Bisedimet për krizën në Maqedoni, “në të vërtetë nuk kanë filluar”, citohet të ketë thënë lideri opozitar, Zoran Zaev sot, sipas agjencisë gjermane të lajmeve, DPA.
Lideri i social demokratëve maqedon dhe kryeministri, Nikolla Gruevski, kanë mbajtur bisedime maratonike me ndërmjetësimin e Komisionerit Evropian për Zgjerim, Johannes Hahn dhe tre pjesëtarë të Parlamentit Evropian, natën mes të martes dhe të mërkures.
Këto bisedime kanë përfunduar pa ndonjë rezultat, ndërsa takimi radhës pritet të mbahet më 26 maj në parlamentin maqedon duke thënë se nuk ka kurrfarë pajtimi pos asaj që duhet të vazhdohet të diskutohet.
Zaev thotë se bisedimet në të vërtetë s’kanë filluar, pasi në takimet e deritashme vetëm një gjë thuhet, se diskutimet duhet vazhduar.
Zaev kërkon dorëheqjen e Gruevskit me akuzën se abuzon me pushtetin dhe krijimin e një qeverie teknike e cila do të përgatisë zgjedhjet e jashtëzakonshme. rel
Një organizatë kriminale shqipfolëse, e aftë për të menaxhuar trafikun e drogës nga distanca, duke koordinuar flukset e personelit dhe parave midis Shqipërisë dhe Piemontes në Itali, është çmontuar ditën e sotme.
Grupi me një strukturë fleksibile të projektuar për të shmangur kontrollet, kryente transportin dhe shpërndarjen e sasive të konsiderueshme të drogës, teksa janë kryer 18 ekzekutime urdhrash arresti e masash të vendosura nga gjykata. Të dyshuarit janë shqiptarë kryesisht dhe italianë.
Kjo është ajo që doli nga Operacioni “Pater-Turnover 2”, i kryer nga Karabinierët e kompanisë Alba, nën koordinimin e Prokurorisë së Astit, i cili çoi në lëshimin e 18 njoftimeve për përfundimin e hetimeve paraprake, kundër qytetarëve italianë dhe shqiptarë .
Hetimi filloi në maj 2024 , me arrestimin në flagrancë të njërit prej të dyshuarve. Që nga ai incident fillestar, hetuesit kanë rindërtuar gradualisht një rrjet kompleks të trafikut të kokainës me pakicë me rrënjë në zonën e Albës, por të drejtuar në mënyrë operative nga jashtë vendit.
Sipas hetuesve, ata që drejtonin fijet ishin individë shqiptarë që banonin në vendin e tyre, të cilët, përmes aplikacioneve të mesazheve dhe rrjeteve sociale, organizonin furnizimet, ndërrimet dhe pagesat pa u larguar nga Shqipëria.
“Modeli operativ ishte i testuar mirë. Udhëheqësit e organizatës mbështeteshin në bashkëpunimin e qytetarëve italianë dhe shtetasve shqiptarë që hynin në Itali me viza turistike tremujore . Kur lejet e tyre skadonin, trafikantët e drogës ktheheshin në Shqipëri, të zëvendësuar nga individë të rinj të gatshëm të zinin vendin e tyre. Ky sistem i rotacionit të vazhdueshëm ishte hartuar për të zvogëluar ekspozimin personal dhe për ta bërë procesin hetimor më kompleks”, informuan autoritetet pas aksionit.
Pikërisht ky mekanizëm i dha emrin operacionit, i cili është vazhdim i “Qarkullimit” të mëparshëm, të kryer në shtator 2023 nga Karabinierët e kompanive Alba dhe Bra. Një hetim që kishte nxjerrë në pah tashmë aftësinë e organizatës për t’u rigjeneruar me shpejtësi, duke ndryshuar personelin, por jo metodat e operimit.
Krahas trafikimit të drogës, hetimi zbuloi një sistem të sofistikuar për pastrimin e të ardhurave të paligjshme. Paratë e fituara nga shitja e drogës transferoheshin në Shqipëri nëpërmjet transfertave të parave deri në 999 euro , një prag i zgjedhur për të shmangur raportimin automatik. Një mori transfertash të vogla të drejtuara drejtuesve të lartë të organizatës ose individëve të lidhur me ta lejuan që paratë të riatdhesoheshin pa tërhequr vëmendje të tepruar.
Monitorimi i flukseve financiare, i kombinuar me mbikëqyrjen lokale, u lejoi hetuesve të rindërtonin transfertat me një total prej mbi 123,800 eurosh. Nga këto, më shumë se 20,600 euro ishin të gjurmueshme drejtpërdrejt te disa prej të dyshuarve , duke forcuar argumentet e prokurorisë për pastrim parash.
“Hetimi jep një pamje të një organizate të strukturuar, por fleksibile, të aftë për t’u përshtatur me kontrollet dhe për të shfrytëzuar mjetet e komunikimit dhe kanalet financiare në dukje të zakonshme. Ky sistem ka pasur një ndikim të prekshëm në tregun lokal të drogës, duke nxitur trafikimin e përhapur të drogës që është i vështirë për t’u zbuluar pa një punë të gjerë hetimore”, tha policia italiane.
Me njoftimin e përfundimit të hetimit, procesi tani hyn në një fazë vendimtare. Të gjithë të dyshuarit ndodhen të paraburgosur ose me masa të tjera sigurie. Panorama
Dosjet përfshijnë imazhe mbikëqyrëse nga qelia e burgut të autorit të dënuar të krimit seksual në SHBA
VOAL- Të paktën 8,000 dokumente të reja nga hetimi i Jeffrey Epstein u publikuan nga Departamenti i Drejtësisë i SHBA-së të martën. Këto skedarë të rinj përmbajnë qindra video ose klipe audio, duke përfshirë imazhe mbikëqyrëse nga qelia e burgut të autorit të dënuar të krimit seksual. Këto imazhe datojnë që nga gushti 2019, kur ai u gjet i vdekur në burg, sipas agjencisë së lajmeve AFP.
Departamenti i Drejtësisë akuzohet nga opozita Demokratike për mbajtjen sekrete të informacionit dhe kështu ngadalësimin e publikimit të tij. Kjo vonesë shihet si një manovër politike që synon të shmangë publikimin e informacionit që me sa duket kompromenton Presidentin Donald Trump, i cili shfaqet në disa imazhe së bashku me Epstein.
