Policia e Kosovës tha se ka ndaluar një numër zyrtarësh policorë dhe disa qytetarë në një operacion në Mitrovicë, i cili u pasua me tensione në pjesën veriore të banuar me shumicë serbe.

Në një njoftim të policisë thuhet se operacionit “i ka paraprirë një hetim disa mujor i i udhëhequr nga Prokuroria e Posaçme e Kosovës, i cili ka rezultuar me dyshimin e bazuar të përfshirjes së disa zyrtareve policorë dhe të disa qytetarëve në veprat; “pjesëmarrje ose organizim i Grupit Kriminal”, në lidhje me veprat tjera penale si; “kontrabandë me mallra”, “keqpërdorim i pozitës zyrtare”, “dhënie e ryshfetit”, “tregti e Ndaluar”, etj.

“Edhe përkundër hasjes në rezistencë të armatosur në Veri të Mitrovicës, operacioni policor është duke vazhduar, përfshirë arrestimin dhe kontrollin e disa lokacioneve të cilat kanë rezultuar me konfiskimin e dëshmive relevante përfshirë edhe armë të gjata”, thuhet në njoftimin e policisë e cila nuk dha hollësi të tjera për numrin e të arrestuarve, ndërsa pohoi se një pjesëtar i saj është plagosur lehtë në këmbë.

Grupe qytetarësh serbë dolën në rrugë pas operacionit, ndërsa autoritetet serbe në Beograd thanë se operacioni ka për qëllim të frikësojë popullatën serbe.

Mediet ne Beograd thanë se presidenti i Serbisë, Aleksandër Vuçiç ka urdhëruar që ushtria dhe policia të jenë në gjendje gatishmërie dhe i ka bërë thirrje komunitetit ndërkombëtare që të ndërhyjë për të “frenuar Prishtinën”.

Presidenti i Kosovëës, Hashim Thaçi, shkroi në rrjetet sociale se “institucionet e rendit dhe ligjit kanë nevojë për besim dhe përkrahje maksimale të tërë shoqërisë në luftën e pa kompromis kundër krimit të organizuar, kontrabandës dhe korrupsionit, në tërë territorin e Republikës së Kosovës. Shpreh keqardhjen time për plagosjen e policit tonë në krye të detyrës dhe i uroj shërim sa më të shpejt. Në dekadën e dytë të Republikës së Kosovës s’do të ketë vend për krim të organizuar dhe ata që merren me aktivitete të kundërligjshme do të përfundojnë prapa grilave. Operacioni i sotëm policor është në të mirë të të gjithë qytetarëve pa asnjë dallim dhe ftoj komunitetin serb në veri që ta ruajë qetësinë dhe ta përkrah luftën kundër krimit të organizuar. Forcimi i rendit dhe ligjit është jetik për barazinë e gjithë qytetarëve dhe përshpejton lëvizjen tonë drejt procesit të integrimeve euroatlantike!”, shkroi ai.

Kryeministri i Kosovës, Ramush Haradinaj, tha se operacioni është i drejtuar ndaj individëve të përfshirë në kontrabandë, krim të organizuar dhe vepra të tjera kriminale. Disa prej personave të përfshirë në këto vepra janë zyrtarë doganorë, policë por edhe qytetarë të rëndomtë. Si Kryeministër i vendit, konfirmoj se bëhet fjalë për zbatimin të ligjit dhe asgjë tjetër. Ftoj serbët e veriut ta ruajnë qetësinë dhe ta respektojnë ligjin!”, shkroi ai në rrjetet sociale.

Sipas kryeministrit Haradinaj, “forcimi i sundimit të ligjit është në interesin e Kosovës dhe rajonit dhe krimi i organizuar e kontrabanda janë kërcënim për përparimin, prandaj nuk duhet të mbështeten në baza etnike. Qeveria e Serbisë, nuk duhet të pengojë përpjekjet për t’i luftuar ato”, tha ai.