Këtë pranverë, qyteti i Basel-it do të mirëpresë Eurovision Song Contest 2025, një nga ngjarjet më të mëdha muzikore në Europë. E veçanta për shqiptarët është se këtë vit Shqipëria përfaqësohet nga një projekt krejtësisht i pazakontë dhe thellësisht emocionues: kënga “Zjerm” e interpretuar nga grupi Shkodra Elektronike, fituesit e Festivalit të 63-të të Këngës në RTSH.

Kjo pjesëmarrje nuk është vetëm një garë artistike, por një ngjarje kulturore që lidh brezat dhe shpërfaq potencialin krijues të diasporës shqiptare, pikërisht në një vend ku jetojnë dhe kontribuojnë mijëra shqiptarë – në Zvicër.

“Zjerm” nuk është një këngë si gjithë të tjerat. Ajo është një rikrijim modern i këngëve tradicionale shkodrane, që ka prekur zemrat e të rinjve në të gjithë botën shqiptare, sidomos në diasporë.

Përmes tingujve elektronikë bashkëkohorë, Shkodra Elektronike ka bërë të mundur që zëri i së shkuarës – ai i gjyshes, i kujtesës familjare dhe i këngës së vjetër – të ringjallet me forcë dhe emocion.

“Të rinj që nuk kishin dëgjuar kurrë më parë këngët popullore na shkruanin: ‘Këto janë këngët e gjyshes sime. Tani mund t’i dëgjoj në mënyrë moderne dhe t’i këndoj vetë,’” – tregojnë anëtarët e grupit, Bea dhe Kola.

Pjesëmarrja e Shqipërisë në Eurovision këtë vit ka një domethënie të veçantë për shqiptarët që jetojnë në Zvicër. Kënga që do të përfaqësojë vendin vjen nga diaspora dhe do të interpretohet në zemër të Zvicrës. Kjo është një ftesë për bashkim, për përkrahje dhe për afirmim të identitetit tonë kulturor.

Datat që duhet të mbani mend:

Le ta kthejmë këtë moment në një festë të komunitetit tonë! Të gjithë së bashku të votojmë për “Zjerm” dhe të ndihmojmë që Shqipëria të renditet sa më lart në këtë festival prestigjioz.

“Kur njeh rrënjët, je më i plotësuar”

Në një intervistë për RTSH, Beatriçe, një nga zërat e rinj të projektit, ndau këtë reflektim prekës:
“Jam rritur jashtë vendit. E di çfarë do të thotë të ndihesh pak italian, pak shqiptar, pak europian… Por kur ke gjërat e tua, rrënjët, je një njeri më i plotësuar. Kjo na pëlqen.”

Shqiptarë të Zvicrës, ky është momenti ynë. Le të dëgjojmë, përjetojmë dhe votojmë “Zjerm” – këngën tonë, zërin tonë, krenarinë tonë!

Gjenevë, 08.05. 2025                      Nexhmije Mehmetaj