DASMË NË DY KOHË- Sa bukur dasmorët presin ardhjen e krushqve… Nga Albert HABAZAJ

December 12, 2023

Në Youtube pashë një dasmë të sotme

M’u bë zemra mal nga atmosfera,

M’u kujtua dasma ime jo aq e moçme

Ç’mrekulli kujtimesh të ëmbla e të tjera…

.

Dasma e sotme me kënaqësi bashkëkohore

Pritja e krushqve, si s’ka më mirë,

Ceremoniali i këndshëm me protokolle

Ëmbëlsirë në fjalë, në sy ëmbëlsirë…

.

Edhe ne jemi martuar e dasmë të madhe

Kemi bërë me gjithë nderet e lezetet

Sipas traditës, me këngë e valle

Një festë, nga ato që në kujtesë mbeten.

.

Të bukur, gazmore, me të ngrënë, me të pirë

Gëzim vëllazëror, për burra gaz e kuvend,

7 net tundej vendi gjer në të gdhirë

Dhe fotografi kemi bërë… sa s’mbahet mend.

.

Në fakt, gjithë fshati një fotograf kishte

Që përdorte një aparat për emulacion,

Pas punës, kërkesa për dasma e hidhte

Nga një fshat tjetër në fshatin tonë…

.

Eh, ç’dasmë kemi bërë, ç’dasmë!

Nuk e them dot, por mend e mbaj,

Ç’bateri në shpirt e ç’energji që patëm

Jehona mori luginën skaj më skaj…

.

Të vetmit fotograf, që thirrëm në dasmë

Fotografitë iu dogjën a s’kish’ bërë fotografim,

Ndoshta s’kishte faj, po ne ç’kusur patëm

Që nga Dasma princore s’kemi asnjë kujtim …

• twitter

  Follow
• facebook
• linkedin

Fjalë kyçe: ALBERT HABAZAJ