I gjithë dosja duhej të publikohej deri të premten, më 19 dhjetor, por Departamenti thotë se i duhet më shumë kohë për të publikuar me kujdes pjesën tjetër për të mbrojtur më së miri viktimat, identiteti i të cilëve mund të zbulohet në këto mijëra foto, video dhe tekste.
Publikimi i dokumenteve, që rrjedhin nga hetimi i kryer nga autoritetet amerikane ndaj financierit me ndikim, duhet të ndihmojë në hedhjen dritë mbi lidhjet e tij të kaluara me figura të shquara, përfshirë presidentin republikan. Agencitë
Kreu i PD-së, Sali Berisha theksoi se dy nga personat e arrestuar për protestën e djeshme ishin turistë nga Kosova dhe nuk kishin lidhje me protestën.
Sipas tij, njëri prej tyre ishte djali i një ish luftëtari të UÇK-së. Berisha tha se ai ishte arrestuar vetëm se ai kishte bërë foto me të. Kryedemokrati kërkoi lirimin e menjëhershëm të tyre.
“Janë ndaluar 10 nga të cilat 4 janë arrestuar. Këta dy prej tyre janë kosovarë, turistë të ardhur dhe janë arrestuar nga policia sapo kanë marrë vesh se janë kosovarë për të mundur me akuzuar edhe qytetarët e Kosovës për pjesëmarrje në protesta.
E vërteta është që këta të dy kanë ardhur si turistë. Kanë qenë këtu pas protestës, në mos gabohem. Kanë bërë foto. Njëri më tha se jam djali i një luftëtari të UÇK.
Bëra foto me të. Kërkoj lirimin e menjëhershëm të tyre dhe paralajmëroj policinë që të mos prekë me dorë protestuesit se ata po luftojnë kundër hajdutëve të kombit, e kriminelëve në detyrë.”, tha Berisha. Panorama
Partia Demokratike ka publikuar sot librin me mbi 1500 faqe që sipas tyre dokumenton vjedhjet në zgjedhjet e 11 majit.
Kreu i PD-së, Sali Berisha tha se ky libër është quajtur “Farsa e madhe e majmur e zgjedhjeve në Shqipëri”.
Libri është realizuar sipas Berishës falë një punë të jashtëzakonshme të strukturave të Partisë Demokratike.
“Jemi këtu para jush, para shqiptarëve publikimin e PD, të cilin kësaj herë kemi preferuar ta quajmë “Farsa e madhe e majmur e zgjedhjeve në Shqipëri”.
Ky dokument i hartuar mbi 1500 faqe dhe mbi 2000 e ca prova, dokumente, video, fotografi. Një punë e jashtëzakonshme e strukturave të PD, të cilat kanë mbrojtur votën duke identifikuar cdo shkelje ligjore, cdo dhunim të votës, cdo ndërhyrje e krimit etj”, tha Berisha. gsh
Gazetarja Dijana Toska ka kërkuar sqarim të menjëhershëm nga institucionet e shtetit shqiptar pas gafës së Ministres së Punëve të Jashtme, Elisa Spiropali, lidhur me “reciprocitetin në trajtimin e minoriteteve”, ku shqiptarët në Maqedoninë e Veriut janë përmendur në të njëjtën fjali me pakicën maqedonase në Shqipëri. Voal.ch sqaron se sipas censusit të 2011, në Shqipëri jetojnë 5512 nga pakica maqedonase, ndërsa në Maqedoninë e Veriut, Shqiptarët janë mbi 25%, pra mbi 500 mijë, popull shtetformues, duke vënë re se politikat maqedone kanë qenë gjithmonë shqiptarofobe, pra bazuar në realitetin besohet se Shqiptarët në Maqedoninë e Veriut janë rreth 1 milionë.
Gazetarja Dijana Toska ka kërkuar sqarim të menjëhershëm nga institucionet e shtetit shqiptar, duke e cilësuar këtë deklaratë si një gabim të rëndë politik dhe historik.
KËRKESË PËR SQARIM ZYRTAR NGA SHTETI
“Minoritet shtetformues” nuk është koncept juridik, por shpikje politike
Deklarata e Ministres së Punëve të Jashtme të Shqipërisë, Elisa Spiropali, mbi “reciprocitetin në trajtimin e minoriteteve”, ku shqiptarët në Maqedoninë e Veriut përmenden në të njëjtën fjali me pakicën maqedonase në Shqipëri, kërkon sqarim të menjëhershëm dhe zyrtar nga institucionet e shtetit shqiptar.
Shqiptarët e Maqedonisë së Veriut nuk janë minoritet, por popull shtetformues, me mbi 30 përqind, faktor kushtetues, demografik dhe historik në këtë shtet. Çdo formulim që i relativizon apo i barazon me pakica kombëtare përbën devijim serioz nga e vërteta politike dhe historike.
Shqiptarët jashtë kufijve administrativë të Republikës së Shqipërisë nuk janë lodra në duart e shtetit amë, por trung kombëtar që duhet përkrahur dhe mbrojtur. Kjo nuk është çështje vullneti politik, por detyrim kushtetues dhe moral i Shqipërisë.
Republika e Shqipërisë, sipas frymës së Kushtetutës së saj dhe praktikës së deritanishme shtetërore, ka përgjegjësi të qartë për: mbrojtjen e interesave kombëtare të shqiptarëve jashtë kufijve, ruajtjen e statusit të tyre politik dhe moslejimin e asnjë narrative që i zhbën ata nga subjekt në objekt diplomatik.
Prandaj, kërkohet të sqarohet publikisht:
A ishte kjo deklaratë lapsus individual, apo mosdije!?
Apo përfaqëson një ndryshim zyrtar të politikës së jashtme të Shqipërisë ndaj shqiptarëve në Maqedoninë e Veriut?
Heshtja në këtë rast do të nënkuptonte pranim të relativizimit të statusit shtetformues të shqiptarëve, gjë që është e papranueshme dhe e dëmshme për interesin kombëtar.
Shqiptarët e Maqedonisë së Veriut nuk kërkojnë favore, por respektim të statusit të tyre real politik dhe përkrahje të qartë nga shteti amë.
Kjo deklaratë nuk është lapsus i pafajshëm diplomatic është gabim i rëndë politik dhe historik.Është legjitimim i narrativave unitariste që i kanë diskriminuar për dekada shqiptarët e Maqedonisë..
Reciprociteti aplikohet mes pakicave, jo mes një pakice dhe një populli shtetformues.
Kjo është ABC-ja e diplomacisë, jo temë për eksperimente politike.
