Opozita e rekomanduar dhe media që manipulon debatin.

Në vend të një debati të lirë dhe pluralist, publiku shqiptar përballet gjithnjë e më shumë me një teatër të sajuar mediatik, ku zërat kritikë filtrohen me kujdes dhe zëvendësohen nga figura që shërbejnë për promovim partiak dhe balancë të kontrolluar.

Kjo nuk është më gazetari, por një farsë editoriale që dëmton demokracinë.

Në ekranet televizive dhe platformat online, opozitarizmi i vërtetë po zëvendësohet me një version të butë dhe të rekomanduar, ku ftohen vetëm ata që dinë të flasin “pa rrezikuar shumë”.

Këta janë të ftuarit (mediokër) që promovohen jo për vlerën e analizës apo qëndrimin kritik, por për rolin e tyre në strategjitë e brendshme të partive politike apo marrëdhëniet e tyre të heshtura me pushtetin.

Në këtë realitet, media nuk më është zë kritik i shoqërisë, por një filtër interesash, ku pjesëmarrja në debat sigurohet përmes “rekomandimit”, lidhjeve apo lojalitetit të heshtur.

Kjo sjellje editoriale nuk është as e pafajshme, as e padëmshme – ajo përfaqëson një formë të rafinuar të censurës, të ushtruar jo me ndalim, por me përzgjedhje.

“Opozitarizmi për interesa promovimi partiak” është realiteti që po dominon. Në vend që të sfidojë pushtetin, një pjesë e opozitës së ftuar në media shfaqet si zgjatim i tij, duke e përdorur ekranin për të forcuar pozicionin personal brenda partisë, për të goditur rivalë të brendshëm apo për të ndërtuar profil elektoral.

Kjo nuk është as kritikë, as rezistencë: është karrierizëm i maskuar si debat.

Ndërkohë, opozita e vërtetë, ajo që flet me guxim dhe pa filtër, mbetet jashtë studios, e etiketuar si “radikale”, “e rrezikshme” apo “jo televizive”.

Media që përjashton këta zëra ka hequr dorë nga misioni i saj informues dhe i është dorëzuar logjikës së promovimit të kontrolluar.

Për pasojë, qytetari nuk merr informacion, por një version të fabrikuar të realitetit. Humbet pluralizmi, humbet besimi te media, dhe më e rëndësishmja – humb demokracia, sepse debati është i sheshuar dhe i menaxhuar.

Nëse duam të rikthejmë sensin e gazetarisë së lirë dhe rolin e opozitës reale, duhet të ndalet praktika e filtrimit të intervistave përmes interesave partiake, nepotizmit dhe klientelizmit. Media duhet të kthehet në arenën e ideve, jo në skenën e kastave të kontrolluara. Sepse një shoqëri pa zë kritik të vërtetë është një shoqëri që mashtron veten çdo ditë.

Foto:@paroledidonnatv