Sistemi më i drejtë e më i thjeshtë zgjedhor për Shqipërinë do të ishte sistemi proporcional kombëtar me lista të hapura.

Proporcionali rajonal është shpikje për të bllokuar daljen e partive të reja konkurrente ndaj PS-së e PD-së.

Përparësitë kryesore të proporcionalit kombëtar:

1. Mundëson përfaqësimin e partive të reja që mund të sjellin ndryshim dhe prishin duopolin e dy partive të mëdha.

2. Sjell mundësinë e prishjes së ndonjë status quo-je si ajo aktualja ku PS-ja vazhdon e kontrollon pushtetin, ndërkohë që PD-ja nuk arrin të reformohet mjaftueshëm për të sjellë ndryshim.

3. Sjell barazinë e vlerës së votës për votuesit. Deputetët do të zgjidhen me të njëjtin numër votash. Vota e një votuesi në Kukës bëhet e njëjtë me atë të një votuesi në Tiranë ose Korçë.

4. Ul prirjen klienteliste të partive gjatë fushatës, sepse vota vendore do të jetë më pak e lidhur me emrin e një deputeti.

5.Nëse plotësohet me listat e hapura, proporcionali redukton pushtetin autoritar të kryetarit dhe demokratizon partinë. Për më tepër i jep kuptim dhe vlerë konkurrimit brenda partisë.

6.Shmang mundësinë e tjetërsimit të votës përmes dizajnimit të zonave elektorale në interes të një partie (gerrymandering). Të gjithë partitë garojnë të barabarta.