Presidenti i SHBA-së, Donald Trump, ka komentuar sërish për luftën në Ukrainë, këtë herë në një postim në platformën e tij Truth Social, ku shprehet se vetëm gjatë muajit korrik, Rusia ka humbur rreth 20,000 ushtarë në frontin e luftës.

Ai e quan konfliktin “një vdekje të panevojshme” dhe e pozicionon veten si një figurë që kërkon ta ndalë luftën, ndërsa fajëson presidentin aktual Joe Biden për vazhdimin e saj.

“Sapo më informuan se pothuajse 20,000 ushtarë rusë vdiqën këtë muaj në Luftën qesharake me Ukrainën. Rusia ka humbur 112,500 ushtarë që nga fillimi i vitit. Kjo është një VDEKJE e panevojshme! Megjithatë, edhe Ukraina ka vuajtur shumë. Ata kanë humbur afërsisht 8,000 ushtarë që nga 1 janari 2025, dhe ky numër nuk përfshin të zhdukurit e tyre. Ukraina ka humbur gjithashtu civilë, por në numër më të vogël, ndërsa raketat ruse bien në Kiev dhe në vende të tjera ukrainase. Kjo është një luftë që nuk duhej të kishte ndodhur kurrë – Kjo është lufta e Bidenit, jo e TRUMPIT. Jam këtu vetëm për të parë nëse mund ta ndaloj!”, shkruan Trump.

Reagimi nuk ka vonuar nga Ukraina. Gazetarja ukrainase Olga Nesterova, në një postim të shkurtër dhe të drejtpërdrejtë, i kërkoi Trumpit të shkojë përtej statistikave dhe të kërkojë publikisht që presidenti rus Vladimir Putin të tërhiqet nga Ukraina.

“Pastaj kërkoji Putinit të largohet nga Ukraina. Thuaje.”, shkroi ajo.

Nesterova gjithashtu kritikoi vonesat në ndihmën e SHBA-së ndaj Ukrainës dhe shmangien e komunikatës së qartë nga G7, duke theksuar se këto janë çështje reale që nuk mund të zëvendësohen me retorikë politike:

“Ndihma e Bidenit për Ukrainën – ‘e vonuar’. Komunikata e G7 – e shmangur. Këto janë fakte. Jo ndjenja. Jetë reale. Jo statistika.”