Faleminderit për vëmendjen.
Shpresojmë që sqarimi të konfirmojë se Shqipëria nuk negocion me identitetin, statusin dhe dinjitetin e shqiptarëve, sepse ato nuk janë çështje diplomatike, por themeli i kombit.
Historia i mban mend mirë jo vetëm fjalët që thuhen, por edhe sqarimet që jepen – ose që mungojnë.
Kryetari i Grupit Parlamentar të PD, Gazment Bardhi dhe deputetët e tjerë anëtarë në Këshillin e Imunitetit dhe Mandateve morën pjesë në mbledhjen që ata vetë e kishin thirrur, por PS nuk mori pjesë.
Gazment Bardhi tha se anëtarët e PS në Këshillin e Mandateve po bëhen avokatë të Belinda Ballukut.
Ai lexoi edhe një pjesë nga kërkesa e SPAK drejtuar Kuvendit, ku sipas tij është urgjente mbledhja dhe shqyrtimi i çështjes së mandatit të Ballukut.
Sipas Bardhit, SPAK thotë se Balluku ka ushtruar presion ndaj dëshmitarëve, konkretisht ndaj një vartëse të saj. Po sipas Bardhit, referuar kërkesës së SPAK, e pandehura Balluku mund të prishë dhe asgjesojë provat dhe mund të largohet.
“Njësoj si kriminelët që i fshihen drejtësisë edhe kolegët e mazhorancës janë të fshehur. Nuk janë paraqitur në një mbledhje të vlefshme. Pengimi i drejtësisë me urdhër politik të Edi Ramës është akti më i rëndë që ka kryer ky kuvend gjatë këtyre viteve demokraci. Nuk mundet që një kryeministër të urdhërojë deputetët të mbledhë Këshillin e Mandateve.
Unë për herë të parë dua tju lexoj pjesë nga kërkesa që SPAK ka sjellë në Kuvend dhe e bëjnë të ngutshme mbledhjen.
Balluku që ka interes për të zvarritur cështjen. Pse pesë anëtarë të Këshillit bëhen zëdhënës të një të pandehuri për veprime korruptive që kapin vlerën e 1.1 mld eurove.
SPAK ka argumentuar se “në vijim të hetimeve nga përdorimi i metodave speciale kanë rezultuar të dhëna se nga ana e Ballukut ka ushtruar presion në forma të ndryshme ndaj personit të pyetur, konkretisht një vartësja të saj. Jemi në kushtet e zëvendësimit të masës së sigurimit për Belinda Ballukun. Vlerësojmë se pas caktimit të masës së sigurimit, nevojat e sigurimit janë rënduar ndaj të pandehurës Belinda Balluku. Pasi po kryhen hetime penale për procedura të tjera. Gjendja e lirë e të pandehurës paraqit rrezik real. Ekziston mundësia që ajo të asgjesojë ose të prishë provat. E pandehura Belinda Balluku ka bërë përpjekje për të ndikuar tek dëshmitarët. Largimi i të pandehurës është evident”, tha Bardhi. Panorama
Qeveria shqiptare është skualifikuar nga Ministeriali i Energjisë së BE-së. Më 18 dhjetor, ky ministral ka vendosur të ndëshkojë qeverinë shqiptare për shkak të detyrave që Belinda Balluku ishte zotuar të realizonte në sektorin e energjisë, por siç duket nuk ka mundur ti realizojë pasi ka qenë e “zënë’ duke fshehur milionat që ka vjedhur.
Sipas dokumentit të Ministerialit të Energjisë, Shqipëria nuk ka miratuar dhe zbatuar ligjet, rregulloret dhe dispozitat administrative të nevojshme për t’u përputhur me Direktivën e Bashkimit Europian, që lidhet me përgatitjen për rrezikun në sektorin e energjisë elektrike.
“Shqipëria nuk ka transpozuar ende Rregulloren (BE) 2019/941 dhe as ka caktuar një autoritet kompetent për përgatitjen ndaj rreziqeve, pavarësisht se afatet përkatëse kanë përfunduar më 31 dhjetor 2023 dhe 5 janar 2023.“- thuhet në vendim.
Rregullorja (BE) 2017/2196 gjithashtu nuk është transpozuar ende. Shqipëria nuk ka paraqitur Deklaratat e Sigurisë së Furnizimit me Energji Elektrike pranë Sekretariatit, pavarësisht detyrimit të saj sipas nenit 29 të Traktatit.
“Zhvillimet kryesore në fushën e sigurisë kibernetike në Shqipëri përfshijnë miratimin në vitin 2024 të Ligjit të ri gjithëpërfshirës nr. 25/2024, i cili është pjesërisht i harmonizuar me Direktivën e BE-së për Sigurinë e Rrjeteve dhe Sistemeve të Informacionit (NIS2) dhe pasqyron standarde më të gjera evropiane. Përveç kësaj, është krijuar Autoriteti Kombëtar për Certifikimin Elektronik dhe Sigurinë Kibernetike (AKCESK), për të mbikëqyrur dhe koordinuar përpjekjet e vendit në fushën e sigurisë kibernetike”, vlerëson raporti.
Vendimi i Ministerialit të Energjisë mendohet se lidhet me tre projekte ku Balluku është investuar personalisht, si TEC-i i Roskovecit, ku dyshohet si investitore edhe një korporatë ruse, anijet energjitike “Tigrat” në Vlorë dhe destabilizimi i linjave të interkonjeksionit europian për shkak të marrëveshjeve korruptive.
Bashkimi Europian ka vendosur se qeveria shqiptare duhet të raportojë gjatë vitit 2026 se çfarë hapash do të ndërmarrë në korrigjimin e problemeve të konstatuara në politikat e energjisë.
“Shqipëria duhet të marrë të gjitha masat e duhura për të ndrequr shkeljen e identifikuar në nenin 1 dhe për të siguruar menjëherë pajtueshmërinë me ligjin e Komunitetit të Energjisë. Shqipëria do të raportojë rregullisht në Sekretariat dhe në Grupin e Përhershëm të Nivelit të Lartë në lidhje me masat e marra në vitin 2026” – theksohet në vendimin e Ministerialit të Energjisë së Bashkimit Europian.
