Një natë tmerri dhe frike ishte mbrëmja e 12 gushtit për banorët e Delvinës. Forca të shumta zjarrfikëse, të bashkive të jugut por edhe të ardhur nga Tirana, forca të ushtrisë dhe banorë bënë të mundur shuarjen e zjarrit afër qytetit ndërsa flakët vijojnë nga zona e Kakodhiqit.

Gjatë natës rreth 10 persona nga Delvina kanë marrë ndihmë mjekësore për shkak të asfiksisë, në mjediset e Kinotetatrit ku u vendos përkohësisht spitali pas evakuimit të tij nga frika e zjarreve. Katër prej tyre ishin ushtarë të angazhuar për të shuar zjarret, informon gazetari i Syri TV.

Sot në mëngjes situata vijon të jetë kritike dhe pritet ndërhyrja nga ajri.

Tymi ka pushtuar zonën për shkak të flakëve masive ndërsa ka edhe ndërprerje të energjisë elektrike. Zjarri rrezikoi edhe puset e naftës.

Flakët, e nisura fillimisht në Finiq pasditen e djeshme kaluan në territorin e Delvinës. Banorët u evakuuan, si dhe u bë edhe evakuimi i pacientëve dhe stafit mjekësor të spitalit të Delvinës pasi flakët iu afruan edhe godinës së spitalit. Nga spitali u zhvendosën edhe bombolat e oksigjenit, pasi rrezikoheshin nga zjarri. Transferimi i pacientëve, mjekëve dhe pajisjeve u bë përkohësisht në Pallatit të Kulturë.