Presidenti i sapozgjedhur amerikan Donald Trump dhe lideri kinez Xi Jinping diskutuan për tregtinë dhe TikTok në një telefonatë të premten, vetëm disa ditë para se Trumpi të kthehet në Shtëpinë e Bardhë me zotime për të vendosur tarifa dhe masa të tjera ndaj rivalit më të madh të Amerikës.

Pavarësisht kësaj, Xi e uroi Trumpin për mandatin e tij të dytë dhe bëri presion për përmirësimin e marrëdhënieve, tha ministria e jashtme kineze. Thirrja erdhi në të njëjtën ditë kur Gjykata e Lartë e SHBA-së mbështeti një ligj që ndalon TikTok nëse nuk shitet nga kompania e saj mëmë me bazë në Kinë.

“Të dy i kushtojmë rëndësi të madhe ndërveprimit, shpresojmë për një fillim të mirë të Kinës dhe SHBA-ve. Shpresojmë që të kemi një marrëdhënie sa më të mirë mes Uashingtonit dhe Pekinit”, tha Xi në telefonatë.

Trump konfirmoi në platformën e tij “Truth Social” se kishte folur me Xi, duke thënë se “thirrja ishte shumë e mirë si për Kinën ashtu edhe për SHBA-në”. Ata folën për tregtinë dhe TikTok, por edhe më shumë, tha ai.

“Presidenti Xi dhe unë do të bëjmë gjithçka që është e mundur për ta bërë botën më paqësore dhe të sigurt!” ka shkruar Trump.

Ditët e fundit kanë treguar një anë më të ngrohtë të marrëdhënieve SHBA-Kinë, e cila pritet të jetë një nga fokuset kryesore të mandatit të dytë të Trump. Në fushatën e tij, Trump kërcënoi se do të rriste tarifat për mallrat kineze deri në 60% dhe më vonë premtoi një rritje shtesë prej 10% mbi akuzat se Kina nuk ka arritur të frenojë rrjedhën e drogave të paligjshme në Shtetet e Bashkuara.

Ekspertët besojnë se Trump do të zgjeronte kontrollet edhe mbi produktet e shitura në Kinë. Por ata gjithashtu kanë vënë në dukje se Trump u zotua të “shpëtojë TikTok” edhe pse ai u përpoq të ndalonte platformën e mediave sociale herën e fundit që ishte në Shtëpinë e Bardhë.

Pas vendimit të Gjykatës së Lartë, Trump tha në mediat sociale se “vendimi i tij për TikTok do të merret në një të ardhme jo shumë të largët, por unë duhet të kem kohë për të shqyrtuar situatën!” bw