Podujevë, 1 nëntor 2025

Kryeministri në detyrë i Republikës së Kosovës, Albin Kurti, bashkë me kryetarin e Komunës së Podujevës, Shpejtim Bulliqi dhe ministrin në detyrë të Kulturës, Rinisë dhe Sportit, Hajrulla Çeku, ka bërë homazhe te Kompleksi Memorial “Zahir Pajaziti”, në fshatin Orllan të Podujevës.

Në këtë ditë, që shënon ditëlindjen e Heroit të Kombit Zahir Pajaziti, kryeministri Kurti tha se Zahiri ishte veprimtar i jashtëzakonshëm, luftëtar i paepur që u bë edhe sinonim i kushtrimit për liri, bashkë me Hakif Zejnullahun e Edmond Hoxhën.

Ai tha se e mbanë mend janarin e vitit 1997, kur Zahir Pajaziti, pa i mbushur ende 35 vjet, ra heroikisht në ballafaqim me forcat armike e okupatore të Serbisë, në Pestovë të Vushtrrisë, pasi që kishte kryer shumë aksione çlirimtare, e që i paraprinë

luftës së lavdishme të Ushtrisë Çlirimtare të Kosovës.

“Zahir Pajaziti është emri i cili kujtohet e nderohet nga populli mbarë, por në veçanti ai është frymëzim për ushtrinë e Kosovës, për forcat tona të sigurisë, për të gjithë ushtarët, oficerët dhe nënoficerët, të cilët e mbrojnë integritetin territorial, sovranitetin shtetëror, gjithandej Kosovës, tërë kohën”, tha kryeministri Kurti.

Prononcimi i plotë i kryeministrit Kurti: 

Jemi këtu bashkë me familjen e Heroit të popullit Zahir Pajaziti, me Bajramin dhe të tjerët, po ashtu me kryetarin e Komunës së Podujevës, Shpejtim Bulliqin, me ministrin e Kulturës, Hajrulla Çekun, që të bëjmë nderime te varri i Zahir Pajazitit, këtij pararendësi të luftës çlirimtare, i cili ishte veprimtar i jashtëzakonshëm, luftëtar i paepur, që u bë edhe sinonim i kushtrimit për liri, bashkë me Hakif Zejnullahun e Edmond Hoxhën.

E mbaj mend mirë janarin e vitit 1997, kur Zahir Pajaziti, pa i mbushur ende 35 vjet, ra heroikisht në ballafaqim me forcat armike e okupatore të Serbisë, në Pestovë të Vushtrrisë, pasi që kishte kryer shumë aksione çlirimtare, të cilët i paraprinë

luftës së lavdishme të Ushtrisë Çlirimtare të Kosovës.

Zahir Pajaziti është emri i cili kujtohet e nderohet nga populli mbarë, por në veçanti ai është frymëzim për ushtrinë e Kosovës, për forcat tona të sigurisë, për të gjithë ushtarët, oficerët dhe nënoficerët, të cilët e mbrojnë integritetin territorial, sovranitetin shtetëror, gjithandej Kosovës, tërë kohën.

Lavdi Zahir Pajazitit, në 1 nëntor sivjet, kur ai do të bëhej 63 vjeç dhe të gjithë dëshmorëve të kombit shqiptar!/Zyra e Kryeministrit