çfarë do të thonë këta shpirtdjegurit e së drejtës ndërkombëtare!

Maduro ishte një diktator, që ndoqi rrugën e Chavez duke shtypur opozitën, duke shkelur të drejtat elementare të njeriut dhe duke vrarë me mijëra opozitarë pa gjyqe, ndërkohë varfëria e mjerimi që mbolli,  detyroi 8 milionë venezuelianë gjatë regjimt të tij të braktisin vendin.

Maduro ishte një diktator, që ia ka bërë të zezat vendit dhe popullit të tij, që ka vjedhur zgjedhjet, që ka përdhosur çdo liri njerëzore, që e ka gërryer vendin me korrupsion galopant, me një nepotizën dhe klientelizëm pa fre dhe që e ka lënë popullin në kushte të varfërisë ekstreme.  Është vetë OKB që e ka akuzuar regjimin e Maduros për dhjetramijë vrasje pa gjyqe.

Në vitin 2018, një bord i caktuar nga Organizata e Shteteve Amerikane (OAS), në përbërjen e së cilës marrin pjesë 33 shtete, ngriti dyshime se regjimi i Maduros ka kryer krime kundër njerëzimit ndaj popullit të tij. Po ashtu Maduro ka nxitur trafikun e drogës dhe armëve drejt SHBA duke cënuar direkt sigurinë kombëtare të një vendi sovran dhe duke përhapur helmin e bardhë për shtresat e rinisë.

Pra lind pyetja: e ku i gjejnë argumentat këta të shqetësuarit se SHBA paska shkelur të drejtën ndërkombëtare kur Maduro ka shkelur të drejtat elementare për çdo qytetar të Venezuelës.

Për kokën e Maduros ishte e para administrata Biden që kishte vënë një çmim prej 15 milionë $, të cilin pastaj e rriti në 25 milionë $, ndërsa Presidenti Trump në mes të vitit 2025 e dyfishoi në 50 milionë $!

E ku keni parë ju, që hiqeni se ju digjet shpirti për të drejtën ndërkombëtare, që diktatorët të vetëdorëzohen apo të pranojnë garat e ndershme zgjedhore, kur Maduro më 2025 vodhi mandatin e tretë presidencial.

A e keni parë Iranin se si i vret protestuesit, se si shteti i Ajatollahëve vret rininë ndërsa shpirtdjegurit në studiot e Tiranës i shqetëson e  drejta ndërkombëtare, shkurt u digjet shpirti për Maduron.

Dhe shpirtdjegurit thonë le të vritet populli, por të mos shkelet e drejta ndërkombëtare, le të shfarosen liritë themelore të njeriut, por të mos preket Maduro!

Tani po kthehem tek paralelizmi.

Maduro dhe Edi Rama kanë marrë pushtetin më 2013.

Të dy morën me manipulime mandatin e tretë,

si nga Venezuela ashtu edhe nga Shqipëria janë larguar me miliona,

nga Venezuela 8 milionë, nga Shqipëria 1 milionë, si në Venezuelë edhe në Shqipëri opozita nuk ka shanse të fitojë zgjedhjet.

Plus Edi Rama përdor mjetin e blerjes së opozitarëve dhe the last but not the least, qershia mbi tortë

është se Shqipëria, gjatë kësaj dekade ku ka ka lulëzuar marihuana, korrupsioni dhe krimi i organizuar, njihet si narko-shtet.

Prandaj Edi Rama ndërsen shpirtdjegurit për të drejtën ndërkombëtare, të cilëve nuk u plas fare për shkeljet e të drejtave të njeriut dhe poshtrimi i dinjitetit njerëzor.