Nëse shkeljet e Shqipërisë nuk janë korrigjuar deri më 1 korrik 2026, Sekretariati ftohet të fillojë një procedurë sipas nenit 92 të Traktatit të Komunitetit të Energjisë, që parashikon pezullimin e disa të drejtave që rrjedhin nga zbatimi i këtij traktati për palën përkatëse, duke përfshirë pezullimin e të drejtave të votimit dhe përjashtimin nga mbledhjet ose mekanizmat e parashikuar në këtë traktat./boldnews.al
Deputetja e Partisë Socialiste dhe ish ministrja Olta Xhaçka është paraqitur në Prokurorinë e Posaçme.
E pyetur nga gazetarët Xhaçka nuk dha asnjë koment, por mësohet se ajo është thirrur për hetimet mbi Portin e Limionit.
Hetimi nisi pas kallëzimit në SPAK nga ish-zëvendëskomandanti i Forcës Detare, Artur Meçollari në vitin 2021 kundër vendimit të Këshillit të Ministrave, që më 1 korrik 2020 vendosi që Baza Detare Limion me një sipërfaqe të përgjithshme mbi 265 mijë metra katrorë, t’i jepej me qira për 20 vjet me tarifën simbolike 1 euro bashkimit të 2 shoqërive.
Baza detare e Sarandës do të qëndrojë e sekuestruar derisa Prokuroria e Posaçme të dalë me një vendim për hetimin e nisur lidhur me procedurat e ndjekura për dhënien me qira te privati të pronës së ushtrisë. gsh
Paraditen e 12 gushtit 2025, Gerond Meçe, aksioner i një kompanie të teknologjisë në Tiranë, zbriti si zakonisht nga apartamenti i tij me një çantë të zezë në dorë dhe një çantë të dytë në shpinë. Pasi bëri pak hapa në drejtim të makinës së tij të parkuar, ai hapi bagazhin dhe po sistemonte çantat, kur një fuoristradë e zezë “Range Rover Defender” me xhama të errët i preu rrugën dhe u ndal pranë tij.
Nga fuoristrada zbriti një burrë i veshur me uniformë blu me mbishkrimin “BKH” dhe i thirri në emër.
“Jemi SPAK-u, duhet të vish me ne,” i tha ai duke hapur derën e pasme të makinës. I bindur se po thirrej nga organet e drejtësisë, Meçe nuk bëri rezistencë. Por iluzioni i ndalimit nga SPAK zgjati vetëm pak minuta.
Sapo makina u largua nga zona e banuar, “oficerët” i vendosën Meçes një kapuç të zi në kokë dhe morën rrugën e vjetër të Krrabës në drejtim të Elbasanit. Në rrënojat e një godine të braktisur në afërsi të fshatit Graçen, maskat ranë dhe jelekët e BKH-së u zëvendësuan me pistoleta të drejtuara në kokë.
Pengmarrësit e Gerond Meçes, që SPAK i lidh me organizatën kriminale “Çopja”, i dorëzuan atij një zarf të bardhë që përmbante një tabelë në Excel me një listë të detajuar tenderash publikë, procedura të ankimuara nga kompania e Meçes, “Advanced Business Solutions” ABS, pranë Komisionit të Prokurimit Publik, KPP.
“E njeh këtë letër?”, e pyetën rrëmbyesit. Mesazhi ishte i qartë: Tërhiqu. “Në të kundërt ke plumbin në kokë”.
Ultimatumi zbuloi se pas rrëmbimit mafioz fshihej lufta për milionat e tenderave publikë në fushën e teknologjisë, kryesisht të prokuruara nga Agjencia Kombëtare e Shoqërisë së Informacionit, AKSHI.
Prokuroria e Posaçme akuzon Ergys Agasin dhe rivalin e Meçes në biznes, Ermal Beqirin për organizimin e pengmarrjes së tij me qëllimin zhdukjen e një pengese në kontrollin e tenderave me vlerë dhjetra milionë euro të AKSHI.
Hetimi është shumë më i gjerë dhe nxjerr në sipërfaqe simbiozën mes krimit të organizuar dhe drejtueseve të AKSHI në shpërndarjen e tenderave të teknologjisë; për të mundësuar përzgjedhjen e fituesve dhe devijimin e dhjetra milionë eurove në llogaritë e Ergys Agasit – një ish funksionar publik i dorës së dytë, i akuzuar nga ish-zv.kryeministri Arben Ahmetaj si koordinatori i Ramës me krimin e organizuar.
Përveç Agasit dhe Beqirit, Prokuroria e Posaçme akuzon drejtoreshën jetëgjatë të AKSHI, Mirlinda Karçanaj dhe zëvendësen e saj, Hava Delibashi si pjesë e grupit të strukturuar kriminal që kishte për qëllim përvetësimin e tenderave të AKSHI.
Vendimi i gjykatës për masë sigurie sugjeron se Agasi komandonte dyfishimin e kostove për tenderat publikë, eliminonte përmes kërcënimit dhe korrupsionit rivalët dhe menaxhonte pastrimin e parave përmes një kompanie fiktive dhe një distributori çokollatash të lira turke.
Të dhënat e SPAK dëshmojnë se vetëm në periudhën dhjetor 2024 – shtator 2025, kompania e dyshuar fiktive në pronësinë e Agasit, EA Solution, arkëtoi rreth 29 milionë euro nga kompani që fituan tendera të AKSHI-t.
“Të gjitha sa sipër, krijojnë dyshimin e arsyeshëm të bazuar në prova se, personat nën hetim Ergys Agasi, Ermal Beqiri dhe persona të tjerë, ende të paidentifikuar, kanë kryer veprat penale të “Heqjes së paligjshme të lirisë”, “Konkurrenca e paligjshme nëpërmjet dhunës”, në kuadër të një formacioni të posaçëm, “Grup i strukturuar kriminal” dhe kryerja e veprave penale nga organizata kriminale dhe grupi i strukturuar kriminal”, citohet në vendimin e GJKKO prokurori Bledar Maksuti, i cili po heton dosjen.
Agasi e Beqiraj janë tashmë në arrati dhe nuk qenë të arritshëm për koment, ndërsa studioja ligjore “Beçi & Partners” që po mbron drejtoreshën e AKSHI, Mirlinda Karçanaj tha se do të ketë një qëndrim pasi të njihet me materialet e dosjes.
“Modus operandi”
Vendimi i Gjykatës së Posaçme për masë sigurimi e bën të qartë që grupi nën menaxhimin e Agasit nuk e kishte për herë të parë që përdorte dhunën për të futur duart në fondet publike.
