Ish-ambasadori gjerman, Werner Daum, ndërron jetë në vendin që e deshi aq shumë.

Diplomati ndërroi jetë në Shqipëri, ku kishte mbërritur prej disa ditësh.

Ai vdiq në moshën 82-vjeçare.

Burimet thonë se ai u gjet i pajetë në dhomën e tij të hotelit. Mendohet se ai ka ndërruar jetë për shkaqe natyrale.

Daum mori pjesë para pak ditësh në inaugurimin e shtatores së dëshmorit të demokracisë, Josif Budo në Kavajë.

Gjatë vizitës në Bashkinë e Kavajës, ish-ambasadori gjerman Werner Daum u nderua me një Certifikatë Mirënjohjeje nga kryetari Fisnik Qosja, për kontributin e tij në momentet historike të vitit 1990.

Pas largimit nga Shqipëria, Daum punoi për të afruar vendin me publikun gjerman përmes një ekspozite të madhe në Mynih (2001) dhe më pas në Vjenë, me mbi 32,000 vizitorë. Ajo përfshinte ikona shqiptare, artefakte dhe skena nga jeta tradicionale, duke nxjerrë në pah bukurinë dhe trashëgiminë shqiptare.

“Jam krenar që ndihmova në sjelljen e kësaj bukurie në Gjermani,” tha Daum, duke falënderuar Kavajën për nderimin.

Ndërkohë një ditë më parë ai ishte i pranishëm me një intervistë për gazetaren Armela Ferko në SYRI TV.

Në këtë intervistë, ai pranoi se kishte vepruar i vetëm kundër qeverisë së tij për të ndihmuar shqiptarët që të rrëzonin komunizmin.

Kujtojmë se Daum ishte ambasador në Shqipëri nga 1987 deri në vitin 1990, pikërisht në kohën kur nisi lëvizja kundër regjimit komunist.

Ai hapi dyert e ambasadës gjermane për shqiptarët, duke dalë kundër udhëzimeve të qeverisë së tij.

Në një intervistë më vonë, ai pranoi se e bëri këtë gjë qëllimisht, duke e ditur se eksodi masiv i shqiptarëve do sillte edhe rrëzimin e regjimit.

Redaksia e SYRI TV dhe SYRI.net u shpreh ngushëllimet më të ndjera familjarëve dhe miqve të ambasadorit të nderuar.