Partia e Lirisë thekson se nuk do t’i njohë zgjedhjet e 11 majit, të cilat i quan ‘farsë kriminale’ e organizuar nga qeveria dhe strukturat shtetërore me blerje masive votash, intimidim të votuesve dhe manipulim të rezultatit, përfshirë edhe votat e diasporës.

Në një deklaratë për median Sekretari për Diasporën në Partinë e Lirisë,  Z. Besnik Jakaj tha se këto zgjedhje nuk mund të njihen dhe nuk mund të quhen zgjedhje, por një njolle turpi në historinë e zgjedhjeve në Shqipëri prandaj duhet bërë çdo përpjekje për të ndëshkuar këtë farsë elektorale dhe të vihen përpara përgjegjësisë të gjithë aktorët dhe faktorët që morën pjesë në mënyrë kriminale në këtë farsë elektorale duke realizuar një rezultat totalisht të pavërtetë dhe të papranueshëm dhe që nuk është vullneti i qytetarëve shqiptarë

Partia e Lirisë kërkon krijimin e një qeverie teknike si zgjidhje emergjente për të dalë nga kriza e thellë elektorale dhe politike.

Deklarata e Sekretarit për Diasporën në Partinë e Lirisë,  Z. Besnik Jakaj

Jam para jush në emrin tim dhe të Partisë së Lirisë për të denoncuar farsën elektorale të 11 Majit.

Ne pamë me zë e me figurë në të gjithë Shqipërinë,  por edhe me votat e Diasporës, farsën e tmerrshme kriminale elektorale në këto zgjedhje.

Të nderuar qytetarë Shqiptarë!

U vërtetua katërcipërisht se Edi Rama, partia e tij, qeveria e tij, partia-shtet dhe shteti në shërbim të partisë, janë të paaftë të organizojnë zgjeshje të lira, të drejta e të barabarta në vendin tonë.

Zgjedhjet janë çështja më fondamentale e një shoqërie demokratike për të patur zhvillim e prosperitet.

Prandaj, Partia e Lirisë dhe Opozita e Bashkuar, në asnjë rrethanë nuk duhet dhe nuk mund ti njohë këto zgjedhje të tjetërsuara,  të blera, shantazhuara, kërcënuara e falsifikuara katërcipërisht në të gjitha vendvotimet e Shqipërisë, por e njëjta gjë është bërë edhe me zarfat e votës së Diasporës.

Të nderuar qytetarë, ju keni parë në media disa vendvotime të patronazhuara nga strukturat shtetërore, me para, me lista, me “Trenin Bullgar”, por paralelisht të monitoruara dhe të shantazhuara nga organizatat kriminale në vendin tone.

Siç janë parë, disa vendvotime në media, ju garantoj që i kemi parë me sytë tanë në të gjitha vendvotimet në Tiranë dhe në të gjitha qarqet e Shqipërisë,  ku para qendrës së votimit ka qenë një strukturë kriminale e organizuar me paratë e korrupsionit për të blerë,  shantazhuar e tjetërsuar votën e qytetarëve shqiptarë  për të realizuar rezultatin e dëshiruar nga partia-shtet apo shteti në funksion të partisë.

Ju keni parë çfarë masakre elektorale është bërë me votën e Diasporës dhe patronazhistët e infiltruar në DHL, duke votuar në mënyrë masive për të arritur rezultatin e dëshiruar nga partia-shtet.

Prandaj këto zgjedhje nuk mund të njihen dhe nuk mund të quhen zgjedhje, por një farsë elektorale dhe një njolle turpi në historinë e zgjedhjeve në Shqipëri.

Opozita e Bashkuar dhe gjithë qytetarët shqiptarë, duhet të bëjnë çdo përpjekje për t’ju garantuar qytetarëve shqiptarë një votë të lirë, të ndershme, te barabarte e të pa intimiduar, të blerë apo të shantazhuar , në mënyrë që qytetarët shqiptarë të shkojnë të lirë dhe të qetë, me vullnetin e tyre për të zgjedhur përfaqësuesit e tyre në Parlament dhe në Qeveri.

Prandaj ne kërkojmë në mënyrë sa më të shpejtë një qeveri teknike për të nxjerrë vendin nga kjo krizë e thellë dhe e jashtëzakonshme, që e zhyti vendin me vjedhjen, grabitjen dhe tjetërsimin e votës së qytetarëve shqiptarë.

Duhet të gjithë së bashku të bëjmë cdo përpjekje për të ndëshkuar këtë farsë elektorale dhe të vëmë përpara përgjegjësisë të gjithë aktorët dhe faktorët që morën pjesë në mënyrë kriminale në këtë farsë elektorale duke realizuar një rezultat totalisht të pavërtetë dhe të papranueshëm dhe që nuk është vullneti i qytetarëve shqiptarë.

Prandaj ne do bëjmë çdo përpjekje, të gjithë së bashku, për t’ju garantuar qytetarëve shqiptarë të drejtën e votës së lirë dhe për t’ju garantuar atyre të drejtën legjitime dhe kushtetuese për të zgjedhur përfaqësuesit e tyre.

Kjo beteje është fondamentale për çdo njeri që e ndjen veten të lirë e kupton vlerën e Lirisë, të demokracisë, të prosperitetit e të zhvillimit të vendit, duhet të jetë i gatshëm të sakrifikojë e të luftojë për të drejtën themelore që ka qytetari, të drejtën e votës për të zgjedhur drejtuesit e vet politike e administrativë për jetën shoqërore,  politike e administrative në Republikën e Shqipërisë.