Për të ilustruar mënyrën e operimit, prokurori përmend një ngjarje të pahetuar të vitit 2019 me personazhe ish-deputetin e dënuar në aferën e inceneratorëve, Alqi Bllako dhe Agasin që kishin në shenjestër një koncesion në Ministrinë e Infrastrukturës dhe Energjisë.
Pengesa në këtë rast, sipas vendimit, ishte ministri i kohës, Damian Gjiknuri dhe Agasi i shkruante Bllakos: “Do ja q* robt, do fusim çunat pastaj”, duke nënkuptuar ndonjë grup kriminal.
Prokuroria thotë se ky rast ilustron “modus operandi” të Ergys Agasit.
“Kjo rrethanë lidhet dhe me pengmarrjen e shtetasit Gerond Meçe, pasi ai gjithashtu si në rastin e shtetasit Damian Gjiknuri, kishte krijuar “pengesa”, nëpërmjet ankimimeve të shumta pranë KPP-së,” arsyeton Prokuroria.
Dosja hetimore shkon përtej përdorimit të dhunës, që ishte akti i fundit në mekanizmin e përvetësimit të fondeve publike. Sipas vendimit, Agasi regjistronte bisedat me ortakët dhe zyrtarët publikë në zyrën e tij pranë “Vesa Center” në Tiranë – regjistrime që ndodhen tashmë në duart e SPAK.
Prokuroria liston dhjetëra screenshot nga video të sekuestruara në zyrën e Agasit, ku flitet për fiksimin e tenderave publikë.
Në bisedat e cituara në dosje, Agasi cakton kriteret e tenderave dhe po ashtu haptazi fryn fondet limit që duhen për kryerjen e punëve. Në një takim të datës 16 mars 2024 mes tij, Karçanajt dhe Beqirajt, Agasi citohet të thotë: “Projekti bën 2 milion, ne do ta bëjmë 4”.
“Nga këqyrja e pamjeve filmike, arsyeshëm krijohet bindja mbi lidhjet me interes që kanë këta shtetas me njëri-tjetrin, e cila, nga analizimi i përmbajtjes së bisedave të transkriptuara, krijon dyshimin e arsyeshëm mbi realizimin e një skeme kriminale në funksion të paracaktimit të procedurave të prokurimit, krijimit të avantazheve dhe përfitimit të paligjshëm prej tyre,” arsyeton prokuroria.
Edhe dëshmitë e marra nga punonjësit e AKSHI dhe të dhënat nga dokumentacioni për tenderat, provuan sipas prokurorisë se vlerat e tenderave fryheshin dhe kur ishte e nevojshme tenderat fshiheshin pas emërtimeve “sekret” dhe “të klasifikuar”. Duke iu referuar kësaj situate, prokurori citon edhe biznesmenin nën hetim Gëzim Hoxha, i cili ka pranuar në dëshmi se një projekt për të cilin ai paguante EA Solution të Agasit si bashkëpunëtor, kostoja ishte vetëm sa gjysma e vlerës.
“Duke u nisur nga vlera e fondit limit dhe shpenzimeve të mia, mund të them se kanë qenë rreth 50% e vlerës, për blerjen e këtyre moduleve ose si shpenzime në tërësi…”, citohet Hoxha.
Në dosje identifikohen 19 procedura tenderimi ku dyshohet se grupi ka futur duart në një formë apo një tjetër. Prokurori i ndan ato në tre kategori; procedurat e shpallura në kohën e takimeve mes Agasit, Karçanajt dhe Beqirit; procedurat e prokurimit për të cilat Gerond Meçe u detyrua të tërhiqej nga ankimet si dhe procedurat për të cilat dyshohet se janë bërë pagesa fiktive në drejtim të subjektit “EA Solution” sh.p.k., në pronësi të Agasit.
Bazuar në vlerat e përmendura në vendimin e gjykatës dhe dokumentet për tenderat që gjenden online, vlera e këtyre kontratave pa TVSH është rreth 5.9 miliardë lekë apo 59 milionë euro.
Prokuroria thotë se tenderat manipuloheshin për t’u fituar nga kompania “Soft& Solution” e Beqirajt, kompania “Fastech” e Andis Papës dhe kompania First sh.p.k e Gëzim Hoxhës.
“Nga analiza e këtyre dy procedurave të prokurimit, në harmoni dhe me shpjegimet e punonjësve të shoqërisë “EA Solution”, krijohet bindja se këto procedura prokurimi, fitohen nga subjektet e kontrolluara nga shtetasi Ermal Beqiri, në bashkëpunim me shtetasin Andis Papa, fitimet e të cilave, i kalohen në mënyrë fiktive subjektit “EA Solution”, në pronësi të shtetasit Ergys Agasi”, thotë prokuroria duke iu referuar procedurave nën hetim.
Pagesa fiktive për çibukë e çokollata
Ergys Agasi gjatë dëshmisë së tij në SPAK. Foto: LSA.
Në hallkën e fundit, Prokuroria thotë se ka zbuluar se përtej manipulimit të procedurave, palët në proces u përfshinë në pastrim parash dhe faturime fiktive.
Edhe pse Agasi rezulton pronar i EA Solution, kjo e fundit funksionon brenda zyrave të kompanisë së Beqiraj dhe asnjë prej punonjësve të pyetur nuk e di që Agasi është pronar dhe as që punojnë për këtë kompani.
Punonjësit thonë se u intervistuan nga “Soft&Solution” dhe ishin habitur që rezultonin në listpagesat e EA Solution. Vetë administratorja e kompanisë së Agasit pranon se punëtorët e tyre menaxhoheshin nga burimet njerëzore të kompanisë së Beqirit.
Pasi mori në më pak se një vit 29 milionë euro nga kompanitë e Beqirit, Papës dhe Hoxhës, kompania EA Solution shpenzoi vetëm 30 mijë euro për blerjen e një makine luksoze, duke dëshmuar se nuk kishte aktivitet real.
Në një operacion paralel për transferim dhe pastrim parash, në skemë është përfshirë edhe një kompani import-eksporti nën pronësi të Rogers Rrytës.
Kompania ka aktivitet të kufizuar në importin e veshmbathjeve dhe produkteve ushqimore nga Turqia. Vetë aksioneri e pranon se praktikisht ajo sjell dhe shpërndan çokollata e çibukë. “Gjatë kohës që ka qenë administrator i kompanisë ka pasur marrëdhënie tregtare me kompanitë “Fastech” sh.p.k. dhe “Soft & Solution” sh.p.k. për tregtimin e çokollatave dhe biskotave”, citon prokuroria deklarimin e Rrytës.
