Presidenti Donald Trump ka reaguar në lidhje me raportimet se presidenti rus Vladimir Putin ka kritikuar besueshmërinë e udhëheqjes së presidentit ukrainas Volodymyr Zelensky.

Agjencia France-Presse raportoi se Putini bëri thirrje të premten për krijimin e një qeverie kalimtare në Ukrainë, e cila mund të largojë në mënyrë efektive Zelensky.

Trumpi u shpreh se ishte shumë i zemëruar me një deklaratë të tillë, ndërsa shtoi se komente të tilla nuk po shkojnë “ në drejtimin e duhur”.

“Nëse Rusia dhe unë nuk jemi në gjendje të bëjmë një marrëveshje për ndalimin e gjakderdhjes në Ukrainë, dhe nëse mendoj se ishte faji i Rusisë që kjo nuk do të ndodhë, atëherë unë do të vendos tarifa dytësore për naftën, për të gjithë naftën që del nga Rusia. Kjo do të ishte që nëse blini naftë nga Rusia, nuk mund të bëni biznes në Shtetet e Bashkuara. Do të ketë një tarifë 25% për të gjithë naftën, një tarifë 25 deri në 50% për të gjithë naftën”, tha Trumpi në një bisedë telefonike me NBC Neës, duke shtuar se tarifat ndaj Rusisë do të viheshin brenda një muaji pa një marrëveshje armëpushimi.

“Putini e di se unë jam i zemëruar, por ne kemi një marrëdhënie shumë të mirë dhe zemërimi zhduket shpejt … nëse ai bën gjënë e duhur”, tha Trumpi ndërsa bëri me dije se gjatë javës pritet të ketë edhe një tjetër telefonatë mes dy liderëve.

Trumpi njoftoi në mënyrë të ngjashme “tarifa dytësore” për Venezuelën, duke thënë në një postim për Truth Social se tarifat do të vendosen për vendet që blejnë naftë dhe gaz nga Venezuela.

Disa nga importuesit kryesorë të produkteve të naftës ruse përfshijnë Kinën, Turqinë, Brazilin dhe Indinë, sipas një analize nga Qendra për Kërkime për Energjinë dhe Ajrin e Pastër. Nëse Trump përdor të njëjtin përkufizim të tarifave dytësore siç përdori me Venezuelën, këto vende mund të jenë ndër ato që shohin ndikimin e tarifave dytësore.

Trump e kishte bërë përfundimin e luftës në Ukrainë një premtim kryesor të politikës së jashtme gjatë fushatës, duke çuar në takime midis zyrtarëve amerikanë, ukrainas dhe rusë në muajt e parë të mandatit të tij të dytë. Javën e kaluar, Rusia dhe Ukraina ranë dakord për një armëpushim të pjesshëm dhe të kufizuar që do të lejonte lundrimin e sigurt në Detin e Zi dhe do të ndalonte sulmet ndaj objekteve energjetike të njëra-tjetrës. bw