Zjarri në Parkun Kombëtar të Lurës vijon të përhapet prej më shumë se dy javësh, duke përfshirë mbi 100 hektarë pyje dhe sipërfaqe të mbrojtura.

Flakët kanë dalë jashtë kontrollit në një zonë të thepisur dhe të pakalueshme, ku ndërhyrja tokësore është thuajse e pamundur për shkak të mungesës së rrugëve. Për çdo ditë janë angazhuar forcat zjarrfikëse me gjithë efektivin, 40 punonjës të Bashkisë Dibër, punonjës të Administratës së Zonave të Mbrojtura dhe një togë ushtarësh.

Për të ndalur përhapjen e zjarrit, është ndërhyrë disa herë edhe nga ajri me helikopterë, të cilët kanë arritur vetëm ta lokalizojnë pjesërisht dhe t’i presin rrugën për nga liqenet, por pa mundur ta shuajnë plotësisht.

Ditën e sotme ka pasur një ndërhyrje nga një avion zjarrfikës italian dhe shpresohet që flakët të vihen përfundimisht nën kontroll në orët në vijim. Autoritetet mbeten në gatishmëri të plotë, ndërsa dëmet ndaj natyrës dhe biodiversitetit në park janë konsideruar të rënda.sn