Por çuditshëm, kompania ka kontrata mbi 10 milionë euro për “zgjidhje teknologjike” dhe “për aplikacione kompjuterike”.
Administratori i “Fastech”, Andis Papa është i bindur që nuk ka blerë çibukë nga kjo kompani, edhe pse ajo nuk shet tjetër gjë.
“Shtetasi Andis Papa u pyet edhe lidhur me bashkëpunimet me shoqërinë “Mega Distribution” sh.p.k., për të cilën ai deklaroi se: “…Po, kam bashkëpunuar përpara vitit 2020, kam bashkëpunuar me këtë shoqëri, gjithnjë në fushën e teknologjisë dhe informacionit…””, citohet Papa.
Shteti digjital në duart e krimit
Pengmarrësit e veshur me uniforma të sajuara policie që rrëmbyen biznesmenin Gerond Meçe nuk janë identifikuar ende, por hetimet gjetën se makina që ata përdorën i përket kompanisë Merkaj 3 sh.p.k. në pronësi Endri Merkaj. Për SPAK, ky i fundit dhe vëllai i tij Klajdi Merkaj, nuk janë figura të panjohura.
“Nga burimet e hapura është verifikuar fakti se shtetasi Endri Merkaj, së bashku me vëllain e tij Klajdi Merkaj, janë lidhje me interes të shtetasve Arjan Ormenaj dhe Arben Lamçe, pjesë e grupit kriminal “Çopja,”, thuhet në dosjen hetimore.
Klajdi Merkaj është dërguar ndërkohë për gjykim në një procedim të lidhur me vëllezërit Çopja dhe akuzohet se kreu pastrim parash për llogari të tyre duke përdorur kompanitë e tij të ndërtimit.
SPAK thotë se kjo nuk qe e vetmja lidhje mes palëve, sepse në zyrën e Agasit u sekuestruan kontrata shitjeje pasurish të paluajtshme që po ashtu të çonin te lidhja dhe kontakti me Çopjat.
“Këto të dhëna, në përputhje dhe me deklarimet e shtetasit Gerond Meçe, i cili shpjegon se ka konstatuar se dy nga personat që e kishin rrëmbyer kishin dialekt nga zona e Elbasanit, madje njëri prej tyre i kishte thënë se po ta shihte në Elbasan, do ta përshëndeste”, thuhet në dosje.
Në dëshmitë e marra nga SPAK, Andis Papa, administratori i kompanisë “Fastech” pretendon se nënshkroi kontrata me vlerë mbi 1.5 milion euro me kompaninë EA Solution të Agasit, pa takuar kurrë qoftë edhe një përfaqësues të vetëm të kësaj kompanie. Tenderat e fituar nga Beqiri dhe Papa prekin drejtpërdrejt infrastrukturën kritike digjitale.
Të 19 tenderat që janë nën hetim prekin drejtpërdrejt ose në mënyrë të tërthortë qytetarët, pasi kanë të bëjnë me dokumente identifikimi, nënshkrimin digjital e të ngjashme, deri te siguria ushqimore e ajo e barnave. Ndërkohë, këtyre kompanive u është dhënë akses dhe u është lejuar të ndërtojnë sisteme për sigurinë e burgjeve apo sisteme të Policisë së Shtetit.
Sipas hetimeve të SPAK, të gjithë tenderat sensitivë u lanë në duart e një grupi, që kur mori peng Meçen përcolli mesazhin: “Nuk dua probleme nga ty, nuk dua denoncime nga ty, në të kundërt do të vrasim ty, grua, motër, nënë, se babë nuk ke ti”./BIRN
Heqja akoma “graduale” e masave ndaj Kosovës po dëshmon se ato nuk ishin as të limituara, as të kthyeshme e as të përkohshme. Madje edhe vetë disa diplomatë të vendeve të BE-së po shokohen kur tash po e zbulojnë se ato ishin gjithëpërfshirëse dhe sanksionuan projekte si uji i pijshëm, programet për të rinjtë dhe goditën edhe projektet për sundimin e ligjit. Vështirë të gjenden raste të masave të ngjashme të BE-së ndaj dikujt tjetër
———
Kosova jo vetëm se është vendi i vetëm në Evropë që ka aspirata të anëtarësimit në BE, por nuk e ka statusin e vendit kandidat, por është edhe i vetmi vend nga ky grup i kandidatëve dhe aspirantëve që vazhdon të jetë nën masat ndëshkuese të BE-së. Disa prej tyre tashmë u hoqën, për tri a katër programe me vlerë rreth 34 milionë euro. Të tjerat u vendos që të hiqeshin së shpejti, ndërsa që të gjitha masat financiare diku në “pjesën e hershme të vitit të ri”. Në këtë mënyrë, nëse strukturat e BE-së nuk e zbulojnë edhe ndonjë trik magjik tjetër për t’i mbajtur disa masa në fuqi, do të hiqen masat të cilat qëkur ishin vendosur ishin quajtur të pabalancuara, të padrejta, të paqarta dhe jotransparente.
Strukturat e BE-së, para së gjithash ish-i dërguari për dialog, Miroslav Lajçak, dhe drejtori i Drejtorisë së Përgjithshme për Zgjerim, Jan Gertg Kopman, që patën në dorë vendosjen dhe menaxhimin e këtyre masave, bënë çmos që ato të zgjasin sa më shumë që të jetë e mundur. Nuk pati një vendim formal në Këshillin e BE-së që ato të vendosen. Prandaj edhe nuk u quajtën sanksione klasike. Por, vendet e BE-së vërtet përmes një deklarate politike i kishin dhënë mundësi përfaqësuesit të lartë të atëhershëm që të vendosë masa. Përfaqësuesi i lartë dhe Komisioni e përdorën atë deklaratë politike për t’i vendosur masa vetëm Kosovës edhe pse, sipas së njëjtës deklaratë, masa të ngjashme kanë mundur t’i vendosnin edhe Serbisë. Sepse deklarata e Këshillit jepte mundësi që masat të ndërmerren kundër secilës palë që shihet si përgjegjëse për hapa që krijojnë tensione. Sidomos pas sulmit terrorist në Banjskë, për të cilin asnjë zyrtar serioz në Bruksel nuk beson as sot e kësaj dite se ka mundur të ndodhte pa dijeninë e strukturave shtetërore të Serbisë, u shtuan thirrjet që t’i hiqen masat Kosovës, ose t’i vendosen së paku edhe Serbisë. Sepse edhe ata që pajtoheshin se Kosova i ka merituar këto masa për shkak të asaj që e quanin “veprime të pakoordinuara dhe të njëanshme”, mendonin se masat do duhej vendosur edhe ndaj Beogradit.
Kështu ato struktura në BE që nuk donin t’i vendoseshin masat Serbisë, por nuk donin as t’i hiqeshin Kosovës, krijuan një situatë në të cilën kërkohej që për heqjen e masave ndaj Kosovës të pajtohen të gjitha shtetet e BE-së, ndërsa për t’i vendosur masat Serbisë po ashtu kërkohej pajtim i të gjithëve. Për më shumë se dy vjet u dëshmua se të dyja ishin të pamundshme dhe vetëm Kosova mbeti me masa. Për dy vjet shumica e madhe e vendeve anëtare, Parlamenti Evropian e madje dhe vetë përfaqësuesi i lartë kërkuan apo rekomanduan heqjen e masave. Nga BE-ja gjithmonë përgjigjja ishte se “është në duart e Komisionit” e Komisioni thoshte se “pret që për këtë të pajtohen vendet anëtare”. Kështu u krijua një rreth vicioz.
Sa herë që “përshëndetej” Kosova për disa hapa drejt uljes së tensioneve, ajo kritikohej për disa veprime të tjera “unilaterale” dhe masat mbaheshin. Kështu për Kosovën heqja e masave u bë një cak lëvizës dhe ato u mbajtën deri më tash duke lënë pasoja serioze për shumë përfitues në Kosovë, që deri në vendosjen e masave financonin projektet nga mjetet e BE-së.
Tash kur po hiqen masat, po shihet se nga ato kanë pasur pasoja edhe organizatat nga vetë BE-ja, të cilat ishin zbatuese të disa projekteve. Nga paratë që BE i ndan për Kosovën shpesh përfitojnë edhe entitete nga BE-ja, kështu që një pjesë e atyre parave mbetet në BE.
Heqja akoma “graduale” e masave ndaj Kosovës po dëshmon se ato nuk ishin as të limituara, as të kthyeshme e as të përkohshme. Madje edhe vetë disa diplomatë të vendeve të BE-së po shokohen kur tash po e zbulojnë se ato ishin gjithëpërfshirëse dhe sanksionuan projekte si uji i pijshëm, programet për të rinjtë dhe goditën edhe projektet për sundimin e ligjit. Vështirë të gjenden raste të masave të ngjashme të BE-së ndaj dikujt tjetër.
Duke parë sjelljen e deritashme të strukturave të Komisionit Evropian fitohet përshtypja se ata nuk do të preferonin fare heqjen e masave. Por, duket se pak i ka zënë të befasuar shefja e tyre, presidentja e Komisionit Evropian, Ursula von der Leyen, me njoftimin për heqjen e pjesës tjetër të masave. E këto struktura nuk kanë mundësi aq lehtë që të veprojnë kundër asaj që ka thënë Von der Leyen, megjithëse as një gjë e tillë nuk do të na befasonte kur është Kosova në pyetje.
Tash edhe BE-ja dëshiron që sa më shpejt t’i heqë masat në mënyrë që të shpëtohen nga humbja qindra miliona. Por koha e humbur dhe pasojat për pezullimin e shumë projekteve në Kosovë për shkak të këtyre masave nuk mund të kompensohet. Shumica e madhe në BE pajtohen po ashtu se nuk ishte dashur të ekzistonin fare këto masa, se ndaj autoriteteve politike të cilat u panë si “jo bashkëpunuese” kanë mundur të ndërmerreshin veprime të tjera e jo të dënoheshin qytetarët dhe tash shpresojnë që nga kjo BE-ja të nxjerrë mësime për të ardhmen dhe masat të tilla të mos i vendosë më askujt. Nëse duan të vendosin sanksione ta bëjnë këtë sipas rregullave që ekzistojnë dhe ato të jenë transparente./Koha.net
Partia Socialiste kishte kërkuar përjashtimin e 29 deputetëve të Partisë Demokratike, për shkak të tensionit dhe kaosit në seancën e fundit parlamentare.
Për në mbledhjen e sotme të Sekretariatit të Etikës, PS u tërhoq për 26 deputetë, mes tyre edhe për Berishën dhe Bardhin, të cilët nuk u përjashtuan.
PS mori vendimin që të përjashtojë për 30 ditë punë 6 deputetë, Belind Kelliçi, Fidel Kreka, Albana Vokshi, Klevis Balliu, Flamur Noka dhe Elda Hoti.
“Sot erdhëm u mblodhëm për të dhënë edhe masat përkatëse, në përfundim sekretariati vendosi që për 6 deputetë nga ata që u propozuan të përjashtohen për 30 ditë pune, kur të fillojë seanca.
Belind Kelliçi, Fidel Kreka, Albana Vokshi, Klevis Balliu, Flamur Noka dhe Elda Hoti kanë kryer veprime të dhunshme.
Ndërsa të gjithë deputetët e tjerë, për të cilën u propozuan 30 dhe 10 ditë nga punimet e Kuvendit, Sekretariati vendosi që këtë radhë të mjaftohet vetëm me tërheqjen e vëmendjes”, tha Manja per mediat. Panorama
Zgjedhjet parlamentare të 9 shkurtit 2025 në Kosovë prodhuan një situatë bllokade institucionale, si pasojë e një strategjie opozitare të ndërtuar mbi barikadimin “të gjithë kundër Albinit”. Kjo qasje, ndonëse synonte kufizimin e Lëvizjes Vetëvendosje (LVV), rezultoi në pamundësi për formimin e Qeverisë dhe çoi në zgjedhje të parakohshme më 28 dhjetor 2025. Kjo bllokadë, siç do ta argumentojmë më poshtë, shihet se nuk e ka dobësuar LVV-në, por përkundrazi ka krijuar kushte për thellimin e fitores së saj elektorale, potencialisht nga 42,8% në 45%,, por që nuk përjashtohet mundësia që të kalohet edhe niveli I fitores së 14 shkurtit 2021. Duke u mbështetur në teori të sjelljes elektorale, analizë të fragmentimit opozitar dhe psikologjinë politike të krizës, vështrimi dëshmon se opozita, duke përsëritur të njëjtat metoda politike, do ta riprodhojë rezultatin që synonte ta shmangte.
1. Zjedhjet si simptomë e krizës strukturore
Zgjedhjet e parakohshme nuk janë thjesht mekanizëm procedural për zgjidhjen e mosmarrëveshjeve parlamentare; ato janë shpesh simptomë e krizave strukturore të sistemit politik. Në rastin e Kosovës, kriza e vitit 2025 nuk buron nga mungesa e shumicës numerike, por nga mungesa e legjitimitetit funksional të opozitës për të ndërtuar alternativë qeverisëse.
Në këtë kontekst, rikujtimi i një sentence që i atribuohet Albert Ajnshtajnit – se problemet nuk zgjidhen me të njëjtën mënyrë të të menduarit që i ka prodhuar – merr vlerë analitike: opozita kosovare hyri në zgjedhje me të njëjtën logjikë politike që e kishte çuar në humbje dhe delegjitimim publik.
2. Strategjia opozitare: nga pluralizëm politik në koalicion negativ
Opozita në zgjedhjet e 9 shkurtit 2025 nuk ndërtoi një projekt të përbashkët programor, por një koalicion negativ, të përkufizuar kryesisht nga kundërshtimi i liderit dhe subjektit dominues – Albin Kurtit dhe LVV-së.
Në literaturën e shkencës politike, koalicione të tilla:
nuk prodhojnë identitet të ri politik,
nuk mobilizojnë elektorat të paidentifikuar,
dhe shpesh përforcojnë aktorin kundër të cilit janë ndërtuar.
Në vend që ta relativizonte Kurtin si aktor politik, opozita e vendosi atë në qendër absolute të sistemit, duke e shndërruar zgjedhjen në referendum personal, jo në garë programore.
3. Bllokada institucionale dhe perceptimi publik i fajit
Pamundësia për formimin e Qeverisë pas zgjedhjeve të 9 shkurtit prodhoi një krizë të zgjatur institucionale. Në raste të tilla, teoria e “atribuimit të fajit” (blame attribution) sugjeron se elektorati tenton të ndëshkojë aktorët që perceptohen si:
obstruksionistë,
të paaftë për kompromis,
ose të fokusuar në interes partiak afatshkurtër.
Në Kosovë, perceptimi dominant nuk ishte se LVV dështoi të qeverisë, por se opozita dështoi të ofrojë zgjidhje. Ky dallim është qenësor për të kuptuar pse zgjedhjet e reja nuk e dobësojnë automatikisht partinë në pushtet.
4. Dinamika e sjelljes elektorale në zgjedhje të përsëritura
Studimet mbi zgjedhjet e përsëritura tregojnë disa efekte të qëndrueshme:
Rënie e pjesëmarrjes, kryesisht te elektorati skeptik dhe i paorganizuar;
Konsolidim i elektoratit besnik, që mobilizohet më lehtë;
Avantazh strukturor për forcën më koherente politike.
LVV, si subjekt me identitet ideologjik relativisht të qartë, liderizëm të konsoliduar dhe bazë elektorale të disiplinuar, përfiton nga këto kushte. Opozita, e fragmentuar dhe pa narrativë të unifikuar, humb proporcionalisht më shumë.
5. Gjasat për thellim të rezultatit: pse 45% është prag realist
Kalimi nga 42,8% në 45%, në mos më shumë, nuk përfaqëson një revolucion elektoral, por një rritje margjinale të shpjegueshme strukturalisht. Kjo rritje mund të vijë nga:
ndëshkimi elektoral i opozitës për bllokadën;
mobilizimi më i lartë relativ i elektoratit të LVV-së, me theks nga pjesëmarrja masive e mërgatës;
mungesa e një alternative të re kredibile.
Në mungesë të skandaleve të mëdha, presionit të artikuluar ndërkombëtar ose shfaqjes së një lideri të ri opozitar me kapital moral të padiskutueshëm, thellimi i fitores së LVV-së është më i mundshëm sesa rënia e saj.
Shto kësaj edhe tri ngjarje që shenjuan javën që lamë pas, rritja e VV ëshët krejtësisht e pritshme, reale.
Heqja 50% e masave nga ana e Komisionit të BE-së dhe paralajmrimi për largimin e tyre të plotë në fund të janarit 2026;
Nënshkrimi i Aktit për Autorizimin e Mbrojtjes Kombëtare nga ana e Presidenti amerikan, Donald Trump, në të cilin është përfshirë edhe Kosova. Akti mbështet zgjerimin e NATO-s në Ballkanin Perëndimor, duke përfshirë edhe perspektivën e anëtarësimit të Kosovës në Aleancë, si dhe anëtarësimin në BE. Mbështet qartë marrëveshjen për normalizim raportesh Kosovë-Serbi dhe kërkon zbatim real të saj. Konfirmon se qëllimi final i saj është njohja reciproke. Refuzon çdo ide për ndarje, shkëmbim territoresh apo ndryshim kufijsh mbi baza etnike [pra hedhë poshtë marrëveshjet e 2015/2015 që ishin preludi i ndarjes së Kosovës]; forcon mbështetjen amerikane për demokracitë në Ballkanin Perednimor dhe për procesin e antarësimit ët tyre në BE;
Lajmi se Bahamas është shteti i radhës [121] që ka njohur shtetësinë e Kosovës.
6. Paradoksi politik: si opozita riprodhon dominimin që synon ta thyejë
Rezultati i pritshëm i zgjedhjeve të 28 dhjetorit 2025 nxjerr në pah një paradoks klasik të politikës konkurruese: sa më shumë që opozita bashkohet rreth kundërshtimit të një aktori dominues, pa ndërtuar alternativë substanciale, aq më shumë e konsolidon atë aktor.
Në këtë kuptim, zgjedhjet nuk janë vetëm verdikt mbi qeverisjen e LVV-së, por mbi aftësinë e opozitës për t’u transformuar nga bllokues në ndërtues të shtetit funksional.
7. Përfundim
Zgjedhjet e parakohshme të 28 dhjetorit 2025 nuk pritet të shënojnë një ndryshim paradigme në politikën kosovare. Përkundrazi, ato madje ka gjasa të mira që ta përforcojnë trendin ekzistues: një forcë dominuese që konsolidohet dhe një opozitë që vazhdon të veprojë me logjikën e restaurimit dhe jo të inovacionit politik.
Nëse opozita nuk ndryshon mënyrën e të menduarit dhe të vepruarit, ajo nuk do të humbasë vetëm një palë zgjedhje, por rolin e saj historik si alternativë demokratike.
Rrjedhimisht ora për krijimin e një force të re politike, të djathtë, si një trashëguese reale e NDSH-së historike, po bie.
Komentet